រដ្ឋាភិបាលកម្ពុជា ស្នើសុំឱ្យដៃគូអន្តរជាតិជួយ ដោយសារខ្លួនកំពុងប្រឈមនឹងឧបសគ្គក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាយ៉ាងធ្ងន់ធ្ងរ ខណៈការប្រព្រឹត្តបទល្មើសមានបច្ចេកវិទ្យាខ្ពស់ និងស្មុគស្មាញសម្រាប់កម្ពុជា។
ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានកាលពីថ្ងៃទី៨ មេសា ដែលទើបនឹងត្រូវបានផ្សព្វផ្សាយនៅថ្ងៃទី៩ មេសា ថា ប្រធានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ បានស្នើឱ្យដៃគូអន្តរជាតិជួយគាំទ្រផ្នែកបច្ចេកទេស ការចែករំលែកព័ត៌មានក្នុងការបង្ក្រាបការឆបោកតាមប្រព័ន្ធបច្ចេកវិទ្យា ខណៈដែលការប្រព្រឹត្តបទល្មើសមានបច្ចេកវិទ្យាខ្ពស់ និងស្មុគស្មាញសម្រាប់កម្ពុជា នាពេលនេះ។
ប្រភពដដែលអះអាងថា ប្រទេសកម្ពុជាកំពុងប្រឈមនឹងការពង្រឹងសមត្ថភាពរបស់ខ្លួនដើម្បីដោះស្រាយវិធីសាស្ត្រឧក្រិដ្ឋកម្មដែលកំពុងវិវត្ត រួមមាន ការប្រើប្រាស់បញ្ញាសិប្បនិម្មិត ប្រព័ន្ធកូដនីយកម្ម (encrypted platforms) កម្មវិធីសម្រាប់ប្រតិបត្តិការហិរញ្ញវត្ថុខុសច្បាប់ឆ្លងដែន និងគម្រោងវិនិយោគក្លែងបន្លំ ជាដើម។
លោក ឆៃ ស៊ីណារិទ្ធ បញ្ជាក់ថា ការកើនឡើងនៃភាពស្មុគស្មាញនៃអំពើឆបោកតាមប្រព័ន្ធបច្ចេកវិទ្យា បានលាតសន្ធឹងហួសពីព្រំដែនប្រទេសដែលធ្វើឱ្យមានផលប៉ះពាល់ធ្ងន់ធ្ងរលើសន្តិសុខសាធារណៈ និងកេរ្តិ៍ឈ្មោះប្រទេសជាតិនីមួយៗ ខណៈកម្ពុជាក៏ទើបតែអនុម័តច្បាប់ថ្មីដើម្បីដាក់ទោសទណ្ឌយ៉ាងតឹងរ៉ឹងចំពោះជនល្មើស ដើម្បីប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យានេះដែរ។
កាលពីថ្ងៃទី៨ ខែមេសា ឆ្នាំ២០២៦ ប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ បានធ្វើបទបង្ហាញជូនអង្គទូត និងអង្គការអន្តរជាតិប្រចាំនៅកម្ពុជា អំពីច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា ដែលមានការចូលរួមពីតំណាងអង្គទូតចំនួន ៣៣រូប និងអង្គការអន្តរជាតិចំនួន ៨រូបផងដែរ។
ច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានលោក ហ៊ុន សែន ប្រមុខរដ្ឋស្តីទីចុះហត្ថលេខាលើព្រះរាជក្រមប្រកាសឱ្យប្រើប្រាស់ជាផ្លូវការ កាលពីថ្ងៃទី៦ ខែមេសា ឆ្នាំ២០២៦ នេះ តាមសំណើរបស់រាជរដ្ឋាភិបាលកម្ពុជា។
ជុំវិញបញ្ហានេះ ក្រសួងមហាផ្ទៃ បានអះអាងកាលពីថ្ងៃទី៥ ខែកុម្ភៈ ថា កម្ពុជាប្ដេជ្ញាបោសសម្អាតបទល្មើសអនឡាញឱ្យអស់ត្រឹមខែមេសា ឆ្នាំ២០២៦ នេះ ព្រោះកម្ពុជានឹងមិនទុកឱ្យឧក្រិដ្ឋជនមានឱកាសដកដង្ហើមឡើយ។
ក្នុងរយៈពេលចុងក្រោយនេះ គេសង្កេតឃើញថា សមត្ថកិច្ចកម្ពុជាបានបង្ក្រាបទីតាំងដែលជាប់ពាក់ព័ន្ធនឹងការប្រព្រឹត្តការឆបោកតាមប្រព័ន្ធបច្ចេកវិទ្យាជាបន្តបន្ទាប់ ខណៈគណៈកម្មការគ្រប់គ្រងល្បែងស៊ីសងពាណិជ្ជកម្ម ក៏បានដកហូតអាជ្ញាបណ្ណទីតាំងកាស៊ីណូមួយចំនួនជាបន្តបន្ទាប់ដែរ។
យ៉ាងណាក៏ដោយ អ្នកស្រាវជ្រាវការអភិវឌ្ឍសង្គម និងសេដ្ឋកិច្ច បណ្ឌិត ជ័យ តិច លើកឡើងកាលពីដើមសប្តាហ៍នេះថា លោកគ្មានជំនឿលើសមត្ថភាពរបស់រដ្ឋាភិបាលក្នុងការបោសសម្អាតអំពើឆបោកឱ្យអស់ពីប្រទេសកម្ពុជាឡើយ ព្រោះមកដល់ខែមេសា នេះហើយ បទល្មើសទាំងនេះនៅតែបន្តកើតមានដដែល៕
© 2026, ឌឹ ខេមបូឌា ដេលី. All rights reserved.