ពីរាជធានីប៊ុត្រាជ័យៈ៖ មេដឹកនាំកម្ពុជា និងថៃ បានព្រមព្រៀងគ្នាអនុវត្តបទឈប់បាញ់ដោយគ្មានលក្ខខណ្ឌ នៅក្នុងកិច្ចប្រជុំដែលរៀបចំឡើងដោយប្រទេសម៉ាឡេស៊ី និងសហការរៀបចំដោយសហរដ្ឋអាមេរិក និងចូលរួមដោយប្រទេសចិន។
យោងតាមការចុះផ្សាយដោយបណ្ដាញផ្សាយព័ត៌មាន Channel News Asia ប្រធានប្ដូរវេនអាស៊ាន លោកនាយករដ្ឋមន្ត្រី អាន់វ៉ា អ៊ីប្រាហ៊ីម (Anwar Ibrahim) នៃប្រទេសម៉ាឡេស៊ី បានប្រកាសនៅក្រោយកិច្ចប្រជុំថា បទឈប់បាញ់គ្នានេះ នឹងចូលជាធរមានចាប់ពីពាក់កណ្ដាលយប់ថ្ងៃទី២៨ កក្កដា គឺនៅម៉ោង ២៤:០០ ដែលនេះជាជំហានដំបូងដ៏សំខាន់មួយដើម្បីបន្ធូរបន្ថយជម្លោះ និងស្ដារឡើងវិញនៃសន្តិភាព និងសន្តិសុខតាមព្រំដែននៃប្រទេសទាំងពីរ។
កិច្ចព្រមព្រៀងបទឈប់បាញ់នេះ បានធ្វើឡើងតាមសំណើរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបាននិយាយទូរសព្ទជាមួយលោកនាយករដ្ឋមន្ត្រីកម្ពុជា ហ៊ុន ម៉ាណែត និងនាយករដ្ឋមន្ត្រីស្ដីទីថៃ លោក ភូមិថាំ វេឆៈយៈឆៃ (Phumtham Wechayachai)។
ក្នុងកិច្ចសន្ទនាតាមទូរសព្ទនោះ លោក ដូណាល់ ត្រាំ បានព្រមានថា ភាគីទាំងពីរ កម្ពុជា-ថៃ ត្រូវធ្វើឱ្យមានបទឈប់បាញ់ បើកម្ពុជា និងថៃ ចង់បានកិច្ចព្រមព្រៀងពាណិជ្ជកម្មថ្មីជាមួយសហរដ្ឋអាមេរិក។
សហរដ្ឋអាមេរិក បានដំឡើងពន្ធលើកម្ពុជា និងថៃ ចំនួន ៣៦% ដូចគ្នា ហើយកម្ពុជា និងថៃ កំពុងព្យាយាមសុំចរចាដើម្បីឱ្យសហរដ្ឋអាមេរិកបញ្ចុះអត្រាពន្ធនេះបន្ថែមទៀត។
ក្រោយពីជំនួបចរចា ផ្ដល់នូវកិច្ចព្រមព្រៀងបទឈប់បាញ់ សេចក្ដីប្រកាសព័ត៌មានរួមមួយបានធ្វើឡើងដោយលោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម។ លោក អាន់វ៉ា បានហៅកិច្ចព្រមព្រៀងបទឈប់បាញ់នេះ គឺជាគន្លឹះនៃការស្ដារសន្តិភាពតាមព្រំដែនកម្ពុជា-ថៃ ដែលជាប្រទេសសមាជិកអាស៊ាន។
លោក អាន់វ៉ា បានថ្លែងអរគុណដែលមេដឹកនាំកម្ពុជា និងថៃ បង្ហាញឆន្ទៈដូចគ្នាទៅរកបទឈប់បាញ់។ ជាមួយគ្នានេះ លោក ហ៊ុន ម៉ាណែត នាយករដ្ឋមន្ត្រីកម្ពុជា ក៏បានធ្វើសេចក្ដីថ្លែងការណ៍របស់លោកផងដែរ។
សេចក្ដីដើមនៃសេចក្ដីថ្លែងការណ៍របស់លោក ហ៊ុន ម៉ាណែត មានខ្លឹមសារដូចនេះថា នេះជាលទ្ធផលដ៏ត្រចះត្រចង់ដែលភាគីទាំងពីរ កម្ពុជា-ថៃ បានឯកភាពគ្នាលើបទឈប់បាញ់ ហើយបាននាំមកនូវកិច្ចព្រមព្រៀង ៣ចំណុច៖
- បទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង ២៤:០០ ថ្ងៃទី២៨ ខែកក្កដា ឆ្នាំ២០២៥។
- ភាគីទាំងពីរ រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ គឺភាគីថៃ យោធភូមិភាគទី១ និងទី២ និងភាគីកម្ពុជា យោធភូមិភាគទី៤ និងទី៥ ជួបគ្នានៅវេលាម៉ោង ៧ព្រឹក នាថ្ងៃទី២៩ ខែកក្កដា ឆ្នាំ២០២៥ និងបន្តរៀបចំកិច្ចប្រជុំជាមួយបណ្តាសេនានុព័ន្ធ និងសេនានុព័ន្ធយោធា (defense Attaché) ដឹកនាំដោយប្រធានអាស៊ាន បើមានការឯកភាពពីភាគីទាំងពីរ។
- រៀបចំកិច្ចប្រជុំគណៈកម្មាធិការព្រំដែនទូទៅ GBC កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជា នឹងធ្វើជាម្ចាស់ផ្ទះ។
សាររបស់លោក ហ៊ុន ម៉ាណែត ក៏ថ្លែងអរគុណនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលបានផ្ដួចផ្ដើមគំនិតសម្របសម្រួលឱ្យមានកិច្ចប្រជុំ និងធ្វើជាម្ចាស់ផ្ទះ។ លោកក៏អរគុណប្រធានាធិបតី ដូណាល់ ត្រាំ ដែលបានផ្តល់ការគាំទ្រដល់ដំណើរការចរចារកការឈប់បាញ់ ដើម្បីកសាងសន្តិភាពតាមរយៈសហរដ្ឋអាមេរិកធ្វើជាសហអ្នករៀបចំនៃជំនួបថ្ងៃនេះ។
លោក ហ៊ុន ម៉ាណែត ក៏បានអរគុណដល់រដ្ឋាភិបាលចិន ដែលតែងតែគាំទ្រលើកទឹកចិត្តឱ្យភាគីទាំងពីរស្វែងរកការឈប់បាញ់ និងចូលរួមយ៉ាងសកម្មគាំទ្រដល់ជំនួបពិសេសនេះ។
តាមបណ្ដាញផ្សាយព័ត៌មាន Channel News Asia លោក ហ៊ុន ម៉ាណែត សង្ឃឹមថាស្ថានភាពទៅរកបទឈប់បាញ់នេះ នឹងធ្វើឱ្យភាគីទាំងពីរ កម្ពុជា-ថៃ ស្ដារទំនាក់ទំនងការទូតទ្វេភាគីឡើងវិញ ហើយស្ថិរភាពតាមព្រំដែននឹងស្ដារឡើងវិញ ជាមួយនឹងកិច្ចពិភាក្សាទ្វេភាគីក៏អាចវិលទៅរកប្រក្រតីវិញដែរ។
បើតាមលោក ហ៊ុន ម៉ាណែត ក្នុងការពើបប្រយុទ្ធគ្នារយៈពេល ៥ថ្ងៃនេះ ប្រជាជនកម្ពុជា ៣០ម៉ឺននាក់បានក្លាយជាជនភៀសខ្លួន។
ជាមួយគ្នានេះ បណ្ដារដ្ឋមន្ត្រីការបរទេសអាស៊ាន នៅថ្ងៃចន្ទ ទី២៨ ខែកក្កដា នេះ បានអំពាវនាវឱ្យមានបទឈប់បាញ់បន្ទាន់មួយរវាងកម្ពុជា និងថៃ ជាមួយការបង្ហាញពីការព្រួយបារម្ភយ៉ាងខ្លាំងចំពោះការកើនឡើងចំនួនអ្នកស្លាប់ និងផលប៉ះពាល់ផ្នែកមនុស្សធម៌នៅតាមតំបន់ព្រំដែននៃប្រទេសទាំងពីរ។
នៅក្នុងសេចក្ដីថ្លែងការណ៍រួម បណ្ដារដ្ឋមន្ត្រីការបរទេសអាស៊ាន បានជំរុញឱ្យប្រទេសទាំងពីរបញ្ឈប់អរិភាពនឹងគ្នា ហើយត្រឡប់ទៅរកកិច្ចសន្ទនាដើម្បីបង្ការជម្លោះ និងការបំផ្លិចបំផ្លាញកើតឡើងនៅពេលអនាគត។
សេចក្ដីថ្លែងការណ៍របស់រដ្ឋមន្ត្រីការបរទេសអាស៊ាន ទទូចថា ភាគីទាំងពីរ កម្ពុជា-ថៃ ត្រូវប្រកាន់យកភាពអត់ធ្មត់ជាអតិបរមា និងទទួលយកបទឈប់បាញ់ជាបន្ទាន់។
សេចក្ដីថ្លែងការណ៍របស់ក្រុមរដ្ឋមន្ត្រីការបរទេសអាស៊ាន ក៏បានបង្ហាញការគាំទ្រដល់កិច្ចប្រឹងប្រែងរបស់ប្រទេសម៉ាឡេស៊ី ដែលជាប្រធានអាស៊ានប្ដូរវេន ដើម្បីសម្របសម្រួល និងនាំភាគីទាំងពីរទៅរកតុចរចា៕
© 2025, ឌឹ ខេមបូឌា ដេលី. All rights reserved.