ប្រធានព្រឹទ្ធសភា លោក ហ៊ុន សែន លើកឡើងថា កម្ពុជា-វៀតណាម សម្រេចពឹងគ្នាទៅវិញទៅមកតាមរយៈសេដ្ឋកិច្ចពាណិជ្ជកម្ម ព្រោះកម្ពុជាមិនគួរសម្លឹងមើលទីផ្សារនៅឆ្ងាយទេ ក្នុងស្ថានភាពនៃសង្គ្រាមពាណិជ្ជកម្មដែលផ្សារភ្ជាប់នឹងភូមិសាស្ត្រនយោបាយរបស់មហាអំណាចចិន និងសហរដ្ឋអាមេរិកក្នុងពេលនេះ។
មេដឹកនាំបក្សកាន់អំណាច លោក ហ៊ុន សែន សរសេរលើទំព័រហ្វេសប៊ុករបស់ខ្លួន ក្រោយពីជំនួបជាមួយនាយករដ្ឋមន្ត្រីវៀតណាម លោក ផាម មីញជីញ (PHAM Minh Chinh) នៅថ្ងៃទី៣០ មេសា នេះថា ស្ថិតក្នុងស្ថានភាពបែបនេះ កម្ពុជា-វៀតណាមត្រូវតែសហការ និងជួយគ្នាទៅវិញទៅមក ស្របតាមស្មារតី «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយដែលមានស្ថិរភាពយូរអង្វែង»។
លោក ហ៊ុន សែន បញ្ជាក់ថា កាលពីអតីតកាល កម្ពុជា-វៀតណាមបានជួយគ្នាតាមរយៈកងទ័ព តែឥឡូវនេះ ប្រទេសទាំងពីរត្រូវជួយគ្នាតាមរយៈសេដ្ឋកិច្ចពាណិជ្ជកម្មវិញ ដើម្បីបង្កើនទំហំពាណិជ្ជកម្មរបស់ខ្លួនឱ្យដល់គោលដៅ ២០ពាន់លានដុល្លារអាមេរិក រួមទាំងការដោះស្រាយបញ្ហាពាណិជ្ជកម្មនៅតាមបណ្តោយព្រំដែនផងដែរ។
មុនដំណើរទស្សនកិច្ចរបស់លោក ហ៊ុន សែន ទៅកាន់ប្រទេសវៀតណាម កាលពីថ្ងៃទី២៨ ខែមេសា កម្ពុជា-វៀតណាម បានសម្រេចចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីកម្ពុជា-វៀតណាម ២០២៥-២០២៦ ដើម្បីឈានទៅសម្រេចបានគោលដៅទំហំពាណិជ្ជកម្មចំនួន ២០ពាន់លានដុល្លារសហរដ្ឋអាមេរិករវាងប្រទេសទាំងពីរ។
ក្រសួងពាណិជ្ជកម្ម បានបង្ហាញសេចក្តីរាយការណ៍កាលពីពេលថ្មីៗនេះថា ទំហំពាណិជ្ជកម្មកម្ពុជា-វៀតណាម សម្រេចបាននូវទំហំទឹកប្រាក់ជាង ៧ពាន់លានដុល្លារ (៧,៧៨ពាន់លានដុល្លារ) ក្នុងឆ្នាំ២០២៤ កន្លងទៅ ក្នុងនោះ កម្ពុជាបាននាំចេញទៅកាន់ប្រទេសវៀតណាម ក្នុងទំហំទឹកប្រាក់ប្រមាណជាង ៣ពាន់លានដុល្លារ (៣,៦១ពាន់លានដុល្លារ) ខណៈវៀតណាម ក៏បាននាំចូលមកកម្ពុជាវិញក្នុងទំហំទឹកប្រាក់ជាង ៤ពាន់លានដុល្លារអាមេរិកដែរ (៤,១៦ពាន់លានដុល្លារ)។
ផលិតផលសំខាន់ៗដែលកម្ពុជានាំទៅវៀតណាម ដូចជា ស្រូវ កៅស៊ូ គ្រាប់ស្វាយចន្ទី ដំឡូងមី ពោត ចេក ស្វាយ និងថ្នាំជក់ ជាដើម ចំណែកផលិតផលដែលវៀតណាម នាំទៅកម្ពុជាវិញ រួមមានសម្ភារៈសំណង់ អង្ករ សម្ភារៈកងទ័ព គ្រឿងម៉ាស៊ីន ប្រេងឥន្ធនៈ ឧបករណ៍អេឡិចត្រូនិក-អគ្គិសនី ជីកសិកម្ម គ្រឿងទេស បន្លែ ផ្លែឈើ និងត្រីសាច់ ជាដើម។
ក្រុមអ្នកឃ្លាំមើលសង្គមលើកឡើងថា ទំនាក់ទំនងពាណិជ្ជកម្មរវាងកម្ពុជា-វៀតណាម កន្លងមក ជាទំនាក់ទំនងមិនស្មើភាពគ្នា ព្រោះផលិតផលរបស់កម្ពុជានាំទៅប្រទេសវៀតណាម ត្រូវកំណត់តម្លៃដោយឈ្មួញវៀតណាម តាមអំពើចិត្ត ដូចជា តម្លៃស្រូវ និងកសិផលផ្សេងទៀតជាដើម ខណៈរដ្ឋាភិបាលកម្ពុជាក៏មិនបានដោះស្រាយបញ្ហានេះឱ្យកសិករខ្មែរដែររហូតដល់ពេលនេះ។
ជារៀងរាល់ឆ្នាំកន្លងមក គេកត់សម្គាល់ឃើញថា កសិផលពីប្រទេសកម្ពុជានាំចេញទៅកាន់ប្រទេសវៀតណាម ដូចជា ស្រូវ អង្ករ និងកសិផលដទៃទៀត ជាដើម ត្រូវឈ្មួញវៀតណាម កំណត់តម្លៃតាមអំពើចិត្ត ជាពិសេសរាល់ពេលដែលកសិករខ្មែរប្រមូលផលស្រូវក្នុងរដូវច្រូតកាត់ម្តងៗ។
យ៉ាងណាមិញ បើលោក ហ៊ុន សែន ពណ៌នាអំពីអ្នកជិតខាងល្អ ជួយគ្នាក្នុងគ្រាក្រទៅវិញទៅមកស្មើភាពគ្នា នោះជារឿងប្រសើរឥតខ្ចោះ ប៉ុន្តែបើនិយាយអំពីរឿងជំនួញពាណិជ្ជកម្មអាហរ័ណ-នីហរ័ណ ឬនាំចូល-នាំចេញ អ្វីដែលលោក ហ៊ុន សែន ថ្លែងដូច្នោះ គឺស្មើនឹងគ្មានគោលនយោបាយសេដ្ឋកិច្ចក្រៅប្រទេស ឬជាគោលនយោបាយទាល់គំនិត ទាល់ច្រក ដោះសាឲ្យរួចមួយគ្នាៗ ដោយឥតខ្វល់ខ្វាយអំពីផលវិបាកសម្រាប់កសិករខ្មែរ។ ក្នុងបញ្ហាជំនួញជាមួយគ្នា វាគ្មានតុល្យភាពពាណិជ្ជកម្មទៅហើយ គឺស្រុកខ្មែរនាំចូលពីប្រទេសយៀកណាម ច្រើនជាងនាំចេញពីប្រទេសកម្ពុជា។ ប្រទេសយៀកណាម ក្នុងឆ្នាំ២០២៤ នាំអង្ករចេញទៅបរទេសលំដាប់ទី៣ បន្ទាប់ពីឥណ្ឌា និងថៃឡង់ដ៍។ រីឯផលិតផលវាយនភណ្ឌ កាត់ដេរ ដឹកចេញទៅលក់នៅសហរដ្ឋអាមេរិក បានចំណូលច្រើនជាងបានពីប្រទេសដទៃទាំងអស់ រួមទាំងប្រទេសចិន ផង៕
© 2025, ឌឹ ខេមបូឌា ដេលី. All rights reserved.