នាយករដ្ឋមន្ត្រីកម្ពុជា លោក ហ៊ុន ម៉ាណែត អំពាវនាវឱ្យក្រុមប្រឆាំងនៅក្រៅស្រុក ទៅកម្ពុជាដោយផ្ទាល់ ឬចាត់អ្នកតំណាងមកសិក្សាពីអ្នកបច្ចេកទេសលើកិច្ចការព្រំដែនក៏បាន ដើម្បីឱ្យពួកគេមានសមត្ថភាពនិយាយពីកិច្ចការព្រំដែនសមហេតុផល។
លោក ហ៊ុន ម៉ាណែត សរសេរលើទំព័រហ្វេសប៊ុករបស់ខ្លួននៅថ្ងៃទី២៧ វិច្ឆិកា នេះថា ក្នុងកាលៈទេសៈដែលកម្ពុជា កំពុងដោះស្រាយបញ្ហាព្រំដែនជាមួយប្រទេសជិតខាង លោកមិនចង់ឆ្លើយឆ្លងជាមួយអ្នកនយោបាយខ្មែរមួយចំនួននោះទេ។
លោកអះអាងថា រហូតមកដល់ពេលនេះ ការនិយាយពាក់ព័ន្ធនឹងកិច្ចការព្រំដែនរបស់ក្រុមប្រឆាំង ដូចជាលោក អ៊ុំ សំអាន ជាដើម ហាក់ដូចជាគ្មានអ្វីច្បាស់លាស់ ឬអាចយកជាការបានឡើយ ទាំងមូលដ្ឋានបច្ចេកទេសផែនទី ទាំងមូលដ្ឋានច្បាប់ និងឯកសារយោងនានា។
នាយករដ្ឋមន្ត្រីខ្មែររូបនេះបញ្ជាក់ថា ទោះលោកមិនចង់ឆ្លើយតបជាមួយក្រុមប្រឆាំងពីបញ្ហាព្រំដែនក៏ដោយ ប៉ុន្តែពេលខ្លះក៏មានការចាំបាច់ក្នុងការលើកឡើងនូវចំណុចមួយចំនួនដែរ ដើម្បីកុំឱ្យពួកគេប្រឌិតរឿងមិនពិតក្នុងចេតនាកេងចំណេញនយោបាយ និងដើម្បីឲ្យប្រជាពលរដ្ឋមានការយល់ច្រឡំមកលើរាជរដ្ឋាភិបាលនោះ។
នៅថ្ងៃទី២៧ ខែវិច្ឆិកា ឆ្នាំ២០២៥ នេះ អតីតមន្ត្រីបក្សប្រឆាំងដែលកំពុងរស់នៅក្រៅស្រុក អះអាងថា តំបន់ Pong Nam Ron គឺជាតំបន់ដែលជាប់នឹងស្រុកកំរៀង ខេត្តបាត់ដំបង ហើយក៏ជាអតីតតំបន់មូលដ្ឋានយោធាខ្មែរក្រហមដែលលោក អៀង សារី បានកាន់កាប់ និងមានលោក អ៊ី ឈាន ជាមេទ័ពនាសម័យសង្គ្រាមស៊ីវិលក្នុងទសវត្សឆ្នាំ១៩៨០។
ប្រភពដដែល បញ្ជាក់ថា ពេលនេះ រដ្ឋាភិបាលកម្ពុជា បានទទួលស្គាល់ព្រំដែនថ្មីនៅតំបន់នោះ ដែលធ្វើឱ្យខ្មែរបាត់បង់ទឹកដីជាច្រើនគីឡូម៉ែត្រការ៉េទៅប្រទេសថៃ ក្រោយបញ្ចប់ការបោះបង្គោលរណបបណ្ដោះអាសន្នពីចន្លោះបង្គោលព្រំដែនលេខ៥២ ដល់បង្គោលព្រំដែនលេខ៥៩ កាលពីពេលថ្មីៗនេះ។
យ៉ាងណាក៏ដោយ អតីតមេខ្មែរក្រហម និងជាអតីតអភិបាលខេត្តប៉ៃលិន លោក អ៊ី ឈាន សរសេរលើគណនីហ្វេសប៊ុករបស់ខ្លួននៅថ្ងៃទី២៧ វិច្ឆិកា នេះដែរថា តំបន់ចន្លោះព្រំដែនលេខ៥២ និង៥៩ កាលពីសម័យសង្គ្រាមត្រូវបានកាន់កាប់ដោយលោក សុន សេន មិនមែនលោក អៀង សារី ទេ គ្មានការបាត់បង់ទឹកដីទៅប្រទេសថៃ ឡើយ ក្នុងនាមលោកជាសាក្សីរស់ម្នាក់ដែលធ្លាប់កាន់កាប់តំបន់នោះ។
អតីតមេខ្មែរក្រហមរូបនេះចាត់ទុកការលើកឡើងរបស់មន្ត្រីបក្សប្រឆាំង ដែលថាលោកធ្លាប់អះអាងពីការបាត់បង់ទឹកដីខ្មែររាប់រយម៉ែត្រនៅតំបន់ Pong Nam Ron ជាប់ស្រុកកំរៀង ខេត្តបាត់ដំបង ទៅប្រទេសថៃ ថាជាការប្រឌិត ញុះញង់ កេងចំណេញនយោបាយក្នុងចេតនាបង្កចលាចលសង្គមប៉ុណ្ណោះ។
ជុំវិញបញ្ហានេះ កាសែតថៃ ខៅស៊ុត (Khaosod) បានរាយការណ៍កាលពីថ្ងៃទី២៥ ខែវិច្ឆិកា ថា ក្រុមចម្រុះថៃ-កម្ពុជា បានបញ្ចប់ការបោះបង្គោលព្រំដែនបណ្ដោះអាសន្នប្រវែងជាង ៨គីឡូម៉ែត្រ (៨,៣គីឡូម៉ែត្រ) និងដាំបង្គោលព្រំដែនបណ្ដោះអាសន្នចន្លោះបង្គោលព្រំដែនលេខ៥២ និងលេខ៥៩ ក្នុងស្រុកពុងណាំរ៉ុន ខេត្តចាន់បុរី កាលពីថ្ងៃអង្គារ ដើមសប្តាហ៍នេះ។
កាសែតថៃ ដដែលនេះបញ្ជាក់ថា បេសកកម្មនេះសម្រេចបាន ១០០% ដោយបានដំឡើងបង្គោលចំនួន ១៦៦បង្គោល ខណៈចំណុចសំខាន់បំផុតនោះ គឺការបោះបង្គោលព្រំដែនបណ្ដោះអាសន្ននេះ គឺផ្អែកលើទីតាំងកំណត់ព្រំដែនដើមដែលបានបង្កើតឡើងជាង ១២០ឆ្នាំមុន មិនមែនប្រើប្រាស់តាមផែនទីខ្នាត ១/២០០០០០ នោះទេ។
ជុំវិញបញ្ហានេះ រដ្ឋលេខាធិការដ្ឋានកិច្ចការព្រំដែន បានចេញសេចក្តីប្រកាសកាលពីថ្ងៃទី២៦ វិច្ឆិកា អំពីការងារចុះវាស់វែង និងបោះបង្គោលបណ្ដោះអាសន្ននេះថាជាការវាស់វែងឈរលើមូលដ្ឋាននៃឯកសារគតិយុត្តិ ដែលបន្សល់ទុកពីអាណាព្យាបាលបារាំង៕
© 2025, ឌឹ ខេមបូឌា ដេលី. All rights reserved.