អតីតអ្នកឧកញ៉ា ហេង សិទ្ធី ព្រមានប្រទេសថៃ កុំលាបពណ៌មកលើប្រទេសកម្ពុជា ទាក់ទងនឹងបញ្ហាឧក្រិដ្ឋកម្មអនឡាញ ពីព្រោះមេឧក្រិដ្ឋជនអនឡាញមួយភាគធំ គឺជាជនជាតិថៃ ដែលបានមកសម្ងំលួចលាក់បើកដំណើរការនៅប្រទេសកម្ពុជា ធ្វើឲ្យអន្តរជាតិយល់ច្រឡំថាកម្ពុជាជាទីតាំងលាក់ឧក្រិដ្ឋជនអនឡាញ ខណៈរដ្ឋាភិបាលកម្ពុជា ចាត់វិធានការបានយ៉ាងល្អបំផុត។
លោក ហេង សិទ្ធី បានបញ្ជាក់តាមរយៈក្រុមគ្រួសាររបស់លោកមកកាន់សារព័ត៌មានអាមេរិក The Cambodia daily ថា លោកសូមឱ្យប្រទេសថៃ មានភាពថ្លៃថ្នូរបន្តិចកុំលាបពណ៌មកលើប្រទេសកម្ពុជា ពាក់ព័ន្ធនឹងបញ្ហាអនឡាញ ព្រោះមេឧក្រិដ្ឋជនអនឡាញទាំងនោះមួយភាគធំ គឺជាជនជាតិថៃ។
ប្រភពដដែលបានអះអាងថា ការប្រឆាំងនឹងឧក្រិដ្ឋកម្មអនឡាញ ត្រូវបានរដ្ឋាភិបាលកម្ពុជា ចាត់វិធានការបានល្អបំផុត ដើម្បីកុំឲ្យអន្តរជាតិយល់ច្រឡំ ជាពិសេសថៃ បានចោទប្រកាន់មកលើកម្ពុជាថាជាទីតាំងលាក់ឧក្រិដ្ឋជនអនឡាញ ខណៈអំឡុងពេលប៉ុន្មានឆ្នាំចុងក្រោយនេះ លោកសង្កេតឃើញថាមានមេខ្លោងឧក្រិដ្ឋកម្មអនឡាញដែលជាជនជាតិថៃ បានមកសម្ងំលួចលាក់បើកដំណើរការនៅប្រទេសកម្ពុជា។
ក្រុមគ្រួសារអតីតអ្នកឧកញ៉ា ហេង សិទ្ធី បានអះអាងថា ឧក្រិដ្ឋកម្មអនឡាញពិបាកនឹងកំណត់ទីតាំង ពីព្រោះពួកគេអាចប្រើមធ្យោបាយពង្រាយបុគ្គលិកដោយមិនប្រមូលផ្ដុំ ហើយប្រើប្រព័ន្ធម៉ាឌឺប៊ត ដើម្បីគ្រប់គ្រងប្រព័ន្ធទាំងមូល។ គ្រួសារលោក ហេង សិទ្ធី អះអាងទៀតថា លោក ហេង សិទ្ធី សំណូមពរឱ្យក្រសួងមហាផ្ទៃ ចាត់វិធានការម៉ឺងម៉ាត់បំផុត និងកំណត់មុខសញ្ញាឱ្យមានប្រសិទ្ធភាព ហើយត្រូវធ្វើដូចភ្លៀងរលឹម។
លោក ហេង សិទ្ធី អះអាងថា បើដេកដកដង្ហើមចោលដដែល លោកស្ម័គ្រចិត្តចូលបម្រើកងទ័ពដើម្បីការពារប្រទេសតាមច្បាប់កងទ័ព ប្រសិនបើធ្វើខុសអាចបាញ់លោកចោលភ្លាមៗនៅនឹងកន្លែងក៏បាន។ លោកអះអាងថា លោកចង់រួមចំណែកកសាងជាតិ ដើម្បីជាការដឹងគុណចំពោះសន្តិភាព។
លោកអះអាងថា លោកជាជនជាតិខ្មែរមានឈាមជ័រជាខ្មែរ ពេលនេះលោកនៅប្រទេសខ្មែរ លោកមិនដែលរត់ទៅណាទេ បើសិនជាលោកមានបំណងចង់រត់មែន នោះសមត្ថភាព និងប្រាជ្ញារបស់លោក ប្រហែលជាទៅដេកសោយសុខនៅប្រទេសអង់គ្លេស អាមេរិក ឬបារាំង បាត់ទៅហើយ។
លោកសូមប្រកាសឲ្យសាធារណជនមេត្តាជ្រាបថា លោកជាខ្មែរ មានឬក្រមិនសំខាន់ ទស្សនៈខុសគ្នាមិនសំខាន់ សំខាន់បំផុតគឺពេលប្រទេសជាតិកំពុងជួបបញ្ហានៃការឈ្លានពានពីបរទេស គឺត្រូវតែចេះរួបរួមគ្នា មិនមែនសម្ងំនៅក្រៅប្រទេស ហើយមកវាយប្រហារប្រទេសខ្លួនឯងនោះទេ។
លោក ហេង សិទ្ធី អះអាងថា លោកគាំទ្ររដ្ឋាភិបាលដោះស្រាយតាមរយៈនយោបាយការទូត ដើម្បីរក្សាសន្តិសុខ និងសន្តិភាពស្ថិរភាពសង្គម តែបើគ្មានជម្រើស ឬក៏មានការឈ្លានពានទ្រង់ទ្រាយធំណាមួយនោះ លោកជឿជាក់ថារដ្ឋាភិបាលក៏មិនឱ្យសត្រូវហោះរំលងបានដែរ។
អតីតអ្នកឧកញ៉ា ហេង សិទ្ធី ត្រូវបានប៉ូលិសអន្តរជាតិអាំងទែប៉ូល (INTERPOL) ចាប់បញ្ជូនខ្លួនពីប្រទេសរុស្ស៊ី ទៅប្រទេសកម្ពុជា កាលពីថ្ងៃទី២៤ ខែឧសភា ឆ្នាំ២០២៥ ក្រោមការធ្វើបត្យាប័នរវាងរដ្ឋាភិបាលទាំងពីរ បន្ទាប់ពីត្រូវបានតុលាការកម្ពុជា ចោទប្រកាន់ពីបទ «គំរាមកំហែងហែកកេរ្តិ៍ដែលមានស្ថានទម្ងន់ទោស» តាមបញ្ញត្តិមាត្រា៣៧២ និងមាត្រា៣៧៤ នៃក្រមព្រហ្មទណ្ឌ។
គេកត់សម្គាល់ឃើញថា ចាប់តាំងពីចុងឆ្នាំ២០២៤ មក លោក ហេង សិទ្ធី បានទម្លាយរឿងអាស្រូវរបស់អ្នកមានអំណាច អ្នកមានលុយ មន្ត្រីកងកម្លាំងប្រដាប់អាវុធ និងមន្ត្រីជាន់ខ្ពស់ក្នុងជួររាជរដ្ឋាភិបាលកម្ពុជា ពីម្នាក់ទៅម្នាក់ជាហូរហែលើបណ្ដាញសង្គម ដូចជា រឿងពុករលួយ និងរឿងបើកដៃឱ្យមានល្បែងស៊ីសង ជាដើម។
គណៈកម្មការត្រួតពិនិត្យសេដ្ឋកិច្ច និងសន្តិសុខសហរដ្ឋអាម៉េរិក-ចិន (The U.S.-China Economic and Security Review Commission – USCC) បានចេញរបាយការណ៍របស់ខ្លួនកាលពីថ្ងៃទី១៨ ខែកក្កដា ថា ប្រតិបត្តិការបោកប្រាស់នៅកម្ពុជា កំពុងផ្ទុះឡើងគួរឱ្យកត់សម្គាល់ ខណៈយុទ្ធនាការបង្ក្រាបអំពើបោកប្រាស់ទាំងនោះម្តងម្កាល គឺដើម្បីកាត់បន្ថយសម្ពាធអន្តរជាតិប៉ុណ្ណោះ។
កម្ពុជា ឡាវ ថៃ និងភូមា ត្រូវបានគេរកឃើញថាជាចំណុចកណ្ដាលនៃមជ្ឈមណ្ឌលបោកប្រាស់ ក្នុងនោះ តារាសម្ដែងជនជាតិចិនម្នាក់ឈ្មោះ Wang Xing ក៏ត្រូវបានឃើញថាត្រូវគេចាប់ពង្រត់នៅក្នុងប្រទេសថៃ និងជួញដូរចូលទៅក្នុងមជ្ឈមណ្ឌលបោកប្រាស់មួយនៅក្នុងប្រទេសភូមា កាលពីពេលថ្មីៗនេះដែរ៕
© 2025, ឌឹ ខេមបូឌា ដេលី. All rights reserved.