អ្នកឃ្លាំមើលសង្គម លើកឡើងថា ការប្រមូល រួមទាំងការចែកចាយស្បៀងមិនត្រឹមត្រូវ នឹងធ្វើឱ្យស្បៀងទាំងនោះខូច ខណៈកងទ័ពជួរមុខក៏មិនទទួលបានស្បៀងតាមតម្រូវការសម្រាប់ទទួលទានក្នុងសមរភូមិប្រយុទ្ធនៅលើខ្នងភ្នំព្រៃក្រាស់។
អ្នកស្រាវជ្រាវអំពីការអភិវឌ្ឍសង្គម បណ្ឌិត មាស នី សរសេរលើទំព័រហ្វេសប៊ុករបស់ខ្លួននៅថ្ងៃទី៦ សីហា នេះថា អ្នករៀបចំបែងចែក និងអ្នកប្រមូលស្បៀងនៅសមរភូមិក្រោយមិនមានតួនាទីត្រឹមតែប្រមូល និងវេចខ្ចប់ប៉ុណ្ណោះទេ តែក៏ត្រូវពន្យល់ផ្សព្វផ្សាយដល់អ្នកបរិច្ចាគស្បៀងឲ្យយល់ដឹងពីតម្រូវការខុសគ្នារបស់កងទ័ពដែរ។
លោកបន្តថា បើមិនមានការរៀបចំឱ្យបានត្រឹមត្រូវទេ អាហារខ្លះប្រាកដជាខូចមុនពេលទៅដល់សមរភូមិ ក្នុងនោះ គេសង្កេតឃើញផងដែរថា មានសម្ភារៈ និងឧបភោគជាច្រើនសមស្របសម្រាប់តែខ្សែត្រៀមជួរក្រោយប៉ុណ្ណោះ រីឯអ្នកប្រយុទ្ធជួរមុខនៅតែមិនបានទទួលទានស្បៀងទៅតាមតម្រូវការនៅឡើយ។
បណ្ឌិត មាស នី ពន្យល់ថា កងទ័ពនៅជួរមុខសឹងតែគ្មានពេលចម្អិនអាហារនោះទេ ពេលប្រយុទ្ធជាមួយសត្រូវ ព្រោះមិនអាចងើបចេញពីលេណដ្ឋាន ប៉ុន្តែពេលដែលផ្អាកប្រយុទ្ធ និងត្រូវចម្អិនអាហារ ពេលខ្លះអាចនឹងគ្មានទឹកសម្រាប់ដាំបាយ ឬមានទឹកហើយតែចម្អិនមិនកើតថែមទៀត ដោយសារខ្លាចមានផ្សែងភ្លើងដែលងាយនឹងឱ្យសត្រូវចាប់ទីតាំងបាន។
លោកបន្ថែមថា ដើម្បីចៀសវាងមានផ្សែងភ្លើងពេលចម្អិនអាហារ ចង្ក្រានហ្គាស៍តូចសម្រាប់កងទ័ពជួរមុខប្រហែលជាមានភាពចាំបាច់ក្នុងកាលៈទេសៈនេះ។
អ្នកសង្កេតការណ៍រូបនេះបញ្ជាក់ថា អ្នកបរិច្ចាគ និងអ្នកប្រមូលស្បៀងសម្រាប់កងទ័ពជួរមុខក្នុងពេលនេះ ភាគច្រើនជាយុវជនដែលកើតក្រោយសម័យសង្គ្រាមកាលពីមុន ដូច្នេះពួកគេមិនយល់ច្បាស់ពីតម្រូវការចាំបាច់របស់កងទ័ពជួរមុខជ្រៅជ្រះនោះទេ។
លោកបញ្ជាក់ថា ការស្តាប់ពីតម្រូវការពិតរបស់វីរយុទ្ធជន និងការផ្សព្វផ្សាយពីតម្រូវការរបស់ពួកគេ គឺជារឿងសំខាន់បំផុតដើម្បីការរួបរួមសាមគ្គីគ្នារវាងសមរភូមិក្រោយ និងសមរភូមិមុខឱ្យក្លាយជាកម្លាំងដ៏រឹងមាំពិតប្រាកដក្នុងការការពារជាតិមាតុភូមិ។
ជម្លោះព្រំដែនកម្ពុជា-ថៃ រយៈពេល ៥ថ្ងៃ កាលពីចុងខែកក្កដា កន្លងទៅ កងទ័ពខ្មែរជួរមុខត្រូវគេមើលឃើញថាបានតស៊ូប្រយុទ្ធយ៉ាងស្វិតស្វាញក្រោមអាវុធធុនធ្ងន់ៗរបស់ថៃ ដែលបានបាញ់ស្រោចលើកម្ពុជា ដូចជា យន្តហោះទម្លាក់គ្រាប់បែក MK-84 ដ្រូនអត្តឃាត កាំភ្លើងត្បាល់ គ្រាប់បែកចង្កោម និងផ្សែងពុល ហើយកងទ័ពខ្មែរនៅតែអាចការពារទឹកដីរបស់ខ្លួនបានយ៉ាងមុតមាំ។
ដោយមើលឃើញពីការលះបង់សាច់ស្រស់ឈាមស្រស់របស់យុទ្ធជនជួរមុខក្នុងការការពារទឹកដី មូលនិធិ និងជំនួយដើម្បីជួយកងទ័ពជួរមុខ ត្រូវបានរៀបចំធ្វើឡើងនៅគ្រប់ទីកន្លែង មានទាំងលុយ និងសម្ភារៈប្រើប្រាស់ រួមទាំងអាហារទទួលទានផងដែរ ដែលកំពុងផ្តល់ទៅឱ្យកងទ័ពជួរមុខជាបន្តបន្ទាប់នៅពេលនេះ។
ជុំវិញបញ្ហានេះ កងទ័ពជួរមុខខ្លះបានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៦ សីហា នេះថា គ្រឿងឧបភោគបរិភោគភាគច្រើនគឺជាមីកញ្ចប់។
ប្រភពដដែលបន្តថា ពេលកងទ័ពបរិភោគមីកញ្ចប់ច្រើនថ្ងៃ ក៏បណ្តាលទៅជាក្តៅខ្លួន និងពិបាកបន្ទោបង់ទៅវិញ ដូច្នេះការផ្គត់ផ្គង់ជាអាហារផ្សេងក្រៅពីមីកញ្ចប់ ក៏គួរតែធ្វើឱ្យបានច្រើនដែរ។
ទាក់ទិននឹងការផ្តល់ស្បៀងដល់កងទ័ពនាពេលនេះ នាយករដ្ឋមន្ត្រីកម្ពុជា លោក ហ៊ុន ម៉ាណែត ព្រមានថា ក្នុងដំណាក់កាលផ្អាកការបាញ់ជាមួយថៃ កម្ពុជាមិនទាន់មានស្ថិរភាពនៅឡើយទេ ដូច្នេះរាល់ជំនួយផ្សេងៗសម្រាប់ជួយដល់ពលរដ្ឋភៀសសឹក កងទ័ពជួរមុខ យោធិនពលី និងយោធិនរងរបួស ជាដើម មិនអាចមានការធ្វេសប្រហែសឡើយ។
លោក ហ៊ុន ម៉ាណែត បញ្ជាក់ថា ជំនួយនានាអាចបន្តជញ្ជូនទៅកងទ័ពជួរមុខបាន ប៉ុន្តែមិនត្រូវឱ្យមានមន្ត្រីជាន់ខ្ពស់របស់រដ្ឋាភិបាល ឬមេទ័ព ឬមេបញ្ជាការភូមិភាគចូលរួមក្នុងពិធីផ្តល់ជំនួយទាំងនេះឡើយ ព្រោះយោធាថៃ កំពុងរង់ចាំឆ្មក់វាយប្រហារលើអ្នកទាំងនោះគ្រប់ពេលទាំងអស់៕
© 2025, ឌឹ ខេមបូឌា ដេលី. All rights reserved.