លោក ហ៊ុន ម៉ាណែត ព្រមានធ្ងន់ៗទៅភាគីថៃ ថា បើថៃ ហ៊ានបិទមិនឱ្យពលរដ្ឋខ្មែរចូលទៅលេងតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ គឺស្មើនឹងឆ្លងបន្ទាត់ក្រហមរបស់កម្ពុជាហើយ។
លោក ហ៊ុន ម៉ាណែត លើកឡើងក្នុងពិធីប្រារព្ធទិវាមច្ឆជាតិនៅថ្ងៃទី០១ ខែកក្កដា នេះថា តំបន់ប្រាសាទតាមាន់ធំ តាមាន់តូច តាក្របី និងតំបន់មុំ៣ ជាតំបន់មិនទាន់ដាច់ស្រេច ដែលកំពុងរង់ចាំតុលាការយុត្តិធម៌អន្តរជាតិដោះស្រាយ ដូច្នេះគ្មានភាគីណាមានសិទ្ធិឯកតោភាគីសម្រេចចិត្តបិទតាមអំពើចិត្តបានឡើយ។
លោក ហ៊ុន ម៉ាណែត អះអាងថា ប្រសិនបើថៃ ហ៊ានបិទតំបន់ទាំង៤ នេះជាឯកតោភាគី នោះគឺមានន័យថា ថៃបានបិទច្រកនៅតំបន់ទាំងនេះជាឯកតោភាគីដូច្នេះដែរ ហើយច្បាស់ជាមានបញ្ហាជាមួយកម្ពុជាកាន់តែខ្លាំង ដូច្នេះភាគីថៃ ត្រូវតែរក្សាគ្រប់យ៉ាងឱ្យស្ថិតនៅក្នុងស្ថានភាពដូចមុនដដែល។
នាយករដ្ឋមន្ត្រីខ្មែររូបនេះបញ្ជាក់ថា ក្រុមអ្នកច្បាប់អន្តរជាតិនឹងមកដល់កម្ពុជានៅល្ងាចថ្ងៃអង្គារនេះហើយ ដើម្បីពិភាក្សាលើបណ្តឹងដែលកម្ពុជាដាក់ទៅតុលាការយុត្តិធម៌អន្តរជាតិ (ICJ) ក្នុងសំណុំរឿងព្រំដែនលើតំបន់ទាំង៤ ដែលកម្ពុជាបានប្តឹងថៃ នោះ។
កាលពីថ្ងៃទី២៤ ខែមិថុនា កាសែត The Nation បានស្រង់សម្ដីរដ្ឋមន្ត្រីក្រសួងការពារជាតិ លោក ភូមថាំ វីឆាយ៉ាឆៃ ថា លោកបានប្រគល់សិទ្ធិក្នុងការបិទប្រាសាទតាមាន់ធំ ឱ្យទៅមេបញ្ជាការភូមិភាគទី២ ជាអ្នកសម្រេចអស់ហើយ ព្រោះកងទ័ពនៅជួរមុខជាអ្នកដឹងសភាពការណ៍ជាក់ស្ដែងជាង ហើយក៏អាចប៉ាន់ប្រមាណលើកម្រិតនៃវិធានការតាមការសមស្របដែរ។
លោក ភូមថាំ វីឆាយ៉ាឆៃ បញ្ជាក់ថា មេបញ្ជាការភូមិភាគទី២ របស់ថៃ ដែលឈរជើងនៅសមរភូមិមុខ មានលទ្ធភាពក្នុងការវាយតម្លៃលើកម្រិតនៃហានិភ័យគ្រប់ពេល និងអាចស្នើឱ្យមានការបិទប្រាសាទតាមាន់ធំ តាមការចាំបាច់តែម្តង។
ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ មិនមែនជាកម្មសិទ្ធិរបស់ថៃ ឡើយ ខណៈតំបន់ទាំង៤ នេះ ត្រូវបានរដ្ឋាភិបាលកម្ពុជាលើកយកទៅដោះស្រាយនៅតុលាការយុត្តិធម៌អន្តរជាតិ (ICJ) រួចរាល់ហើយនាពេលនេះ បន្ទាប់ពីទាហានថៃ បានបាញ់ទាហានខ្មែរម្នាក់ឱ្យស្លាប់នៅតំបន់មុំ៣ កាលពីចុងខែឧសភា កន្លងទៅនោះ។
ជុំវិញបញ្ហានេះ ក្រសួងការពារជាតិកម្ពុជា បានអះអាងកាលពីពេលថ្មីៗនេះថា ផ្អែកតាមផែនទីមាត្រដ្ឋាន ១/២០០០០០ ស្របតាមស្មារតីនៃអនុសញ្ញាបារាំង-សៀមឆ្នាំ១៩០៤ និងសន្ធិសញ្ញាបារាំង-សៀម ឆ្នាំ១៩០៧ ប្រាសាទតាមាន់ធំ គឺជាដែនអធិបតេយ្យរបស់កម្ពុជាផ្ដាច់មុខ៕
© 2025, ឌឹ ខេមបូឌា ដេលី. All rights reserved.