ស្ថានទូតចិនប្រចាំនៅកម្ពុជា អះអាងថា រដ្ឋាភិបាលរបស់ខ្លួននឹងមិនដកខ្លួនចេញពីគម្រោងព្រែកជីកហ្វូណនរបស់កម្ពុជាទេ ក្រោយពីសារព័ត៌មានបរទេសមួយចំនួនបានធ្វើសេចក្តីរាយការណ៍ថា រដ្ឋាភិបាលចិនគ្មានភាពច្បាស់លាស់ចំពោះការផ្តល់ថវិកាវិនិយោគសម្រាប់គម្រោងព្រែកជីកហ្វូណនកម្ពុជា។
សារព័ត៌មាន South China Morning Post នៅថ្ងៃទី២៩ មករា បានឱ្យដឹងថា ចិនកំពុងគន្លាស់ខ្លួនចេញពីគម្រោងព្រែកជីកហ្វូណនតេជោរបស់រដ្ឋាភិបាលកម្ពុជា។ សារព័ត៌មានដដែលបានអះអាងថា ចិនគ្មានភាពច្បាស់លាស់ និងគ្មានការប្ដេជ្ញាចិត្តចំពោះការផ្តល់ថវិកាវិនិយោគសម្រាប់គម្រោងព្រែកជីកហ្វូណនតេជោ និងថាភាពស្រពិចស្រពិលរបស់ចិន នេះ នឹងអាចធ្វើឱ្យផែនការអភិវឌ្ឍន៍របស់រដ្ឋាភិបាលកម្ពុជាទាំងមូលបរាជ័យ និងឈានទៅរង្គោះរង្គើដល់ទំនាក់ទំនងកម្ពុជា-ចិន។
ក្រោយពីការចុះផ្សាយរបស់សារព័ត៌មានខាងលើ ស្ថានទូតចិនប្រចាំកម្ពុជា បានបដិសេធចំពោះការលើកឡើងនោះ ដោយចាត់ទុកការចុះផ្សាយព័ត៌មាននោះជារឿងអត់ប្រយោជន៍ យកជាការមិនបាន។ ស្ថានទូតចិនអះអាងថា រដ្ឋាភិបាលចិននឹងនៅតែបន្តគាំទ្រយ៉ាងមុតមាំដល់រដ្ឋាភិបាលកម្ពុជាជានិច្ច។
ទាក់ទងទៅនឹងបញ្ហានេះ អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានប្រាប់អ្នកសារព័ត៌មាននៅថ្ងៃទី២៩ ខែមករា ឆ្នាំ២០២៥ ថា ព្រែកជីកហ្វូណនតេជោនឹងចាប់ផ្តើមដំណើរការជីកក្នុងពេលឆាប់ៗខាងមុខនេះ។ ក្រសួងបានបិទបញ្ចប់ដំណើរការផ្ទៀងផ្ទាត់និយាមកាកំណាត់ទី១ នៃព្រែកជីកហ្វូណនដែលមានចម្ងាយ ២១គីឡូម៉ែត្រ។
ប្រភពដដែលអះអាងថា កំណាត់ទី១ រាប់ចាប់ពីព្រែកតាកែវ នៃទន្លេមេគង្គ ដល់ព្រែកពោធិ៍ នៃទន្លេបាសាក់ ក្នុងភូមិសាស្ត្រខេត្តកណ្តាល។ ចំណែកកំណាត់ទី២ ដែលមានចម្ងាយជាង ១៥០គីឡូម៉ែត្រ នឹងគ្រោងបញ្ចប់នៅអំឡុងខែមេសា ឆ្នាំ២០២៥ ខាងមុខ ដោយឆ្លងកាត់ខេត្តកណ្តាល តាកែវ កំពត និងខេត្តកែប។
គម្រោងព្រែកជីកហ្វូណន ដែលបានបើកការដ្ឋានសាងសង់យ៉ាងគគ្រឹកគគ្រេងកាលពីថ្ងៃទី៥ ខែសីហា ឆ្នាំ២០២៤ នៅមិនទាន់ដំណើរការជីកនៅឡើយទេ។ ការណ៍នេះធ្លាប់ត្រូវបានកាសែតបរទេសមួយចំនួនសរសេរកន្លងមកថា ការផ្អាក ឬមិនទាន់ធ្វើការជីកមកដល់ពេលនេះ គឺដោយសារកម្ពុជាខ្វះថវិកា។
លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាឧបនាយករដ្ឋមន្ត្រីដែលទទួលបន្ទុកគម្រោងព្រែកជីកហ្វូណនតេជោ ធ្លាប់ប្រាប់ពលរដ្ឋឲ្យជឿទុកចិត្តលើរដ្ឋាភិបាល និងធានាពីការផ្តល់សំណងសមស្របជូនពលរដ្ឋដែលរងផលប៉ះពាល់។
គម្រោងព្រែកជីកហ្វូណន នឹងប៉ះពាល់ដល់ពលរដ្ឋជាង ១៥០០គ្រួសារ ដីលំនៅឋានជាង ១៤៩ហិកតា និងដីស្រែដីចម្ការចំនួន ២៩០០ហិកតា។ ព្រែកជីកនេះមានប្រវែង ១៨០គីឡូម៉ែត្រ ដែលគ្រោងចំណាយថវិកាសាងសង់ ១៧០០លានដុល្លារអាមេរិក ក្នុងនោះ ក្រុមហ៊ុនខ្មែរមានចំនួន ៥១% និងក្រុមហ៊ុនចិន ចំនួន ៤៩%។ តាមផែនការ គម្រោងព្រែកជីកហ្វូណន នឹងគ្រោងសាងសង់រួចរាល់នៅឆ្នាំ២០២៨៕
© 2025, ឌឹ ខេមបូឌា ដេលី. All rights reserved.