សហមេធាវីការពារក្តីប្រធានគណបក្សសង្គ្រោះជាតិ លោក ចាន់ ចេន អំពាវនាវឱ្យមេដឹកនាំកម្ពុជា ទាំងមេដឹកនាំបក្សកាន់អំណាច លោក ហ៊ុន សែន និងនាយករដ្ឋមន្ត្រី លោក ហ៊ុន ម៉ាណែត សម្រុះសម្រួលជាមួយមេដឹកនាំបក្សប្រឆាំង លោក កឹម សុខា ដើម្បីសហការគ្នាដោះស្រាយបញ្ហាដែលបរទេសកំពុងឈ្លានពានទឹកដីខ្មែរក្នុងពេលនេះ។
លោក ចាន់ ចេន សរសេរលើគណនីហ្វេសប៊ុករបស់លោកនៅថ្ងៃទី៣ កញ្ញា នេះថា លោក កឹម សុខា ត្រូវបានកាត់ទោសពីបទក្បត់ជាតិ ដោយគប់គិតគ្នាជាមួយរដ្ឋបរទេស និងភ្នាក់ងារបរទេស ដែលក្នុងនោះក៏មានទាំងសហរដ្ឋអាមេរិកផងដែរ។
លោកបន្តថា ក្នុងពេលនេះ មេដឹកនាំកម្ពុជាកំពុងលើកតម្កើងលោកប្រធានាធិបតីអាមេរិក លោក ដូណាល់ ត្រាំ ដោយសារតែប្រធានាធិបតីរូបនេះបានជួយអន្តរាគមន៍ឲ្យមានបទឈប់បាញ់រវាងកម្ពុជា-ថៃ ដូច្នេះលោក កឹម សុខា ក៏មិនត្រូវបានចោទប្រកាន់ពីបទក្បត់ជាតិបន្តទៀតដែរ ដែលថាអាមេរិកជាមេខ្លោងនៅពីក្រោយនោះ។ លោកថា ពលរដ្ឋខ្មែរ សហគមន៍អន្តរជាតិ យល់ឃើញថា ការចោទប្រកាន់នេះស្ថិតក្រោមហេតុផលនយោបាយ ជាជាងការអនុវត្តច្បាប់។
អ្នកច្បាប់រូបនេះបញ្ជាក់ថា កន្លងមក សហមេធាវីការពារក្តី រួមទាំងលោក កឹម សុខា ផង បានបង្ហាញពីភាពស្អាតស្អំរបស់គាត់តាមរយៈសវនាការជាច្រើនលើកច្រើនសាតាំងពីសាលាដំបូង រហូតដល់សាលាឧទ្ធរណ៍ ប៉ុន្តែអស់រយៈពេល ៨ឆ្នាំមកហើយយុត្តិធម៌សម្រាប់លោក កឹម សុខា សហការី និងពលរដ្ឋខ្មែរដែលជាអ្នកគាំទ្រ ហាក់នៅឆ្ងាយដូចជើងមេឃ មើលមិនឃើញកោះត្រើយឡើយ។
កាលពីយប់ថ្ងៃទី០២ រំលងអាធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ លោក កឹម សុខា ត្រូវបានកងកម្លាំងចម្រុះសម្រុកចូលចាប់ខ្លួននៅក្នុងគេហដ្ឋានទាំងមានអភ័យឯកសិទ្ធិសភា បញ្ជូនទៅដាក់ពន្ធនាគារត្រពាំងផ្លុង ខេត្តត្បូងឃ្មុំ ទាំងយប់ តាមបញ្ជាមេដឹកនាំបក្សកាន់អំណាច លោក ហ៊ុន សែន ដែលបានចោទប្រកាន់ពីបទក្បត់ជាតិ។
ជុំវិញបញ្ហានេះ អតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា សរសេរលើគណនីហ្វេសប៊ុករបស់ខ្លួននៅថ្ងៃទី៣ កញ្ញា នេះថា ០៨ឆ្នាំហើយដែលលោក កឹម សុខា ត្រូវបាត់បង់នូវសេរីភាពដោយការចោទប្រកាន់មួលបង្កាច់ដែលមានចរិតនយោបាយ និងការកាត់ទោសទាំងអយុត្តិធម៌។
លោក មុត ចន្ថា លើកឡើងថា សហរដ្ឋអាមេរិកត្រូវបានតំណាងអយ្យការ និងក្រុមមេធាវីរដ្ឋាភិបាល ចោទប្រកាន់ថាជាមេខ្លោងនៅពីក្រោយលោក កឹម សុខា ក្នុងការផ្តល់ហិរញ្ញវត្ថុ និងរៀបចំផែនការ ដើម្បីធ្វើបដិវត្តន៍ដែលបង្កឱ្យមានភាពប្រទូសរ៉ាយ ឬការឈ្លានពានប្រទេសកម្ពុជា។
លោក មុត ចន្ថា លើកជាសំណួរថា តើសាធារណជនជាតិ និងអន្តរជាតិ បានឃើញសហរដ្ឋអាមេរិកចូលមកប្រទូសរ៉ាយ ឬឈ្លានពានកម្ពុជាដូចការចោទប្រកាន់របស់តំណាងអយ្យការ និងក្រុមមេធាវីរដ្ឋាភិបាលដែរឬទេ ប៉ុន្តែគេបែរជាឃើញប្រទេសថៃ កំពុងឈ្លានពានកម្ពុជាក្នុងពេលនេះទៅវិញ។
កាលពីថ្ងៃទី៣ ខែមីនា ឆ្នាំ២០២៣ សាលាដំបូងរាជធានីភ្នំពេញ បានប្រកាសសាលក្រមសម្រេចផ្ដន្ទាទោសលោក កឹម សុខា ឲ្យជាប់ពន្ធនាគាររយៈពេល ២៧ឆ្នាំ ដោយកំណត់ឲ្យឃុំខ្លួននៅក្នុងផ្ទះ និងត្រូវដកហូតសិទ្ធិមិនឲ្យធ្វើនយោបាយអស់មួយជីវិតថែមទៀត ពីបទក្បត់ជាតិ ដោយគប់គិតជាមួយសហរដ្ឋអាមេរិក៕
© 2025, ឌឹ ខេមបូឌា ដេលី. All rights reserved.