រដ្ឋាភិបាលប្រទេសថៃ ច្រានចោលការចោទប្រកាន់ពីនាយករដ្ឋមន្ត្រី ហ៊ុន ម៉ាណែត ដែលថាយោធាថៃ កំពុងកាន់កាប់ចូលជ្រៅក្នុងទឹកដីប្រទេសកម្ពុជាដោយខុសច្បាប់ ដោយពន្យល់ថា ការរក្សាកងកម្លាំង និងការដាក់កុងតឺន័រ និងលួសបន្លានៅតំបន់មានជម្លោះ គឺជាវិធានការសន្តិសុខបណ្ដោះអាសន្នស្របតាមកិច្ចព្រមព្រៀងបទឈប់បាញ់ និងជាសិទ្ធិការពារខ្លួន យោងតាមច្បាប់អន្តរជាតិតែប៉ុណ្ណោះ។
កាសែតថៃ The Nation បានស្រង់សម្ដីអ្នកនាំពាក្យកងទ័ពថៃ ឧត្ដមសេនីយ៍ទោ វិនថៃ សុវ៉ារី នៅថ្ងៃទី១៩ កុម្ភៈ នេះ ដែលឆ្លើយតបវិញថា ដីមានជម្លោះដែលយោធាថៃ កំពុងកាន់កាប់នោះ គឺជាទឹកដីរបស់ថៃ ពីមុន ហើយថៃ អនុញ្ញាតឱ្យជនជាតិខ្មែរភៀសខ្លួនបានស្នាក់នៅទីនោះកាលពីសម័យមានចម្បាំងខាងស្រុកខ្មែរ គឺជាការរំលោភចូលទឹកដីថៃ ដោយខុសច្បាប់។
លោកថា ជនភៀសខ្លួនរួមទាំងអតីតយុទ្ធជនតស៊ូជាយដែនទាំងនោះ ពេលចប់ចម្បាំងមិនត្រឡប់ទៅស្រុកវិញ ហើយថែមទាំងកាន់តែពង្រីកភូមិឋាន ដែលចូលយកទីកន្លែងក្នុងទឹកដីប្រទេសថៃ។
អ្នកនាំពាក្យកងទ័ពថៃ រូបនេះ បញ្ជាក់ថា ភាគីថៃ បានតវ៉ាជាច្រើនដងហើយថាពលរដ្ឋខ្មែរទាំងនោះមិនមែនជាជនភៀសខ្លួន ឬជនផ្លាស់ទីលំនៅឡើយ ដែលការវាតទីលំនៅនោះប៉ះពាល់ដល់ជីវភាពប្រជារាស្ត្រថៃ ព្រោះចូលទៅទីនោះមិនបាន។
ភាគីថៃ និយាយថា គេបានត្រៀមខ្លួនចូលចរចាជម្លោះព្រំដែនជាមួយកម្ពុជាហើយ ប៉ុន្តែត្រូវមានលក្ខខណ្ឌជាមុន ដូចជា ការបន្ថយភាពតានតឹងយោធា ការដោះមីន និងរង់ចាំការបង្កើតរដ្ឋាភិបាលថ្មីរបស់ថៃ ផងដែរ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ សរសេរលើគណនីហ្វេសប៊ុករបស់ខ្លួននៅថ្ងៃទី១៩ កុម្ភៈ នេះថា ជម្លោះរឿងទឹកដីកម្ពុជា-ថៃ អាចនឹងផ្ទុះឡើងវិញឆាប់ៗនៅពេលដែលថៃ ចាញ់សង្គ្រាមការទូតប្រទេសកម្ពុជា។
លោកបន្ថែមថា ទោះជាសង្គ្រាមត្រូវផ្ទុះឡើងវិញក៏ដោយ ក៏មេដឹកនាំកម្ពុជាត្រូវតែជាមេដឹកនាំខ្លាំង និងក្លាហាន ទើបអាចដឹកនាំកម្ពុជាទៅមុខ និងអាចការពារទឹកដីពីសត្រូវ។
លោកបញ្ជាក់ថា ពេលខ្មែររួបរួមសាមគ្គីគ្នា ខ្មែរនឹងខ្លាំង តែបើខ្មែរបែកបាក់ ខ្មែរនឹងខ្សោយ ដូច្នេះកម្លាំងសាមគ្គីជាតិ ត្រូវតែប្រមូលផ្ដុំជាបន្ទាន់ តាមរយៈការធ្វើសម្បទានសន្តិភាពផ្ទៃក្នុងជាតិរវាងខ្មែរនិងខ្មែរ ព្រោះថា ថៃនឹងមិនព្រមចុះចាញ់ខ្មែរឡើយ៕
© 2026, ឌឹ ខេមបូឌា ដេលី. All rights reserved.