ប្រជាជនជប៉ុន រាប់ពាន់នាក់ នៅថ្ងៃពុធ ទី៦ ខែសីហា ឆ្នាំ២០២៥ បានមកជួបជុំគ្នានៅទីក្រុង Hiroshima ជាទីតាំងប្រវត្តិសាស្ត្រដំបូងគេនៃសោកនាដកម្មពីការទម្លាក់គ្រាប់បែកបរមាណូ បង្កឱ្យពលរដ្ឋជប៉ុន ចំនួន ៧ម៉ឺន ៨ពាន់នាក់ស្លាប់។
រហូតមកទល់ពេលនេះ គឺមានរយៈពេល ៨០ឆ្នាំគត់ គិតចាប់តាំងពីគ្រាប់បែកបរមាណូត្រូវបានកងទ័ពអាកាសអាមេរិក ទម្លាក់លើទីក្រុងមួយនេះកាលពីក្នុងសង្គ្រាមលោកលើកទី២។
បណ្ដាញផ្សាយព័ត៌មាន Aljazeera បានរម្លឹកថា កាលពីថ្ងៃទី៦ ខែសីហា ឆ្នាំ១៩៤៥ អំឡុងសង្គ្រាមលោកលើកទី២ ទីក្រុង Hiroshima បានរងការទម្លាក់គ្រាប់បែកបរមាណូដែលមានឈ្មោះថា Little Boy របស់កងទ័ពអាកាសសហរដ្ឋអាមេរិក បានបណ្តាលឱ្យមនុស្សប្រហែល ៧ម៉ឺន ៨ពាក់នាក់ស្លាប់មួយរំពេច ដោយមិនទាន់រាប់បញ្ចូលមនុស្សជាច្រើននាក់ផ្សេងទៀតដែលរងផលប៉ះពាល់ពីការសាយភាយសារធាតុវិទ្យុសកម្មរបស់គ្រាប់បែកបរមាណូនោះទេ។
រយៈពេល ៣ថ្ងៃក្រោយមក ទីក្រុងមួយទៀតនៃប្រទេសជប៉ុន គឺទីក្រុង Nagasaki ក៏បានរងការទម្លាក់គ្រាប់បែកបរមាណូរបស់កងទ័ពអាកាសអាមេរិកមួយគ្រាប់ផងដែរ។ គ្រាប់បែកបរមាណូទី២ របស់អាមេរិក បានផ្តាច់ជីវិតមនុស្ស ៧ម៉ឺន ៤ពាន់នាក់ និងរាប់ម៉ឺននាក់ផ្សេងទៀតបានរងផលប៉ះពាល់ដល់សុខភាពធ្ងន់ធ្ងរពីការសាយភាយវិទ្យុសកម្មនៃអាវុធប្រល័យលោកដ៏កំណាចមួយនេះ។
ទីបំផុត អាណាចក្រជប៉ុន បានប្រកាសចុះចាញ់សង្គ្រាមលោកលើកទី២ នៅថ្ងៃទី១៥ ខែសីហា ឆ្នាំ១៩៤៥។
ក្នុងព្រឹត្តិការណ៍នេះ តំណាងមកពីប្រទេសជាង ១២០ ក្នុងនោះមានទាំងមហាអំណាចនុយក្លេអ៊ែរដូចជាសហរដ្ឋអាមេរិកដែលជាម្ចាស់គ្រាប់បែកបរមាណូទម្លាក់លើទីក្រុង Hiroshima និងទីក្រុង Nagasaki ក៏ចូលរួមផងដែរ។
ពិធីរំលឹកខួប ៨០ឆ្នាំនៃសោកនាដកម្មបរមាណូ បានធ្វើឡើងក្នុងឧទ្យាននៃការចងចាំ ឬហៅថា ឧទ្យានចងចាំសន្តិភាព Hiroshima។
ក្នុងព្រឹត្តិការណ៍នេះ កុមារាកុមារីនៅទូទាំងប្រទេសជប៉ុន ក៏ចូលរួមផងដែរ តែក្នុងកម្មវិធីសន្យានៃសន្តិភាព។ កុមារទាំងនោះអានសេចក្ដីថ្លែងការណ៍ដោយពោលថា ក្ដីសង្ឃឹម និងការចងចាំ។
អភិបាលទីក្រុង Hiroshima លោក Kazumi Matsui បានអំពាវនាវឱ្យមេដឹកនាំពិភពលោកទាំងអស់ ចងចាំកុំភ្លេចនូវសោកនាដកម្មទីក្រុង Hiroshima និង Nagasaki។
លោកព្រមានអំពីផលវិបាកដែលពិភពលោកសព្វថ្ងៃកំពុងឆ្ពោះទៅរកការបង្កើនចំនួនក្បាលគ្រាប់នុយក្លេអ៊ែរដ៏ប្រល័យមួយនេះ។
អគ្គលេខាធិការអង្គការសហប្រជាជាតិ Antonio Guterres បានធ្វើសេចក្ដីថ្លែងការណ៍ចំហមួយដោយអំពាវនាវឱ្យពិភពលោក គេចឱ្យផុតពីសោកនាដកម្មអាវុធនុយក្លេអ៊ែរ ហើយទទូចថាពិភពលោកត្រូវតែមានសន្តិភាព។
អភិបាលទីក្រុង Hiroshima លោក Matsui ថ្លែងថា ៩០%នៃក្បាលគ្រាប់នុយក្លេអ៊ែររបស់ពិភពលោក កំពុងស្ថិតក្រោមការគ្រប់គ្រងរបស់សហរដ្ឋអាមេរិក និងរុស្ស៊ី។
ជប៉ុន ជាប្រទេសតែមួយគត់ដែលបានឆ្លងកាត់សោកនាដកម្មដោយការវាយប្រហារអាវុធបរមាណូ ឬអាវុធនុយក្លេអ៊ែរ។ យ៉ាងណា ប្រទេសអាស៊ីខាងកើតមួយនេះ បានអះអាងពីការប្ដេជ្ញាចិត្តក្នុងការលុបបំបាត់អាវុធនុយក្លេអ៊ែរ។
តើសង្គ្រាមលោកលើកទី២ ផ្ទុះឡើងដោយរបៀបណា?
សង្គ្រាមលោកលើកទី២ ផ្ទុះឡើងនៅថ្ងៃទី១ ខែកញ្ញា ឆ្នាំ១៩៣៩ ដល់ថ្ងៃទី២ ខែកញ្ញា ឆ្នាំ១៩៤៥ ទើបបានបិទជាស្ថាពរក្រោយពីអាណាចក្រជប៉ុន ប្រកាសចុះចាញ់ គឺក្រោយរយៈពេលជិតមួយខែនៃការទម្លាក់គ្រាប់បែកបរមាណូដោយកងទ័ពអាកាសអាមេរិកលើទីក្រុង Hiroshima និង Nagasaki។
ក្រោយពីចាញ់សង្គ្រាមលោកលើកទី១ នៅឆ្នាំ១៩១៨ Adolf Hitler មេដឹកនាំអាល្លឺម៉ង់ បានបង្កឱ្យផ្ទុះសង្គ្រាមលោកសាជាថ្មីដើម្បីសងសឹក ដោយចាប់ផ្ដើមពីការឈ្លានពានប្រទេសតូចៗនៅជិតខាង។
នៅថ្ងៃទី០១ ខែកញ្ញា ឆ្នាំ១៩៣៩ កងទ័ពអាល្លឺម៉ង់ បានបើកលុកលុយចូលប្រទេសប៉ូឡូញ ខណៈកងទ័ពអ៊ីតាលី បើកការវាយប្រហារចូលប្រទេសមួយចំនួនក្នុងតំបន់អាហ្វ្រិក។ រីឯកងទ័ពជប៉ុន ក៏បានបើកវាយលុកចូលប្រទេសកូរ៉េ និងប្រទេសចិន។
ប្រទេសបារាំង និងអង់គ្លេស ត្រូវបង្ខំចិត្តលូកដៃម្ដងទៀតដើម្បីការពារប្រទេសតូចៗដែលរងការឈ្លានពាន ហើយថែមទាំងបានអូសទាញសហរដ្ឋអាមេរិក និងសហភាពសូវៀត ឲ្យចូលរួមផងដែរ។
សហរដ្ឋអាមេរិក ជាប្រទេសមានគ្រាប់បែកបរមាណូមុនគេបង្អស់ដែលដឹកតាមយន្តហោះទៅទម្លាក់លើប្រទេសជប៉ុន បង្ខំឱ្យជប៉ុន ចុះចាញ់សង្គ្រាម បន្ទាប់ពី Adolf Hitler មេដឹកនាំអាល្លឺម៉ង់ ចុះចាញ់សង្គ្រាមនៅដើមខែឧសភា ឆ្នាំ១៩៤៥។
ទីបំផុត សង្គ្រាមលោកលើកទី២ ដែលចាប់ផ្ដើមនៅថ្ងៃទី១ ខែកញ្ញា ឆ្នាំ១៩៣៩ ត្រូវបានបិទបញ្ចប់នៅថ្ងៃទី២ ខែកញ្ញា ឆ្នាំ១៩៤៥។ វាក្លាយជាសង្គ្រាមបង្ហូរឈាមដ៏ធំបំផុតលើកទី២ នៅក្នុងប្រវត្តិសាស្ត្រមនុស្សជាតិ ដោយផ្ដាច់ជីវិតកងទ័ព និងជនស៊ីវិលជាង ៥០លាននាក់។
អ្វីដែលធ្វើឱ្យពិភពលោកបារម្ភ គឺបារម្ភពីការផ្ទុះសង្គ្រាមនុយក្លេអ៊ែរ ព្រោះតែអាវុធប្រល័យលោកនេះកំពុងតែបង្កើនការផលិតយ៉ាងខ្លាំង។
ប្រទេសចំនួន៩ ដែលមានក្បាលគ្រាប់នុយក្លេអ៊ែរ ឬគ្រាប់បែកបរមាណូ រួមមាន៖
- រុស្ស៊ី មានចំនួន ៥៤៤៩គ្រាប់
- អាមេរិក មាន ៥២៧៧គ្រាប់
- ចិន មាន ៦០០គ្រាប់ កើន ២៥០គ្រាប់
- បារាំង មាន ២៩០គ្រាប់
- ចក្រភពអង់គ្លេស មាន ២២៥គ្រាប់
- ឥណ្ឌា មាន ១៨០គ្រាប់ កើន ៣០គ្រាប់
- ប៉ាគីស្ថាន មាន ១៧០គ្រាប់ កើន ១៦គ្រាប់
- អ៊ីស្រាអែល មាន ៩០គ្រាប់
- និងកូរ៉េខាងជើង មាន ៥០គ្រាប់ កើន ១០គ្រាប់។
សរុបទៅ ពិភពលោកផ្ទុកក្បាលគ្រាប់បែកប្រល័យលោកដ៏កំណាចនេះមានចំនួន ១២៣៣១គ្រាប់៕
© 2025, ឌឹ ខេមបូឌា ដេលី. All rights reserved.