 ដោយផ្អែកលើមូលដ្ឋាននៃកិច្ចព្រមព្រៀងរវាងប្រទេសទាំងពីរ និងច្បាប់អន្តរជាតិ។){kind=link}
នាយករដ្ឋមន្ត្រីខ្មែរ លោក ហ៊ុន ម៉ាណែត ស្នើមិត្តចិន ឱ្យជួយជំរុញការដោះស្រាយបញ្ហាព្រំដែនដែលមិនទាន់ដាច់ស្រេចរវាងប្រទេសកម្ពុជា និងប្រទេសថៃ ដោយសន្តិវិធី តាមរយៈការប្រើប្រាស់យន្តការព្រំដែនដែលមានស្រាប់ គឺគណៈកម្មការចម្រុះព្រំដែនកម្ពុជា-ថៃ (JBC) ដោយផ្អែកលើមូលដ្ឋាននៃកិច្ចព្រមព្រៀងរវាងប្រទេសទាំងពីរ និងច្បាប់អន្តរជាតិ។
លោក ហ៊ុន ម៉ាណែត សរសេរលើទំព័រហ្វេសប៊ុករបស់ខ្លួននៅថ្ងៃទី១ កញ្ញា ថា លោកបានស្នើមិត្តចិន ឱ្យជួយជំរុញការដោះស្រាយបញ្ហាព្រំដែនដែលមិនទាន់ដាច់ស្រេចរវាងខ្មែរ និងថៃ ដោយជៀសវាងការប្រើប្រាស់កម្លាំងយោធា ជាពិសេសនៅតំបន់ដែលមានប្រជាពលរដ្ឋរស់នៅ។
នាយករដ្ឋមន្ត្រីខ្មែររូបនេះ បញ្ជាក់ថា ទាំងប្រធានាធិបតីចិន ស៊ី ជីនពីង និងប្រធានគណៈកម្មាធិការជាតិផ្នែកសន្និសីទប្រឹក្សានយោបាយប្រជាជនចិន លោក វ៉ាង ហ៊ូនិង សុទ្ធតែបានប្រកាសគាំទ្រប្រទេសកម្ពុជា ដោយឥតងាករេ ដើម្បីធ្វើឱ្យទំនាក់ទំនងរវាងប្រទេសចិន និងប្រទេសកម្ពុជា កាន់តែស៊ីជម្រៅថែមទៀត។ ប្រទេសចិន ក៏បានប្រកាសគាំទ្រដល់បទឈប់បាញ់គ្នារវាងកងទ័ពខ្មែរ និងកងទ័ពថៃ ក៏ដូចជាការគាំទ្រដល់មុខនាទីប្រទេសម៉ាឡេស៊ី ក្នុងការសម្របសម្រួលបទឈប់បាញ់គ្នា និងជំរុញឱ្យទំនាក់ទំនងរវាងប្រទេសកម្ពុជា និងប្រទេសថៃ ឆាប់វិលត្រឡប់ទៅរកប្រក្រតីភាពវិញ ព្រមទាំងប្ដេជ្ញាតាមដាន និងជួយដោះស្រាយបញ្ហានេះផងដែរ។
កិច្ចប្រជុំកំពូលនៃអង្គការសហប្រតិបត្តិការសៀងហៃបូកបន្ថែម បានប្រព្រឹត្តទៅកាលពីថ្ងៃទី៣០ ខែសីហា ដល់ថ្ងៃទី០១ ខែកញ្ញា ឆ្នាំ២០២៥ នៅទីក្រុងធានជីង សាធារណរដ្ឋប្រជាមានិតចិន ដែលមានការចូលរួមពីមេដឹកនាំ ២៥ប្រទេស ដូចជា រុស្ស៊ី ឥណ្ឌា ម៉ាឡេស៊ី ឡាវ វៀតណាម រួមទាំងកម្ពុជា ផងដែរ ប៉ុន្តែមិនមានវត្តមានមេដឹកនាំប្រទេសថៃ ឡើយ។ អង្គការសហប្រតិបត្តិការសៀងហៃ ហៅកាត់ថា SCO មានប្រទេសសមាជិក១០ ប្រទេសដៃគូសន្ទនា១៤ ប្រទេសសង្កេតការណ៍២ និងប្រទេសជាភ្ញៀវ៤។
ជុំវិញកិច្ចប្រជុំនេះ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មាននៅថ្ងៃទី១ កញ្ញា ថា ក្នុងជំនួបទ្វេភាគីរវាងនាយករដ្ឋមន្ត្រីកម្ពុជា លោក ហ៊ុន ម៉ាណែត ប្រធានាធិបតីចិន លោក ស៊ី ជីនពីង បានប្ដេជ្ញាបង្កើនកិច្ចសហប្រតិបត្តិការក្រោមក្របខ័ណ្ឌទ្វេភាគីកំណត់ក្នុងឆ្នាំ២០២៣ ហៅថាយុទ្ធសាស្ត្រឆកោណ។ គោលនយោបាយចំណងមិត្តភាពទ្វេភាគីដែលហៅដោយខ្លីមានកិច្ចសហប្រតិបត្តិការត្បូងពេជ្រ និងលម្ហផ្លូវអង្ករមច្ឆា។ សហប្រតិបត្តិការឈរលើគោលនយោបាយឆកោណ គឺ៖
- នយោបាយជួយគ្នាទៅវិញទៅមកលើផលប្រយោជន៍ស្នូលរៀងខ្លួន;
- សមត្ថភាពផលិតកម្ម ឧស្សាហកម្ម និងរោងចក្រ;
- កសិកម្ម ពង្រីកការបណ្ដាក់ទុនខាងកសិកម្ម និងពាណិជ្ជកម្ម;
- ពង្រីកកិច្ចសហការខាងវិស័យថាមពល;
- ពង្រឹងសន្តិសុខ ធ្វើសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន និងឧក្រិដ្ឋកម្មឆបោកតាមប្រព័ន្ធទូរគមនាគមន៍ online scams;
- វប្បធម៌ និងការផ្លាស់ប្ដូររវាងមនុស្ស និងមនុស្សទៅវិញទៅមកខាងទេសចរ យុវជន និងសារព័ត៌មាន។
ប្រភពដដែលបញ្ជាក់ថា លោក ស៊ី ជីនពីង ក៏បានប្រកាសផ្តល់ជំនួយមនុស្សធម៌ដល់ប្រទេសកម្ពុជា ដើម្បីគាំទ្រដល់ការកសាងឡើងវិញ និងការស្ដារជីវភាពសហគមន៍ដែលរងប៉ះពាល់ដោយជម្លោះប្រដាប់អាវុធរវាងប្រទេសកម្ពុជា និងប្រទេសថៃ កាលពីពេលថ្មីៗនេះថែមទៀត។
កាលពីថ្ងៃទី៧ ខែសីហា ឆ្នាំ២០២៥ សាធារណរដ្ឋប្រជាមានិតចិន បានចូលរួមសង្កេតការណ៍ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) ដែលត្រូវបានសម្របសម្រួលដោយនាយករដ្ឋមន្ត្រីប្រទេសម៉ាឡេស៊ី ក្រោមការផ្ដួចផ្ដើមគំនិតពីសហរដ្ឋអាមេរិក ដើម្បីជំរុញឲ្យមានកិច្ចព្រមព្រៀងបទឈប់បាញ់គ្នាក្នុងជម្លោះព្រំដែនខ្មែរ-ថៃ៕
© 2025, ឌឹ ខេមបូឌា ដេលី. All rights reserved.