លោកនាយករដ្ឋមន្ត្រី ហ៊ុន ម៉ាណែ អះអាងថា រដ្ឋាភិបាលកម្ពុជាកំពុងបន្តជំរុញកំណែទម្រង់ស្ថាប័នរដ្ឋ តាមរយៈគម្រោងកែសម្រួល និងកាត់បន្ថយអគ្គនាយកដ្ឋាន និងនាយកដ្ឋានមួយចំនួននៅតាមក្រសួងស្ថាប័នផ្សេងៗ ក្នុងគោលដៅបង្កើនប្រសិទ្ធភាពការងារ កាត់បន្ថយការចំណាយថវិកាជាតិ និងឆ្លើយតបទៅនឹងវិវត្តសង្គមឌីជីថល។
ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារទីស្នាក់ការកណ្តាលថ្មីនៃអគ្គនាយកដ្ឋានពន្ធដារនាព្រឹកថ្ងៃទី២១ ខែឧសភា ឆ្នាំ២០២៦ លោក ហ៊ុន ម៉ាណែតបានអះអាងថា គិតមកទល់ពេលនេះ រដ្ឋាភិបាលគ្រោងកែសម្រួល និងកាត់បន្ថយ ៣អគ្គនាយកដ្ឋាន និង៣០នាយកដ្ឋាននៅតាមក្រសួងស្ថាប័នផ្សេងៗ។
លោក ហ៊ុន ម៉ាណែត បន្ថែមថា គម្រោងកែសម្រួលអគ្គនាយកដ្ឋាន និងនាយកដ្ឋាននេះកើតមាន ក្រោយរដ្ឋាភិបាលចុះពិនិត្យនៅតាមក្រសួងស្ថាប័នចំនួន១៦ និងថា រដ្ឋាភិបាលនឹងបន្តការងារកែទម្រង់ស្ថាប័នរដ្ឋបន្ថែមទៀត ដើម្បីពង្រឹងប្រសិទ្ធភាពការងារ ធនធានមនុស្ស និងកាត់បន្ថយការចំណាយថវិកាជាតិផងដែរ។
នាយករដ្ឋមន្រ្តីកម្ពុជាសង្កត់ធ្ងន់ថា ការធ្វើកំណែទម្រង់ស្ថាប័នរដ្ឋ «បង្រួមក្បាល ពង្រីកខ្លួន» មិនមែនកាត់អ្នកស្អប់ ហើយដាក់អ្នកស្រឡាញ់នោះទេ គឺដើម្បីឆ្លើយតបនឹងការវិវត្តសង្គមឌីជីថល ក្រសួងស្ថាប័នខ្លះដូចជាអគ្គនាយកដ្ឋានពន្ធដារបានបង្កើតនាយកដ្ឋានបន្ថែមដែលមានជំនាញលើប្រព័ន្ធឌីជីថល និងបញ្ញាសិប្បនិម្មិត AI។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងដាក់ទិសដៅអនុវត្តការងារឆ្នាំ២០២៦ ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានថ្លែងថា អភិក្រម និងវិធីសាស្រ្តក្នុងការធ្វើកំណែទម្រង់របស់ប្រទេសនីមួយៗ មានភាពខុសគ្នា អាស្រ័យលើបរិបទ និងភាពចាំបាច់រៀងៗខ្លួន ក្នុងនោះ សម្រាប់កម្ពុជា លោកនាយករដ្ឋមន្ត្រី ហ៊ុន ម៉ាណែត បានដាក់ចេញនូវអភិក្រម “ពង្រឹងជាជាងពង្រីក” ដោយមិនពង្រីកលើសពីអ្វីដែលកំពុងមាន ហើយពង្រឹងអ្វីដែលមានស្រាប់ និងកែសម្រួលមួយចំនួនឱ្យបានសមស្រប។
លោក ហ៊ុន ម៉ានី ថ្លែងថា ជាក់ស្តែង ចំពោះការរៀបចំរចនាសម្ព័ន្ធឡើងវិញ, ក្រសួងមុខងារសាធារណៈ និងក្រសួងស្ថាប័នមួយចំនួន (សរុប ១២ ក្រសួងស្ថាប័ន គិតត្រឹមបច្ចុប្បន្ន) មិនត្រឹមតែមិនមានការពង្រីកនោះទេ តែបានកាត់បន្ថយអគ្គនាយកដ្ឋាន ចំនួន ៣ និងនាយកដ្ឋាន ចំនួន ២៦ និងការិយាល័យមួយចំនួនទៀត ហើយធនធានមនុស្សរបស់ក្រសួងក៏មិនមានកំណើននោះទេ តែទទួលបានការពង្រឹងសមត្ថភាព និងការទទួលខុសត្រូវបន្ថែម ដើម្បីបង្កើនប្រសិទ្ធភាពការងារ។
ទាក់ទងទៅនឹងការកំណែទម្រង់ស្ថាប័នរដ្ឋនេះ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករូណា បានឲ្យដឹងថា ប្រជាពលរដ្ឋហាក់អស់ជំនឿចិត្តលើរដ្ឋាភិបាល ក្នុងការធ្វើកំណែទម្រង់រដ្ឋបាលសាធារណៈ ពីព្រោះការអនុវត្តជាក់ស្តែងហាក់ដូចមានការយឺតយ៉ាវ និងមិនដំណើរការទៅមុខ ខណៈ។
លោក ស៊ឹង សែនករុណា បន្ថែមទៀតថា បច្ចុប្បន្នរដ្ឋាភិបាល លោកហ៊ុន ម៉ាណែត គ្រាន់តែឧបនាយករដ្ឋមន្ត្រីមានជាង១០នាក់ រដ្ឋមន្ត្រី និងរដ្ឋមន្ត្រីប្រតិភូអមនាយករដ្ឋមន្ត្រីរាប់សិបនាក់ រដ្ឋលេខាធិការជាង៨០០នាក់ និងអនុរដ្ឋលេខាធិការជិត១០០០នាក់ បើបូករួមទាំងទីប្រឹក្សានាយករដ្ឋមន្ត្រី ទីប្រឹក្សារដ្ឋាភិបាល និងទីប្រឹក្សាក្រសួងនានាមានរហូតដល់ជាង ៤០០០នាក់ ដូច្នេះបើធ្វើការកំណែទម្រង់ ត្រូវតែធ្វើចេញពីថ្នាក់លើទៅក្រោមគឺចេញពីថ្នាក់ជួររដ្ឋាភិបាល ពីក្រសួងស្ថាប័នជាតិ អង្គភាពនានា ហើយឈានទៅដល់រដ្ឋបាលថ្នាក់ក្រោមជាតិ ទើបអាចមានប្រសិទ្ធភាព។ លោក ថា កាត់បន្ថយចំនួនក្រសួងឱ្យកាន់តែតិច បង្រួមខេត្ត រាជធានីឱ្យកាន់តែតិច និងកាត់បន្ថយមន្ត្រីឱ្យកាន់តែតិច គឺកាន់តែល្អ ពីព្រោះវាធ្វើឱ្យរដ្ឋត្រូវចំណាយតិច៕
© 2026, ឌឹ ខេមបូឌា ដេលី. All rights reserved.