 ថាកម្ពុជាមិនទទួលស្គាល់ដាច់ខាតនូវទឹកដីខ្មែរដែលថៃ បានឈ្លានពានយ៉ាងជ្រៅយកទៅកាន់កាប់ដោយខុសច្បាប់ ទោះទឹកដីទាំងនោះត្រូវថៃ គ្រប់គ្រងក៏ដោយ ក៏នៅតែជាដែនដីស្របច្បាប់របស់កម្ពុជាដែរ។){kind=link}
នាយករដ្ឋមន្ត្រីខ្មែរលោក ហ៊ុន ម៉ាណែត ប្រាប់ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ថាកម្ពុជាមិនទទួលស្គាល់ដាច់ខាតនូវទឹកដីខ្មែរដែលថៃ បានឈ្លានពានយ៉ាងជ្រៅយកទៅកាន់កាប់ដោយខុសច្បាប់ ទោះទឹកដីទាំងនោះត្រូវថៃ គ្រប់គ្រងក៏ដោយ ក៏នៅតែជាដែនដីស្របច្បាប់របស់កម្ពុជាដែរ។
រដ្ឋមន្ត្រីប្រតិភូអមនាយករដ្ឋមន្ត្រី លោក តាន់ ហ្សង់ ហ្វ្រង់ស័រ បានលើកឡើងក្នុងសន្និសីទសារព័ត៌មានក្រោយពីដំណើរទស្សនកិច្ចរបស់នាយករដ្ឋមន្ត្រីកម្ពុជានៅសាធារណរដ្ឋបារាំង នៅថ្ងៃទី៩ មេសា នេះថា លោក ហ៊ុន ម៉ាណែត បានលើកឡើងនូវលក្ខខណ្ឌចំនួនបីរបស់កម្ពុជា ប្រាប់ប្រធានាធិបតីបារាំង។
លោកថា ទី១ កម្ពុជានឹងប្រាប់ពិភពលោកពីការពិតនៃការឈ្លានពានរបស់ថៃ មកលើកម្ពុជា ដែលមានន័យថា កម្ពុជានឹងមិនពង្រីកការពិត ឬក៏បំព្រួញការពិតពីបញ្ហានេះឡើយ។ ចំណែកទី២ កម្ពុជាមិនទទួលស្គាល់ដាច់ខាតនូវទឹកដីដែលថៃ បានឈ្លានពានយ៉ាងជ្រៅយកទៅកាន់កាប់ដោយខុសច្បាប់សព្វថ្ងៃនេះ ព្រោះថាទោះទឹកដីទាំងនោះត្រូវថៃ គ្រប់គ្រងក៏ដោយ ក៏នៅតែជាដែនដីស្របច្បាប់របស់កម្ពុជាដែរ។ ដោយឡែកទី៣ កម្ពុជានៅតែបន្តរក្សាជំហរដោះស្រាយបញ្ហានេះតាមច្បាប់អន្តរជាតិ និងកិច្ចព្រមព្រៀងនានាដែលភាគីទាំងពីរបានឯកភាពគ្នារហូតមក។
លោក តាន់ ហ្សង់ ហ្វ្រង់ស័រ លើកឡើងថា ពិតមែនតែលោក ហ៊ុន ម៉ាណែត មិនបានស្នើឱ្យប្រធានាធិបតីបារាំង គាំទ្រនយោបាយ ឬកាន់ជើងខាងកម្ពុជាសម្រាប់ដោះស្រាយជម្លោះព្រំដែនជាមួយថៃ ប៉ុន្តែគាត់បានស្នើឱ្យបារាំង លើកកម្ពស់គោលការណ៍អន្តរជាតិ ពោលគឺការគោរពច្បាប់អន្តរជាតិ និងបូរណភាពទឹកដីនៃបណ្តាប្រទេសនានានៅលើពិភពលោក ដែលគោលការណ៍នេះក៏ស្របទៅនឹងគោលការណ៍របស់កម្ពុជាដែរ។
មន្ត្រីរដ្ឋាភិបាលរូបនេះបញ្ជាក់ថា មូលហេតុដែលនាយករដ្ឋមន្ត្រីកម្ពុជា លោក ហ៊ុន ម៉ាណែត មិនស្នើសុំការគាំទ្រពីបារាំង ចំពោះបញ្ហានេះ ដោយសារមានការអន្តរាគមន៍របស់អាមេរិក ចិន និងយន្តការរបស់អាស៊ានសម្រាប់ដោះស្រាយបញ្ហានេះរួចស្រេចទៅហើយ ដែលជួយឱ្យមានបទឈប់បាញ់រវាងប្រទេសទាំងពីរនាពេលកន្លងមកនោះ។
ក្រោយពីសង្គ្រាមជាមួយប្រទេសថៃ រដ្ឋាភិបាលកម្ពុជា បានចោទថា កងកម្លាំងថៃ បានឈ្លានពានចូលកាន់កាប់ទឹកដីខ្មែរយ៉ាងជ្រៅដោយរំលោភលើច្បាប់អន្តរជាតិ ទោះមានកិច្ចអន្តរាគមន៍ពីអាមេរិក និងចិន រួមទាំងយន្តការរបស់អាស៊ានក៏ដោយ។
ជុំវិញបញ្ហានេះ ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មានកាលពីថ្ងៃទី៥ ខែមេសា ឆ្នាំ២០២៦ នេះថា កងកម្លាំងថៃ បានចូលកាន់កាប់ និងឈូសឆាយទឹកដីកម្ពុជាតាមបណ្តោយព្រំដែនជាបន្តបន្ទាប់។ ជាក់ស្តែង ពួកគេបានរាយលួសបន្លាចូលទឹកដីខ្មែរក្នុងខេត្តព្រះវិហារ កាលពីពេលថ្មីៗនេះ ប្រវែងប្រមាណ ១០០ម៉ែត្របន្ថែមទៀត។
ក្រសួងការបរទេសកម្ពុជា បញ្ជាក់ថា កម្ពុជាប្ដេជ្ញាចិត្តឥតងាករេក្នុងការដោះស្រាយវិវាទព្រំដែនជាមួយប្រទេសថៃ តាមរយៈមធ្យោបាយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីនានា ព្រោះកម្ពុជាមិនទទួលស្គាល់នូវបន្ទាត់ព្រំដែន ឬការទាមទារដែនដីដោយឯកតោភាគីពីប្រទេសថៃ ឡើយ។
ជុំវិញបញ្ហានេះ អភិបាលខេត្តពោធិ៍សាត់ លោក ខូយ រីដា បានអះអាងកាលពីពេលថ្មីៗនេះថា ទាហានថៃ កំពុងគ្រប់គ្រងទឹកដីខ្មែរចំនួន ៤តំបន់នៅខេត្តពោធិ៍សាត់ រួមមាន តំបន់ច១ តំបន់អូរភ្លុកដំរី តំបន់ស្ពានជ័យជម្នះ (តំបន់ស្ពានមេទឹក) និងតំបន់ច្រកព្រំដែនជ័យជម្នះ ឬច្រក៥៦ (ថ្មដា) ដែលក្នុងនោះក៏មានតំបន់សេដ្ឋកិច្ចពិសេសរបស់កម្ពុជាដែរ។
ចំណែកអភិបាលខេត្តបន្ទាយមានជ័យ លោក អ៊ុំ រាត្រី កាលពីថ្ងៃទី២៣ ខែកុម្ភៈ បានអះអាងថា យោធាថៃ បានរាយលួសបន្លាព័ទ្ធយកដីខ្មែរក្នុងខេត្តបន្ទាយមានជ័យ ចំនួន ៣តំបន់ ដែលមាន ២០ទីតាំង ដោយដាក់ពង្រាយលួសបន្លា និងទូកុងតឺន័រជាង ១០០ទូ (១០៥ទូ) ដែលគិតជាផ្ទៃដីសរុបមានទំហំជិត ៨០០ហិកតា (៧៦៣ហិកតា)។
លោក អ៊ុំ រាត្រី បញ្ជាក់ថា តំបន់ផ្សេងទៀតដែលស្ថិតក្នុងខេត្តជាប់ព្រំដែនថៃ ក៏ត្រូវយោធាថៃ ធ្វើសកម្មភាពព័ទ្ធយកដីខ្មែរដូចគ្នាដែរ គឺសាងសង់លេណដ្ឋានថ្មី ពង្រាយទូកុងតឺន័រ រាយលួសបន្លា ជីកប្រឡាយ និងសាងសង់រូបសំណាក ជាដើម៕
© 2026, ឌឹ ខេមបូឌា ដេលី. All rights reserved.