មន្ត្រីជាន់ខ្ពស់នៃរាជរដ្ឋាភិបាលកម្ពុជា ទម្លាយថា គម្រោងព្រែកជីកហ្វូណន កំពុងស្ថិតក្នុងដំណាក់កាលប្រទាញប្រទង់របស់មន្ត្រីកំពូលៗនៃគណបក្សប្រជាជនកម្ពុជា ព្រោះមួយផ្នែកស្របតាមវៀតណាម មិនគាំទ្រគម្រោងនេះទេ ប៉ុន្តែមួយផ្នែកទៀតរក្សាជំហរនៅជាមួយចិន បន្តសាងសង់ព្រែកជីកនេះឱ្យបានសម្រេច។
មន្ត្រីជាន់ខ្ពស់ក្នុងជួរបក្សកាន់អំណាច ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពផ្ទាល់ខ្លួន នៅថ្ងៃទី២២ តុលា នេះថា មន្ត្រីកំពូលៗរបស់គណបក្សប្រជាជនកម្ពុជាមួយផ្នែកដែលមាននិន្នាការទៅរកវៀតណាម មិនគាំទ្រគម្រោងនេះទេ ប៉ុន្តែមន្ត្រីភាគច្រើនដែលមាននិន្នាការទៅរកចិន បាននាំគ្នាគាំទ្រការអនុវត្តគម្រោងនេះឱ្យបានជោគជ័យ។
ប្រភពដដែល អះអាងថា ប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា និងជាអនុប្រធានគណបក្សប្រជាជនកម្ពុជា អ្នកស្រី ម៉ែន សំអន មានជំហរទៅរកវៀតណាម ច្រើនជាងប្រធានគណបក្សប្រជាជនកម្ពុជា លោក ហ៊ុន សែន ដែលមានជំហរទៅរកចិន ដើម្បីអនុវត្តការសាងសង់ព្រែកជីកមួយនេះឱ្យបានសម្រេច។
មន្ត្រីផ្ទៃក្នុងបក្សកាន់អំណាចដដែលរូបនេះ បញ្ជាក់ថា ការដោះស្រាយបញ្ហាជាមួយពលរដ្ឋដែលរងផលប៉ះពាល់ពីគម្រោងនេះ មិនមែនជាការលំបាកសម្រាប់រដ្ឋាភិបាលទេ ប៉ុន្តែការដោះស្រាយបញ្ហាផ្ទៃក្នុងទៅវិញទេ ដែលធ្វើឱ្យគម្រោងនេះមានការយឺតយ៉ាវ និងពន្យារពេលនៃការសាងសង់ជាបន្តបន្ទាប់មកនេះ។
អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម ត្រូវបានអង្គភាពសារព័ត៌មានដែលស្និទ្ធនឹងរដ្ឋាភិបាល Fresh News ស្រង់សម្ដីចុះផ្សាយនៅថ្ងៃទី២២ តុលា នេះថា រយៈពេលជាង ១ឆ្នាំនៃការចាប់ផ្តើមគម្រោងសាងសង់ព្រែកជីកហ្វូណនតេជោ មកទល់នឹងពេលនេះ កំពុងស្ថិតក្នុងដំណាក់កាលវាស់វែង និងដោះស្រាយផលប៉ះពាល់ជាមួយពលរដ្ឋ ដែលត្រូវអនុវត្តក្រោមយន្តការដោះស្រាយរបស់រាជរដ្ឋាភិបាល។
លោកអះអាងថា មកដល់ពេលនេះ ក្រុមការងារដោះស្រាយផលប៉ះពាល់កំពុងធ្វើសកម្មភាពនៅកំណាត់ទី២ ក្នុងខេត្តកណ្តាល ដោយបានអង្កេត វាស់វែង និងចងក្រងទិន្នន័យអំពីផលប៉ះពាល់លម្អិតលើសំណង់ លំនៅឋាន និងដីស្រែក្នុងស្រុកកោះធំ ខណៈក្រុមការងារក៏បានរៀបចំវេទិកាពិភាក្សា និងការសម្របសម្រួល សម្ភាស ព្រមទាំងផ្ដិតមេដៃពលរដ្ឋដែលរងផលប៉ះពាល់ជាបន្តបន្ទាប់ផងដែរ។
លោក ផន រឹម បញ្ជាក់ថា គម្រោងនេះនឹងជួយកម្ពុជា ឱ្យសម្រេចចក្ខុវិស័យរបស់រាជរដ្ឋាភិបាលជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០ ព្រមទាំងបង្កើនការតភ្ជាប់បណ្ដាញដឹកជញ្ជូនតាមផ្លូវទឹក និងផ្លូវសមុទ្រឱ្យកាន់តែទូលំទូលាយថែមទៀត។
នាយករដ្ឋមន្ត្រីកម្ពុជា លោក ហ៊ុន ម៉ាណែត បានប្រកាសបើកការដ្ឋានសាងសង់គម្រោងសាងសង់ព្រែកជីកហ្វូណនតេជោជាផ្លូវការ កាលពីថ្ងៃទី៥ ខែសីហា ឆ្នាំ២០២៤ ខណៈគម្រោងនេះរំពឹងថានឹងត្រូវបានស្ថាបនារួចរាល់នៅអំឡុងឆ្នាំ២០២៨ ខាងមុខ។
ជុំវិញបញ្ហានេះ កាលពីថ្ងៃទី០៦ ខែមិថុនា ឆ្នាំ២០២៤ លោក ហ៊ុន ម៉ាណែត អះអាងថា មានពលរដ្ឋចំនួន ១៥០គ្រួសារដែលរងនូវផលប៉ះពាល់ពីការសាងសង់ព្រែកជីកនេះ ប៉ុន្តែពលរដ្ឋទាំងនោះបានផ្តល់ដីរបស់ពួកគាត់ដល់រដ្ឋាភិបាល ជាថ្នូរសុំឱ្យរដ្ឋាភិបាលសាងសង់ផ្លូវបេតុងជូនពួកគាត់វិញ។
គម្រោងព្រែកជីកហ្វូណនតេជោ ត្រូវបានសាងសង់ក្រោមកម្ចីចិនប្រមាណជា ១៧០០លានដុល្លារ ក្រោមទម្រង់ Build-Operate-Transfer ឬហៅថា BOT ជាមួយក្រុមហ៊ុនចិន។ ទម្រង់ BOT មានន័យថា សាងសង់រួច ម្ចាស់ទុនគ្រប់គ្រងកាន់កាប់ចាត់ចែង ប្រមូលចំណូលរហូតចប់កិច្ចសន្យារយៈពេល ៥០ឆ្នាំ ទើបប្រគល់ឱ្យម្ចាស់ប្រទេសគ្រប់គ្រងតាមក្រោយ។
ជុំវិញគម្រោងនេះ កាលពីដើមខែធ្នូ ឆ្នាំ២០២៣ កន្លងទៅ មេដឹកនាំសំខាន់ៗរបស់វៀតណាម ធ្លាប់បានព្រមាននៅក្នុងដំណើរទស្សនកិច្ចរបស់លោក ហ៊ុន ម៉ាណែត ទៅកាន់ប្រទេសវៀតណាម ថា ព្រែកជីកហ្វូណន នឹងធ្វើឱ្យប៉ះពាល់ដល់បរិស្ថាន អេកូឡូស៊ី និងជម្រកធម្មជាតិសម្រាប់ជីវចម្រុះក្នុងទន្លេមេគង្គទៅថ្ងៃមុខ ប៉ុន្តែការព្រមាននេះ ត្រូវបានលោក ហ៊ុន ម៉ាណែត ទាត់ចោលទាំងស្រុង៕
© 2025, ឌឹ ខេមបូឌា ដេលី. All rights reserved.