ប្រធានគណបក្សសង្គ្រោះជាតិ លោក កឹម សុខា ដែលតុលាការអនុញ្ញាតឲ្យចេញក្រៅគេហដ្ឋានជាលើកដំបូងដើម្បីឱ្យលោកចូលរួមគោរពវិញ្ញាណក្ខន្ធវីរជនពលីការពារទឹកដីក្នុងសង្គ្រាមឈ្លានពានរបស់ថៃ អំពាវនាវឱ្យពលរដ្ឋខ្មែរគ្រប់និន្នាការទាំងអស់រួបរួមគ្នាកាន់តែរឹងមាំ ដើម្បីការពារប្រទេសឲ្យបានគង់វង្សសម្រាប់កូនចៅជំនាន់ក្រោយ។
លោក កឹម សុខា បានលើកឡើងនៅក្នុងពិធីបុណ្យគោរពវិញ្ញាណក្ខន្ធយោធិនពលីនៅខេត្តត្បូងឃ្មុំ និងខេត្តកំពង់ចាម នៅថ្ងៃទី៣១ កក្កដា នេះថា ក្នុងពេលនេះគឺមិនសំដៅដល់គណបក្សណាមួយទេ គឺសំដៅដល់ជាតិខ្មែរទាំងអស់គ្នា ព្រោះពេលមានការឈ្លានពានពីបរទេស ខ្មែរគ្រប់រូបត្រូវតែរួមសាមគ្គីគ្នាការពារទឹកដីរបស់ខ្លួន។
លោកត្អូញត្អែរថា ប្រទេសកម្ពុជាធ្លាប់ឆ្លងកាត់សង្គ្រាមឈ្លានពានរាប់ទសវត្សរ៍មកហើយ ប៉ុន្តែមិនគួរណាដល់សម័យទំនើបបែបនេះហើយ ប្រទេសថៃ នៅតែបន្តឈ្លានពានកម្ពុជាទៀតនោះទេ។
លោក កឹម សុខា សម្ដែងនូវមោទនភាពចំពោះវីរជនកងទ័ពដែលហ៊ានបូជាអាយុជីវិតដើម្បីការពារទឹកដីពីការឈ្លានពានរបស់បរទេសជិតខាង និងសម្ដែងមោទនភាពចំពោះពលរដ្ឋខ្មែរគ្រប់រូបដែលរួមចិត្តរួមថ្លើមជួយទៅដល់យោធិននៅសមរភូមិជួរមុខ ដើម្បីយកជ័យជម្នះលើសត្រូវឈ្លានពាននេះ។
ប្រធានគណបក្សសង្គ្រោះជាតិរូបនេះបញ្ជាក់ទៅកាន់គ្រួសារយោធិនពលីថា ប្តីរបស់ពួកគេ ឪពុករបស់ពួកគេ គឺជាសាច់ និងជាឈាមរបស់លោក ដូច្នេះពេលដែលពួកគេទាំងអស់គ្នាឈឺចាប់ លោកក៏ឈឺចាប់ដូចគ្នាដែរ ខណៈពលរដ្ឋខ្មែរគ្រប់រូបឈឺចាប់ ព្រមទាំងចងចាំនូវវីរភាពនៃការលះបង់ដ៏ធំធេងរបស់យោធិនពលីទាំងនេះគ្មានពេលភ្លេចឡើយ។
ការបង្ហាញវត្តមាននៅទីសាធារណៈជាលើកដំបូងក្រោយពីតុលាការកាត់ទោសពីបទក្បត់ជាតិ ដោយឃុំខ្លួនក្នុងផ្ទះរយៈពេល ២៧ឆ្នាំ តាំងពីថ្ងៃទី៣ ខែមីនា ឆ្នាំ២០២៣ មក លោក កឹម សុខា ត្រូវបានតុលាការឃុំខ្លួនអស់រយៈពេល ២ឆ្នាំ ៤ខែ ២៧ថ្ងៃហើយ គិតត្រឹមថ្ងៃទី៣១ ខែកក្កដា ឆ្នាំ២០២៥ នេះ។
នៅថ្ងៃព្រហស្បតិ៍នេះ លោក កឹម សុខា បានទៅចូលរួមគោរពវិញ្ញាណក្ខន្ធវីរជនពលី សពវរសេនីយ៍ត្រី សៀង សាត នៅភូមិស្រែប្រាំង ឃុំតាប្រុក ស្រុកចម្ការលើ ខេត្តកំពង់ចាម និងបន្តទៅចូលរួមគោរពវិញ្ញាណក្ខន្ធវីរជនពលីសពព្រឹន្ទបាលទោ ឆៃ រ័ត្ន នៅភូមិក្តុលកណ្តាល ឃុំទ្រា ស្រុកក្រូចឆ្មារ ខេត្តត្បូងឃ្មុំ ផងដែរ។
ដោយឡែកនៅថ្ងៃទី១ ខែសីហា លោកនឹងទៅចូលរួមគោរពវិញ្ញាណក្ខន្ធវីរជនពលីសពព្រឹន្ទបាលទោ រិន វាសនា នៅភូមិត្រពាំងត្រាច ឃុំដំណាក់អំពិល ស្រុកអង្គស្នួល ខេត្តកណ្តាល ហើយនឹងបន្តទៅចូលរួមគោរពវិញ្ញាណក្ខន្ធវីរជនពលីសពនាយចំណង់ ហៅ ម៉ៅ ស៊ា នៅភូមិព្រៃជួរ ឃុំពពេល ស្រុកត្រាំកក់ ខេត្តតាកែវ ថែមទៀត។
នាយចំណង់ មានន័យថា ជាទាហានដែលបម្រុងនឹងឡើងឋានន្តរស័ក្តិជាអនុសេនីយ៍ត្រី ឬស័ក្តិមួយ។ ស័ក្តិនេះស្ថិតក្នុងចន្លោះព្រឹន្ទបាលឯក និងអនុសេនីយ៍ត្រី។
ជុំវិញបញ្ហានេះ ប្រធានគណបក្សជំនាន់ថ្មី លោក មាជ សុវណ្ណារ៉ា លើកឡើងថា ការចាប់ផ្តើមបើកឱ្យមានសេរីភាពរបស់លោក កឹម សុខា ក្នុងរង្វង់ដែនសមត្ថកិច្ចរបស់តុលាការ ក៏ជាផ្លូវឆ្ពោះទៅរកការផ្សះផ្សាជាតិខ្មែរដែរ៕
© 2025, ឌឹ ខេមបូឌា ដេលី. All rights reserved.