លោក ហ៊ុន ម៉ាណែត ប្ដេជ្ញាយកគំរូតាមប្រទេសថៃ ដោយមិនអនុញ្ញាតឱ្យជនណាម្នាក់ប្រើប្រាស់ទឹកដីខ្មែរធ្វើសកម្មភាពបង្កគ្រោះថ្នាក់ដល់ថៃ នោះឡើយ ពីព្រោះថៃ ក៏អនុវត្តគោលនយោបាយមិនឱ្យមានការប្រើប្រាស់ទឹកដីថៃ ជ្រៀតជ្រែកកិច្ចការផ្ទៃក្នុង និងធ្វើសកម្មភាពបង្កគ្រោះថ្នាក់ដល់កម្ពុជាដែរ។
ក្នុងជំនួបរវាងលោក ហ៊ុន ម៉ាណែត និងនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ នៅថ្ងៃទី២៣ មេសា នេះ បានចុះហត្ថលេខាលើឯកសារចំនួន ៧ ដែលពាក់ព័ន្ធនឹងកិច្ចសហការរវាងកម្ពុជា-ថៃ លើវិស័យពាណិជ្ជកម្ម និងការវិនិយោគសំខាន់ៗមួយចំនួន។
ក្រោយពិធីចុះហត្ថលេខា លោក ហ៊ុន ម៉ាណែត និងអ្នកស្រី ផែថងថាន ស៊ីណាវ៉ាត់ ក៏ធ្វើសេចក្តីថ្លែងការណ៍រួមក្នុងសន្និសីទសារព័ត៌មានរួមគ្នាផងដែរ ដោយឯកភាពគ្នាពង្រឹងកិច្ចសហប្រតិបត្តិការកងទ័ព ដើម្បីជំរុញវិស័យយោធារវាងប្រទេសទាំងពីរឱ្យកាន់តែជិតស្និទ្ធនៅគ្រប់កម្រិត ដើម្បីរក្សាសន្តិភាព និងស្ថិរភាពនៅតាមបន្ទាត់ព្រំដែនរវាងប្រទេសទាំងពីរ។
លោក ហ៊ុន ម៉ាណែត បញ្ជាក់ថា កម្ពុជាបានត្រៀមខ្លួនជាស្រេច និងបើកចំហជានិច្ច ព្រមទាំងមានសុច្ឆន្ទៈចង់រីកចម្រើនជាមួយគ្នាក្នុងវិស័យពាណិជ្ជកម្ម និងការវិនិយោគជាមួយថៃ សម្រាប់ប្រជាជន និងប្រជាជនរបស់ព្រះរាជាណាចក្រទាំងពីរ ក្នុងគោលដៅតែមួយ។
នៅក្នុងជំនួបរវាងមេដឹកនាំខ្មែរ និងមេដឹកនាំថៃ នៅថ្ងៃពុធ ទី២៣ ខែមេសា នេះ គេមិនឃើញប្រទេសទាំងពីរលើកឡើងអំពីបញ្ហាដែលកំពុងប្រឈមមុខដាក់គ្នានៅតាមខ្សែបន្ទាត់ព្រំដែននោះទេ ជាពិសេសបញ្ហាកោះគុត ដែនសមុទ្រត្រួតស៊ីគ្នា ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ខណៈករណីឃាតកម្មលើតំណាងរាស្ត្របក្សប្រឆាំងក្នុងទឹកដីថៃ កាលពីពេលថ្មីៗនេះ ក៏មិនត្រូវបានលើកយកមកពិភាក្សាគ្នានោះដែរ។
មុនជំនួបនេះមួយថ្ងៃ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានលើកឡើងថា នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ គួរតែលើកឡើងពីកង្វល់សិទ្ធិមនុស្សជាមួយមន្ត្រីជាន់ខ្ពស់នៃរដ្ឋាភិបាលកម្ពុជា អំឡុងដំណើរទស្សនកិច្ចរបស់ខ្លួនដែលត្រូវជួបជាមួយលោក ហ៊ុន ម៉ាណែត លោក ហ៊ុន សែន និងព្រះមហាក្សត្រខ្មែរ។
Human Rights Watch លើកឡើងថា រដ្ឋាភិបាលកម្ពុជា និងថៃ បានសមគំនិតក្នុងការគាបសង្កត់ឆ្លងដែនដើម្បីបំបិទមាត់អ្នកប្រឆាំង ក្រោមសកម្មភាពរំលោភសិទ្ធិមនុស្សយ៉ាងធ្ងន់ធ្ងរ ដោយរដ្ឋាភិបាលនៃប្រទេសទាំងពីរបានសម្របសម្រួលឱ្យមានការវាយប្រហារ ការចាប់ពង្រត់ ការបង្ខំឱ្យបាត់ខ្លួន និងការបង្ខំឱ្យប្រជាជនត្រឡប់ទៅប្រទេសកំណើតវិញ ជាដើម។
ជុំវិញបញ្ហានេះ នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ (Human Rights Watch) អ្នកស្រី Elaine Pearson លើកឡើងថា នាយករដ្ឋមន្ត្រីថៃ គួរតែដាក់សម្ពាធដល់សមភាគីកម្ពុជា ដើម្បីបញ្ចប់ការរំលោភបំពានឆ្លងដែន ដោយជំនួសមកវិញនូវទំនាក់ទំនងក្រោមការគោរពសិទ្ធិរវាងប្រទេសទាំងពីរ។
ដោយឡែកតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានស្នើឲ្យលោក ហ៊ុន ម៉ាណែត ជំរុញឲ្យនាយករដ្ឋមន្ត្រីថៃ អ្នកស្រី ផែថងថាន យល់ព្រមលើកយកករណីកោះគុត និងដែនសមុទ្រត្រួតស៊ីគ្នាទៅតុលាការអន្តរជាតិ។ ម្យ៉ាងទៀត លោកស្នើឲ្យលោក ហ៊ុន ម៉ាណែត ប្រាប់ទៅនាយករដ្ឋមន្ត្រីថៃ ត្រូវតែដកទាហានរបស់ខ្លួនចេញពីកោះគុត ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី។
លោក អ៊ុំ សំអាន អះអាងថា បើថៃ មិនព្រមដកទាហានថៃ ចេញពីកោះគុត និងប្រាសាទខ្មែរទាំង ៣ នេះទេ លោក ហ៊ុន ម៉ាណែត ត្រូវប្តឹងថៃ ទៅតុលាការអន្តរជាតិករណីកោះគុត និងប្រាសាទខ្មែរទាំង ៣ នេះ។
លោកបន្តថា បញ្ហាកោះគុត ដែនសមុទ្រត្រួតស៊ីគ្នា ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ជាអាយុជីវិតរបស់ជាតិ ប្រសិនបើលោក ហ៊ុន ម៉ាណែត មិនលើកយកបញ្ហានេះទៅពិភាក្សាជាមួយលោកស្រី ផែថងថាន ទេ នោះសបញ្ជាក់ថា លោក ហ៊ុន ម៉ាណែត គ្មានឧត្ដមគតិស្នេហាជាតិ និងទឹកដីនោះទេ៕
© 2025, ឌឹ ខេមបូឌា ដេលី. All rights reserved.