សារព័ត៌មាន 19Fortyfive បានចេញផ្សាយនូវអត្ថបទវិភាគមួយ អំពីគោលជំហរទីក្រុងមូស្គូ ដែលមិនបានចាប់យកអាវុធនុយក្លេអ៊ែរវាយប្រហារលើប្រទេសអ៊ុយក្រែន នៅពេលដែលទីក្រុងមូស្គូ ប្រកាសថ្កោលទោសអ៊ុយក្រែន ដែលបានលួចវាយប្រហារលើមូលដ្ឋានយន្តហោះទម្លាក់គ្រាប់បែកយុទ្ធសាស្ត្រ Tu-160 Tu-95 និង Tu-22 ដោយដ្រូនរបស់អ៊ុយក្រែន កម្ទេចយន្តហោះតម្លៃរាប់ពាន់លានដុល្លារដល់ទៅ ៤១គ្រឿង បង្កឱ្យរុស្ស៊ី បាត់បង់ទ្រព្យសម្បត្តិយោធាដ៏មហាសាលក្នុងទំហំសាច់ប្រាក់ជាង ៧ពាន់លានដុល្លារអាមេរិក។
ការវាយប្រហាររបស់កងទ័ពដ្រូនអ៊ុយក្រែន កាលពីខែមុននេះទៅលើយន្តហោះទម្លាក់គ្រាប់បែកយុទ្ធសាស្ត្ររបស់រុស្ស៊ី ធ្វើឡើងក្នុងគម្រោងប្រតិបត្តិការសំណាញ់ពីងពាង ដែលកម្លាំងចារកម្មអ៊ុយក្រែន បានលួចលាក់ដ្រូនទាំងនោះតាមរថយន្តឈ្នួល ដោយរថយន្តនោះបើកបរពាសពេញប្រទេសរុស្ស៊ី ហើយវាយប្រហារលើគោលដៅយុទ្ធសាស្ត្ររបស់រុស្ស៊ី ដែលកំណត់ទុកជាមុន។
វាជាកំណត់ត្រាប្រវត្តិសាស្ត្រដែលប្រទេសអ៊ុយក្រែន ជាជនរងគ្រោះ បានវាយលុកយ៉ាងជោគជ័យក្នុងប្រតិបត្តិការសំណាញ់ពីងពាងកម្ទេចយុទ្ធសាស្ត្រសង្គ្រាមរបស់មហាអំណាចរុស្ស៊ី។ ចំពោះមុខដ៏អាម៉ាស់នេះ វិមានក្រឹមឡាំង ប្រកាសសងសឹកដ៏ធ្ងន់ធ្ងរបំផុតទៅលើប្រទេសអ៊ុយក្រែន ជាមួយនឹងការព្រមានបាញ់កម្ទេចរដ្ឋធានីគៀវ ឱ្យទៅជាផេះដោយអាវុធដ៏កំណាចបំផុតដែលគេអាចគិតថាលោក ពូទីន អាចនឹងបាញ់លើប្រទេសអ៊ុយក្រែន ដោយអាវុធនុយក្លេអ៊ែរ ដែលគ្រាប់នុយក្លេអ៊ែរប្រភេទតាក់ទិច គឺជាអាវុធអាចភ្ជាប់ជាមួយនឹងគ្រាប់មីស៊ីលផ្លោងទ្វីប ICBM ព្រោះថាវិមានក្រឹមឡាំង ច្រឡោតខឹងខ្លាំងណាស់នៅពេលនោះ។
រឿងនេះ សូម្បីចារកម្មពួកបស្ចិមប្រទេស ក៏គិតថារុស្ស៊ី អាចនឹងបាញ់គ្រាប់នុយក្លេអ៊ែរដើម្បីបន្សាបភាពខ្លាំងរបស់អ៊ុយក្រែន និងពួកបស្ចិមប្រទេស។ តែទីបំផុត រុស្ស៊ី បានត្រឹមបាញ់មីស៊ីលបាលីស្ទិក និងដ្រូនរាប់រយគ្រឿងទៅលើរដ្ឋធានីគៀវ ហើយសូម្បីមីស៊ីលអន្តរទ្វីប ICBM ក៏រុស្ស៊ី មិនបានបាញ់លើអ៊ុយក្រែន ដែរ។
ចំពោះហេតុផលមួយទៀត ទីក្រុងមូស្គូ អាចគិតថា បើរុស្ស៊ី បាញ់នុយក្លេអ៊ែរតាក់ទិចត្រឹមតែមួយគ្រាប់ ក៏មិនអាចធ្វើឱ្យលោកប្រធានាធិបតីអ៊ុយក្រែន វូឡូឌីមៀ ហ្សេឡេនស្គី ចុះចាញ់ដែរ។ តែផ្ទុយទៅវិញ បែរជាពួកកងទ័ពណាតូហក់ចូលជួយអ៊ុយក្រែន វានឹងអន្តរាយដល់ទីក្រុងមូស្គូ យ៉ាងលឿនបំផុត។
តែកត្តាមួយទៀត ព្រោះតែចិន ព្រមានម្តងហើយម្តងទៀតប្រឆាំងនឹងការកើនឡើងនូវសកម្មភាពអាវុធនុយក្លេអ៊ែរ ដែលទីក្រុងប៉េកាំង ប្រឆាំងដាច់ខាតការវាយប្រហារណាមួយដោយអាវុធប្រល័យលោកដ៏កំណាចនេះ។ យុទ្ធសាស្ត្រដ៏មានប្រសិទ្ធភាពបំផុតក្នុងការទប់ស្កាត់រុស្ស៊ី គឺអ៊ុយក្រែន មិនខ្លាចរុស្ស៊ី ទោះបីជាបើកការវាយប្រហារដោយអាវុធនុយក្លេអ៊ែរទៅលើអ៊ុយក្រែន ក៏ដោយ។
ដូចនេះហើយ រុស្ស៊ីត្រូវប្រើយុទ្ធសាស្ត្រក្នុងការបន្តអូសបន្លាយសង្គ្រាមរយៈពេលវែងជាមួយអ៊ុយក្រែន ដោយជឿជាក់ថា ការវាយប្រហារដោយការប្រើប្រាស់មីស៊ីល ឬយន្តហោះគ្មានមនុស្សបើករបស់ខ្លួន អាចបំបាក់ស្មារតីរបស់កងទ័ពអ៊ុយក្រែន បាន ក្នុងសង្គ្រាមច្រើនខែទៅមុខទៀត។
តើលក្ខខណ្ឌអ្វីខ្លះដែលរុស្ស៊ី អាចឈានទៅរកការផ្ទុះអាវុធនុយក្លេអ៊ែរ?
ទោះបីជាលោក ពូទីន កំពុងបង្កើនការវាយប្រហារយ៉ាងធ្ងន់ធ្ងរទៅលើអ៊ុយក្រែន ក៏ដោយ ក៏គេនៅតែមិនយល់ថាលោក ពូទីន នឹងឈានទៅរកការវាយប្រហារដោយអាវុធនុយក្លេអ៊ែរនោះទេ។ គេថាលោក ពូទីន គ្រាន់តែចង់បង្ហាញប្រាប់ទៅកាន់ពិភពលោកថា ប្រទេសរបស់លោកជាមហាអំណាចនុយក្លេអ៊ែរ ដែលគ្រាន់តែជាការគំរាមកំហែងទៅដល់ពួកប្រទេសលោកខាងលិចកុំឱ្យលូកដៃលើកទ័ពចូលអន្តរាគមន៍ក្នុងសង្គ្រាមរបស់រុស្ស៊ី ប្រឆាំងនឹងអ៊ុយក្រែន។ កាលពីខែកញ្ញា ឆ្នាំ២០២៤ លោក ពូទីន បានកែប្រែគោលការណ៍អាវុធនុយក្លេអ៊ែររុស្ស៊ី ដោយបន្ថែមលក្ខខណ្ឌថ្មីចំនួន ៣ សម្រាប់ការប្រើអាវុធនុយក្លេអ៊ែរដែលមានដូចជា៖
- លក្ខខណ្ឌទី១ ប្រសិនបើប្រទេសដែលគ្មានអាវុធនុយក្លេអ៊ែរ ដូចជា អ៊ុយក្រែន វាយប្រហារទៅលើរុស្ស៊ី ប៉ុន្តែមានការគាំទ្រពីប្រទេសមានអាវុធនុយក្លេអ៊ែរដូចរុស្ស៊ី ដូចជាសហរដ្ឋអាមេរិក បារាំង និងអង់គ្លេស នោះរុស្ស៊ីនឹងចាត់ទុកថាសន្តិសុខរុស្ស៊ី ធ្លាក់ក្នុងស្ថានគ្រោះថ្នាក់ ព្រោះប្រទេសមានអាវុធនុយក្លេអ៊ែរចាប់ផ្ដើមចូលធ្វើអន្តរាគមន៍ផ្ទាល់ដោយលើកទ័ពជួយអ៊ុយក្រែន។
- លក្ខខណ្ឌទី២ រុស្ស៊ីអាចប្រើអាវុធនុយក្លេអ៊ែរវាយប្រហារបង្ការទុកជាមុន ដើម្បីជាការទប់ស្កាត់ ប្រសិនបើរុស្ស៊ី ទទួលបានព័ត៌មានអាចជឿទុកចិត្តបានអំពីការវាយប្រហារតាមអាកាស ឬអាកាស និងតំបន់សមុទ្រវាយចូលប្រទេសរុស្ស៊ី ដែលជាកម្លាំងរបស់ប្រទេសមានគ្រាប់នុយក្លេអ៊ែរ។
- លក្ខខណ្ឌទី៣ រុស្ស៊ីប្រកាសថា ករណីដែលសត្រូវប្រើអាវុធធ្ងន់ធ្ងរ បង្កើតការគំរាមកំហែងយ៉ាងធ្ងន់ធ្ងរដល់អធិបតេយ្យរបស់រុស្ស៊ី នោះរុស្ស៊ី អាចពិចារណាប្រើអាវុធនុយក្លេអ៊ែរ។
ទោះបីជារុស្ស៊ី បានកែប្រែគោលការណ៍ប្រើប្រាស់អាវុធនុយក្លេអ៊ែររបស់ខ្លួននៅឆ្នាំ២០២៤ នេះក៏ដោយ ក៏លោក ពូទីន នៅតែត្រូវបានគេមើលឃើញថាលោកនឹងមិនជ្រើសរើសការប្រើអាវុធនុយក្លេអ៊ែរ ដើម្បីបើកការវាយប្រហារទៅលើសត្រូវណាមួយនោះឡើយ។ ជាក់ស្តែង ការកែប្រែនូវគោលលទ្ធិនេះបានផ្តល់នូវច្រកចេញ ឬជម្រើសដល់លោក ពូទីន ដើម្បីជៀសវាងការប្រើអាវុធនុយក្លេអ៊ែរ ឬក៏ត្រូវប្រើអាវុធប្រល័យលោកដ៏កំណាចនេះ បើចាំបាច់។
ជំនួសឲ្យការប្រើអាវុធនុយក្លេអ៊ែរ លោក ពូទីន កំពុងអនុវត្តយុទ្ធសាស្ត្រធម្មតា គឺវាយប្រហារដោយបាញ់បង្ហោះដ្រូន និងមីស៊ីលច្រើនសន្ធឹកសន្ធាប់ទៅលើប្រទេសអ៊ុយក្រែន ជារៀងរាល់ថ្ងៃ ដើម្បីបំបាក់ស្មារតីប្រជាជនអ៊ុយក្រែន និងរដ្ឋាភិបាលលោក ហ្សេឡេនស្គី៕
© 2025, ឌឹ ខេមបូឌា ដេលី. All rights reserved.