នាយករដ្ឋមន្ត្រីខ្មែរ លោក ហ៊ុន ម៉ាណែត អះអាងថា ក្នុងពេលឆាប់ៗខាងមុខនេះ កម្ពុជានឹងចុះកិច្ចព្រមព្រៀងសន្តិភាពជាមួយថៃ ដោយជ្រើសរើសវិធីសាស្ត្រសន្តិភាពសម្រាប់ការដោះស្រាយចំពោះប្រទេសជាប់ព្រំដែនជាមួយគ្នា ដើម្បីជៀសវាងការប្រើប្រាស់កម្លាំងកងទ័ពបន្តទៀត។
លោក ហ៊ុន ម៉ាណែត លើកឡើងក្នុងពិធីសម្ពោធអាកាសយានដ្ឋានអន្តរជាតិក្រុងតាខ្មៅ ឬអាកាសយានដ្ឋានអន្តរជាតិតេជោជាផ្លូវការ នៅថ្ងៃទី២០ ខែតុលា ឆ្នាំ២០២៥ នេះថា កម្ពុជាថ្លែងអំណរគុណដល់ប្រធានាធិបតីអាមេរិក លោក ដូណាល់ ត្រាំ ភាគីចិន និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលផ្ដួចផ្ដើមឱ្យមានបទឈប់បាញ់រវាងកម្ពុជា-ថៃ ព្រមទាំងតាមដានជាប់ពីស្ថានការណ៍ព្រំដែនកម្ពុជា និងថៃ យ៉ាងយកចិត្តទុកដាក់រហូតមក។
លោក ហ៊ុន ម៉ាណែត អះអាងថា កម្ពុជាប្រកាន់យកនូវអភិក្រមចំនួន៣ ដើម្បីដោះស្រាយបញ្ហាព្រំដែនជាមួយប្រទេសថៃ ដូចជា ការទប់ស្កាត់ជម្លោះកុំឱ្យរីករាលដាល ការកាត់បន្ថយផលប៉ះពាល់ និងការស្ដារនូវស្ថានការណ៍ឡើងវិញផងដែរ ព្រោះសង្គ្រាមគ្មានអ្នកឈ្នះ គ្មានអ្នកចាញ់ទេ គឺមានតែអ្នកស្លាប់ទាំងសងខាង។
លោកបន្តថា ជាជាងការសួរមកកាន់រដ្ឋាភិបាលថា តើកន្លែងណាបាត់ កន្លែងណាបាន មេទ័ពខ្មែរណាស្លាប់ មេទ័ពខ្មែរណារស់ ពលរដ្ឋខ្មែរត្រូវទុកចិត្តលើរឿងតែមួយគត់ គឺថាកងកម្លាំងកម្ពុជាបានលះបង់អាយុជីវិត សាច់ស្រស់ ឈាមស្រស់ ដើម្បីការពារទឹកដី និងទុកចិត្តលើរដ្ឋាភិបាលក្នុងការដោះស្រាយបញ្ហានេះដោយសន្តិវិធី ដើម្បីកុំឱ្យមានសង្គ្រាម។
នាយករដ្ឋមន្ត្រីខ្មែររូបនេះ បញ្ជាក់ថា កម្ពុជាគ្មានបំណងរំលោភលើអធិបតេយ្យ ឬបូរណភាពទឹកដីរបស់អ្នកណាទេ ហើយក៏មិនឱ្យគេរំលោភទឹកដីកម្ពុជាដែរ ប៉ុន្តែការដោះស្រាយត្រូវប្រកាន់យកវិធីសាស្ត្រសន្តិវិធី សន្តិភាពតាមរយៈយន្តការទ្វេភាគី ឬយន្តការផ្លូវតុលាការ ជៀសវាងប្រើប្រាស់កម្លាំងទ័ពច្បាំងតទល់គ្នា។
កាលពីថ្ងៃទី១៤ ខែតុលា កាសែត South China Morning Post បានស្រង់សម្ដីរដ្ឋមន្ត្រីការបរទេសម៉ាឡេស៊ី លោក មហាម៉េដ ហាស់សាន (Mohamad Hasan) ថា ប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើជាអធិបតីក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ អំឡុងកិច្ចប្រជុំកំពូលអាស៊ាន ចន្លោះពីថ្ងៃទី២៦ ដល់ថ្ងៃទី២៨ ខែតុលា ឆ្នាំ២០២៥ នេះ។
ក្រុមអ្នកឃ្លាំមើល ក្រុមអ្នកវិភាគ ក្រុមអ្នកសង្កេតការណ៍ និងក្រុមមន្ត្រីបក្សប្រឆាំងមួយចំនួន លើកឡើងថា កិច្ចព្រមព្រៀងនេះគឺជាការដោះដូរអធិបតេយ្យជាតិខ្មែរជាមួយថៃ ដើម្បីរក្សាសន្តិភាពក្លែងក្លាយ និងអំណាចរបស់អ្នកដឹកនាំខ្មែរតែប៉ុណ្ណោះ។
យ៉ាងណាក៏ដោយ កាលពីថ្ងៃទី១៩ ខែតុលា ឆ្នាំ២០២៥ លោក ហ៊ុន ម៉ាណែត បានចេញមកបញ្ជាក់លើទំព័រហ្វេសប៊ុករបស់ខ្លួនថា កម្ពុជាមិនបានឯកភាពលើកិច្ចព្រមព្រៀងណាមួយដែលនឹងធ្វើឱ្យបាត់បង់ដែនអធិបតេយ្យភាព និងបូរណភាពទឹកដីស្របច្បាប់របស់កម្ពុជាឡើយ ទាំងកិច្ចព្រមព្រៀងបទឈប់បាញ់ និងកិច្ចព្រមព្រៀងសន្តិភាព ដែលគ្រោងចុះហត្ថលេខានៅពេលខាងមុខនេះ៕
© 2025, ឌឹ ខេមបូឌា ដេលី. All rights reserved.