ប្រទេសកម្ពុជាជាប់ចំណាត់ថ្នាក់លេខ២ ខាងប្រព្រឹត្តអំពើពុករលួយធ្ងន់ធ្ងរក្បែរបាតតារាង ក្នុងចំណោមប្រទេសសមាជិកអាស៊ានទាំង ១០ ខណៈប្រទេសភូមា ជាប់លេខ១ ចំណែកប្រទេសទីម័រលេស មិនត្រូវបានរាប់ចូលក្នុងសន្ទស្សន៍ស្ដីពីអំពើពុករលួយនៅឆ្នាំ២០២៤ នេះទេ។
អង្គការតម្លាភាពអន្តរជាតិកម្ពុជា បានចេញសេចក្តីរាយការណ៍ស្តីអំពីសន្ទស្សន៍អំពើពុករលួយឆ្នាំ២០២៤ កាលពីថ្ងៃទី១១ ខែកុម្ភៈ ឆ្នាំ២០២៥ ដែលទើបនឹងត្រូវបានផ្សព្វផ្សាយនៅថ្ងៃទី៤ មេសា នេះថា រាជាណាចក្រកម្ពុជាបន្តជាប់ចំណាត់ថ្នាក់លេខរៀងទី១៥៨ ក្នុងចំណោមប្រទេស១៨០ លើពិភពលោក។
ចំណាត់ថ្នាក់នេះ បានទាញទម្លាក់ឱ្យប្រទេសកម្ពុជាជាប់ជាប្រទេសប្រព្រឹត្តអំពើពុករលួយធ្ងន់ធ្ងរកម្រិតទី៤ នៅក្នុងតំបន់អាស៊ីប៉ាស៊ីហ្វិក ដែលនៅលើតែ ៣ប្រទេសប៉ុណ្ណោះ គឺប្រទេសភូមា ប្រទេសអាហ្វហ្គានីស្ថាន និងប្រទេសកូរ៉េខាងជើង។
ប្រភពដដែលថា ទោះបីកម្ពុជាជាប់ចំណាត់ថ្នាក់ដូចឆ្នាំ២០២៣ ក៏ពិតមែន ប៉ុន្តែពិន្ទុរបស់កម្ពុជាបានធ្លាក់ចុះ ១ពិន្ទុ គឺទទួលបានត្រឹមតែ ២១ពិន្ទុប៉ុណ្ណោះក្នុងចំណោមពិន្ទុសរុប ១០០ ខណៈឆ្នាំ២០២៣ កម្ពុជាទទួលបាន ២២ពិន្ទុ ដូច្នេះមានន័យថា កម្ពុជាកំពុងស្ថិតក្នុងស្ថានភាពអំពើពុករលួយធ្ងន់ធ្ងរជាងមុនមួយកម្រិតទៀត។
អង្គការតម្លាភាពកម្ពុជា បញ្ជាក់ថា យោងតាមពិន្ទុនេះបង្ហាញថា ប្រទេសកម្ពុជាបានបោះជំហានយ៉ាងយឺតៗក្នុងការប្រឆាំងអំពើពុករលួយ ព្រោះគេបានរកឃើញថាមានចំណុចខ្សោយជាច្រើននៅក្នុងការដឹកនាំរបស់រដ្ឋាភិបាល ដូចជា អភិបាលកិច្ច សុចរិតភាពស្ថាប័ន និងកិច្ចប្រឹងប្រែងប្រយុទ្ធប្រឆាំងនឹងអំពើពុករលួយ ជាដើម។
បែបនេះក្តី កាលពីចុងឆ្នាំ២០២៤ នាយករដ្ឋមន្ត្រីកម្ពុជា លោក ហ៊ុន ម៉ាណែត បានបញ្ជាឱ្យក្រសួងស្ថាប័នពាក់ព័ន្ធទាំងអស់ចាត់វិធានការពង្រឹងការអប់រំស្ដីពីការប្រឆាំងអំពើពុករលួយឱ្យមានវិសាលភាពគ្របដណ្ដប់កាន់តែទូលាយ ចូលកាន់តែជ្រៅទៅក្នុងស្រទាប់សង្គម ទាំងក្នុងស្ថាប័នសាធារណៈ ឯកជន និងសង្គមស៊ីវិល ដើម្បីបង្ការទប់ស្កាត់ក្នុងរដ្ឋបាលសាធារណៈឱ្យកាន់តែមានតម្លាភាព និងគណនេយ្យភាព។
ជុំវិញបញ្ហានេះ នាយកប្រតិបត្តិនៃអង្គការតម្លាភាពអន្តរជាតិកម្ពុជា លោក ប៉ិច ពិសី បានលើកឡើងថា ការបន្តធ្លាក់ចុះពិន្ទុរបស់កម្ពុជា បង្ហាញពីភាពចាំបាច់ជាបន្ទាន់សម្រាប់ការអនុវត្តយ៉ាងខ្ជាប់ខ្ជួននូវច្បាប់ប្រឆាំងអំពើពុករលួយ និងការប្ដេជ្ញាកាន់តែមោះមុតក្នុងការដោះស្រាយអំពើពុករលួយដែលមានលក្ខណៈជាប្រព័ន្ធ និងទ្រង់ទ្រាយធំ។
លោក ប៉ិច ពិសី បញ្ជាក់ថា ថ្វីត្បិតតែមានភាពប្រសើរឡើងបន្តិចបន្តួចនៅផ្នែកខ្លះក្តី ប៉ុន្តែការថយចុះនៅផ្នែកផ្សេងទៀតមានច្រើនលើសលប់ជាងភាពប្រសើរឡើង ដែលទាមទារឱ្យមានកិច្ចប្រឹងប្រែងកាន់តែខ្លាំងដើម្បីពង្រឹងគណនេយ្យភាពនយោបាយ និងនីតិរដ្ឋ ព្រោះកម្សោយនៃយន្តការអនុវត្ត និងកង្វះនូវចន្លោះប្រហោងនយោបាយនៅតែជាឧបសគ្គយ៉ាងសំខាន់។
អង្គការតម្លាភាពកម្ពុជា អំពាវនាវឱ្យរដ្ឋាភិបាលកម្ពុជា ពង្រីក និងពន្លឿនកិច្ចខិតខំប្រឹងប្រែងកំណែទម្រង់របស់ខ្លួនក្នុងការលុបបំបាត់អំពើពុករលួយ និងជំរុញឱ្យទីភ្នាក់ងារប្រឆាំងអំពើពុករលួយ និងស្ថាប័នសវនកម្ម ត្រូវតែទទួលបានសិទ្ធិអំណាចដោយឯករាជភាព ដើម្បីស៊ើបអង្កេត និងផ្ដន្ទាទោសចំពោះអំពើខុសឆ្គង រួមទាំងធានាឱ្យមានប្រព័ន្ធតុលាការឯករាជ្យ ដែលមិនទទួលរងឥទ្ធិពលនយោបាយ សម្រាប់ការត្រួតពិនិត្យអំណាចនីតិប្រតិបត្តិប្រកបដោយប្រសិទ្ធភាព៕
© 2025, ឌឹ ខេមបូឌា ដេលី. All rights reserved.