អ្នកឃ្លាំមើលសង្គមលើកឡើងថា បើរដ្ឋាភិបាលកម្ពុជាអាចអនុវត្តវិធានការច្បាប់បំបែកសម្បុកក្រុមឧក្រិដ្ឋជនឆបោក និងលាងលុយកខ្វក់ដែលកំពុងសម្ងំលាក់ខ្លួនលើទឹកដីរបស់ខ្លួនឱ្យមានប្រសិទ្ធភាព នោះក្រុមឧក្រិដ្ឋជនតាមបណ្តាប្រទេសផ្សេងៗក៏មិនហ៊ានឆ្លងចូលមកកម្ពុជាបន្តទៀតដែរ។
អ្នកផ្តល់ប្រឹក្សាយោបល់ផ្នែកអភិវឌ្ឍផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៤ កក្កដា នេះថា ការទទួលស្គាល់ ឬមិនទទួលស្គាល់របស់មេដឹកនាំពិភពលោក និងមេដឹកនាំអាស៊ានពីឧក្រិដ្ឋជនឆបោក និងលាងលុយកខ្វក់ក្នុងប្រទេសថៃ គឺជាការសម្រេចចិត្តរបស់ពួកគេ។
លោកបន្តថា បញ្ហាគឺនៅត្រង់ថា តើកម្ពុជាអាចអនុវត្តច្បាប់ចាប់ខ្លួនឧក្រិដ្ឋជនដែលហៀរហូរមកពីប្រទេសថៃ ឱ្យអស់ពីទឹកដីរបស់ខ្លួនបានដែរឬក៏អត់ប៉ុណ្ណោះ ដែលនេះទើបជារឿងសំខាន់សម្រាប់កម្ពុជាត្រូវធ្វើ។
លោក សេក សុជាតិ លើកឡើងថា បើតាមការអះអាងរបស់លោក ហ៊ុន សែន មានន័យថាកម្ពុជាបានដឹងតាំងពីយូរណាស់មកហើយថាក្រុមឧក្រិដ្ឋជនបានឆ្លងដែនពីប្រទេសថៃ ចូលមកកម្ពុជា ប៉ុន្តែហេតុអ្វីបានជាមន្ត្រីប៉ូលិសអន្តោប្រវេសន៍តាមច្រកព្រំដែនទប់ស្កាត់មិនបាន ហើយនេះក៏ជាករណីចាំបាច់ដែលរដ្ឋាភិបាលត្រូវត្រួតពិនិត្យពីការអនុវត្តតួនាទីរបស់ពួកគេឡើងវិញដែរ។
អ្នកឃ្លាំមើលសង្គមរូបនេះ ជំរុញឱ្យរដ្ឋាភិបាលកម្ពុជាអនុវត្តវិធានការច្បាប់លើក្រុមឧក្រិដ្ឋជនដែលត្រូវបានកំណត់មុខសញ្ញាហូរចូលពីទីក្រុងបាងកក ប្រទេសថៃ ឱ្យបានម៉ឺងម៉ាត់ ខណៈក្រុមឧក្រិដ្ឋជនដែលបានសម្ងំនៅកម្ពុជាសព្វថ្ងៃនេះ ក៏ត្រូវតែបំបែកសម្បុករបស់ពួកគេឱ្យអស់ដូចគ្នាដែរ នោះទើបអាចធានាភាពសុខសាន្ត និងរក្សាមុខមាត់របស់កម្ពុជាបាន។
កាលពីថ្ងៃទី១៣ ខែកក្កដា មេដឹកនាំបក្សកាន់អំណាច លោក ហ៊ុន សែន បានសរសេរលើទំព័រហ្វេសប៊ុករបស់លោកថា នៅពេលនេះ អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ បានសារភាពហើយតាមកិច្ចសម្ភាសន៍មួយលើទូរទស្សន៍ថៃ កាលពីថ្ងៃទី៩ ខែកក្កដា ថាឧក្រិដ្ឋជនធំៗឆបោកតាមអនឡាញកំពុងស្នាក់នៅក្នុង Apartment តម្លៃរាប់ពាន់លានបាតនៅទីក្រុងបាងកក និងធ្វើដំណើរដោយសេរីចេញចូលប្រទេសក្បែរខាង។
លោក ហ៊ុន សែន អះអាងថា សព្វថ្ងៃនេះ មេឧក្រិដ្ឋជនឆបោកអនឡាញនៅពាសពេញប្រទេសថៃ ខណៈទីក្រុងបាងកក គឺជាសម្បុកនៃពួកឧក្រិដ្ឋជនឆបោកខុសច្បាប់ និងលាងលុយកខ្វក់។
លោកបន្តថា ក្រុមឧក្រិដ្ឋជនទាំងនេះបានហៀរចូលកម្ពុជារហូតមក ព្រោះប្រទេសថៃ គឺជាច្រកផ្លូវឆ្លងកាត់ និងជាទីតាំងដ៏សំខាន់មួយសម្រាប់ចែកចាយគ្រឿងញៀនដ៏ច្រើនលើសលប់ចេញពីតំបន់ត្រីកោណមាស។
ទន្ទឹមនឹងនេះ លោក ហ៊ុន សែន ក៏បានអំពាវនាវឱ្យមេដឹកនាំពិភពលោក និងមេដឹកនាំអាស៊ាន ទទួលស្គាល់នូវការលើកឡើងរបស់លោក ថាក់ស៊ីន ស៊ីណាវ៉ាត់ ជុំវិញរឿងឧក្រិដ្ឋជនឆបោកខុសច្បាប់ និងលាងលុយកខ្វក់ក្នុងប្រទេសថៃ នាពេលនេះ។
លោកបន្ថែមថា ស្របពេលជាមួយគ្នានេះ របាយការណ៍របស់ការិយាល័យប្រឆាំងគ្រឿងញៀន និងឧក្រិដ្ឋកម្មរបស់អង្គការសហប្រជាជាតិ (UNODC) ក៏បានបញ្ជាក់ថា ការផលិត និងជួញដូរគ្រឿងញៀននៅក្នុងតំបន់ត្រីកោណជាប់ព្រំដែនរវាងប្រទេសមីយ៉ាន់ម៉ា ឡាវ និងថៃ ក៏បានកើនឡើងគួរឱ្យកត់សម្គាល់ដែរ៕
© 2025, ឌឹ ខេមបូឌា ដេលី. All rights reserved.