អាមេរិករកឃើញលុយរបស់លោក ចេន ហ្ស៊ី លាងសម្អាតក្រោមគម្រោងវិនិយោគរូបិយប័ណ្ណគ្រីបតូឈ្មោះថាកាប់ជ្រូកឆៅ

រដ្ឋអាជ្ញាអាមេរិក លាតត្រដាងលុយកខ្វក់រាប់ពាន់លានដុល្លាររបស់ប្រធានក្រុមហ៊ុន Prince Group លោក ចេន ហ្ស៊ី (Chen Zhi) ថាត្រូវបានលាងសម្អាតក្រោមការវិនិយោគតាមរយៈរូបិយប័ណ្ណគ្រីបតូ (Cryptocurrency Investment Fraud Scheme) ដែលមានឈ្មោះថា «Pig Butchering Scams» ដែលប្រែថា «កាប់ជ្រូកឆៅ»។

Pig Butchering Scams នេះ គឺជាក្បួននៃការបោកបញ្ឆោតតាមអនឡាញ ដោយបង្កើតទំនាក់ទំនងស្និទ្ធស្នាលជាមុន ទើបធ្វើការបោកប្រាស់តាមក្រោយ។ វិធីបោកប្រាស់នេះ ក្រុមឧក្រិដ្ឋជនធ្វើឱ្យជនរងគ្រោះស្រឡាញ់ និងជឿទុកចិត្ត បន្ទាប់មក ពួកគេបានបោកឱ្យជនរងគ្រោះវិនិយោគ ឬផ្ញើលុយជាជំហានៗ ប៉ុន្តែនៅពេលដែលជនរងគ្រោះជឿទុកចិត្តហើយនោះ ពួកគេនឹងបោកយកលុយទាំងអស់តែម្តង ឬបង្ខាំងជនរងគ្រោះទុករកលុយឱ្យពួកគេ ជាដើម។

រដ្ឋអាជ្ញាតុលាការសហព័ន្ធអាមេរិកនៅក្រុងញ៉ូវយ៉ក (New York) លោក Joseph Nocella Jr. បានបង្ហាញក្នុងពាក្យបណ្ដឹងដែលបានរឹបអូសទឹកប្រាក់ជាង ១៤ពាន់លានដុល្លាររបស់លោក ចេន ហ្ស៊ី (Chen Zhi) កាលពីថ្ងៃទី១៤ ខែតុលា នេះថា ក្រុមហ៊ុន Prince Group ក្រោមការដឹកនាំរបស់លោក ចេន ហ្ស៊ី ទទួលបានប្រាក់ចំណេញយ៉ាងច្រើនសន្ធឹកសន្ធាប់តាមរយៈការបោកប្រាស់តាមបណ្តាប្រទេសប្រមាណជា ៣០ នៅជុំវិញពិភពលោក។

ប្រភពដដែល អះអាងថា ចំនួនទឹកប្រាក់ទាំងអស់នេះត្រូវបានមេឧក្រិដ្ឋជន ចេន ហ្ស៊ី (Chen Zhi) លាងសម្អាតតាមរយៈប្រភពធំៗចំនួនពីរ ដែលប្រភពទី១ មាន ២២អាសយដ្ឋាន និងប្រភពទី២ មាន ២៧អាសយដ្ឋាន ហើយប្រភពទាំងពីរនេះ ត្រូវក្លែងបន្លំក្នុងការផ្ទេរប្រាក់ទៅអាសយដ្ឋានកណ្តាលរួមមួយ មុននឹងផ្ទេរប្រាក់ទាំងនោះទៅឱ្យលោក ចេន ហ្ស៊ី (Chen Zhi) វិញ។

បន្ទាប់ពីទទួលប្រាក់ដែលបានសម្អាត លោក ចេន ហ្ស៊ី បានផ្ទេរលុយទាំងនោះទៅរក្សាទុកក្នុងកាបូបលុយ (Wallets) ចំនួន ២៥កន្លែងផ្សេងទៀត ដែលត្រូវស្ថិតក្រោមរចនាសម្ព័ន្ធគ្រប់គ្រងចំនួន ១៣ទីតាំង ឬ ១៣ចង្កោម (១៣Clusters) ដែលចង្កោមនីមួយៗមានចំនួនកាបូបលុយ (wallet) ចាប់ពី ១កាបូប (១wallet) រហូតដល់ ៧កាបូប (៧wallets)។

ពាក្យបណ្ដឹងដដែលនេះ លើកឡើងថា ក្រុមហ៊ុន Prince Group បានធ្វើប្រតិបត្តិការឆបោកនេះនៅទូទាំងប្រទេសកម្ពុជា ដែលស្ថិតក្រោមផែនការក្លែងបន្លំការវិនិយោគរូបិយប័ណ្ណគ្រីបតូ និងគម្រោងក្លែងបន្លំជាច្រើនផ្សេងទៀតចាប់តាំងពីឆ្នាំ២០១៥ មក ដែលដំណើរការក្នុងនាមជាក្រុមហ៊ុនសាជីវកម្មរបស់កម្ពុជា។

ប្រភពដដែលឲ្យដឹងថា ក្រុមហ៊ុននេះបានធ្វើប្រតិបត្តិការលើការអភិវឌ្ឍអចលនទ្រព្យ សេវាកម្មហិរញ្ញវត្ថុ និងសេវាកម្មអ្នកប្រើប្រាស់ ជាដើម ហើយក្រោមគ្រោងការនេះ បានបណ្តាលឱ្យមានការខាតបង់លុយរាប់ពាន់លានដុល្លារដែលកំណត់គោលដៅលើពលរដ្ឋអាមេរិក និងមនុស្សនៅជុំវិញពិភពលោក។

ក្នុងពាក្យបណ្ដឹងនេះ បញ្ជាក់ថា ក្នុងគម្រោងការឆបោកនេះ លោក ចេន ហ្ស៊ី (Chen Zhi) បានប្រើប្រាស់សញ្ជាតិចំនួន៥ រួមមានសញ្ជាតិចិន កម្ពុជា វ៉ានូអាទូ លូសៀ និងសញ្ជាតិស៊ីប (Cyprus) ដោយធ្វើការចល័តការស្នាក់នៅក្នុងប្រទេសកម្ពុជា សិង្ហបុរី តៃវ៉ាន់ ហុងកុង និងចក្រភពអង់គ្លេស។

ជុំវិញបញ្ហានេះ ប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) លោក ឆៃ ស៊ីណារិទ្ធ បានអះអាងកាលពីថ្ងៃទី១៦ ខែតុលា នេះថា រយៈពេល ៤ខែចុងក្រោយក្នុងឆ្នាំ២០២៥ នេះ សមត្ថកិច្ចកម្ពុជា បានបញ្ជូនមុខសញ្ញាមេខ្លោង និងបក្ខពួកសរុប ៧៥នាក់ទៅតុលាការ និងបានឃាត់ខ្លួនជនសង្ស័យជាង ៣ពាន់នាក់ (៣៤០០នាក់) ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា។

យ៉ាងណាក៏ដោយ គេនៅមិនទាន់ឃើញរាជរដ្ឋាភិបាលកម្ពុជា ជាពិសេសក្រសួងមហាផ្ទៃ ប្រតិកម្មតបជុំវិញវិធានការរបស់ក្រសួងយុត្តិធម៌អាមេរិក ដែលបានរកឃើញការឆបោកតាមប្រព័ន្ធបច្ចេកវិទ្យានៅកម្ពុជា ពាក់ព័ន្ធនឹងអ្នកឧកញ៉ា ចេន ហ្ស៊ី ដែលជាទីប្រឹក្សាប្រធានព្រឹទ្ធសភា លោក ហ៊ុន សែន នៅឡើយទេ រហូតដល់ពេលនេះ។

សារព័ត៌មាន The Cambodia Daily មិនទាន់អាចទាក់ទងអ្នកនាំពាក្យក្រសួងមហាផ្ទៃ លោក ទូច សុខៈ ដើម្បីសុំការបំភ្លឺពីបញ្ហានេះបាននៅឡើយដែរ រហូតដល់ម៉ោងផ្សាយនេះ៕

អាមេរិករកឃើញលុយរបស់លោក ចេន ហ្ស៊ី លាងសម្អាតក្រោមគម្រោងវិនិយោគរូបិយប័ណ្ណគ្រីបតូឈ្មោះថាកាប់ជ្រូកឆៅ

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

មន្រ្តីបក្សកាន់អំណាចថា ការងារស្វែងរកការដោះលែង លោក កឹម សុខា បានចំណាយពេលអស់ជិត៣ឆ្នាំ

ប្រមុខរដ្ឋស្តីទី លោក ហ៊ុន សែន លើកលែងទោស អតីតមេបក្សប្រឆាំង លោក កឹម សុខា ប៉ុន្តែចាក់សោនយោបាយ

ព្រឹទ្ធសភាកម្ពុជា អនុម័តទាំងស្រុងសេចក្តីព្រាងច្បាប់ស្តីពី «កាតព្វកិច្ចយោធា»

លោក ហ៊ុន សែន ឆ្ងល់ថាតើថៃកំពុងធ្វើអន្តរជាតូបនីយកម្មលើតំបន់សមុទ្រត្រួតស៊ីគ្នាជាមួយកម្ពុជាឬយ៉ាងណា?

អាជ្ញាធរមានសមត្ថកិច្ចខ្មែរ និងកូរ៉េខាងត្បូង ធ្វើសហប្រតិបត្តិការកម្ចាត់បទល្មើសឆបោកតាមអនឡាញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន