 គឺជាកំហុសយុទ្ធសាស្ត្រក្នុងការពង្រឹងកម្លាំងកងទ័ព តាមរយៈទំនើបកម្មរដ្ឋបាល និងប្រព័ន្ធគាំពារសង្គមយ៉ាងធ្ងន់ធ្ងរ។){kind=link}
អ្នកតាមដានបញ្ហាសង្គម លើកឡើងថា ការដែលរដ្ឋមិនបើកប្រាក់បៀវត្សរ៍ឱ្យយោធិនតាមប្រព័ន្ធធនាគារក្រោមកង្វល់ផ្នែកសន្តិសុខព័ត៌មាន និងមិនតម្រូវឱ្យមានរបបសន្តិសុខសង្គម (ប.ស.ស) គឺជាកំហុសយុទ្ធសាស្ត្រក្នុងការពង្រឹងកម្លាំងកងទ័ព តាមរយៈទំនើបកម្មរដ្ឋបាល និងប្រព័ន្ធគាំពារសង្គមយ៉ាងធ្ងន់ធ្ងរ។
ប្រធានវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន សរសេរលើគណនីហ្វេសប៊ុករបស់ខ្លួននៅថ្ងៃទី៣ កុម្ភៈ នេះថា ការបើកប្រាក់បៀវត្សរ៍ឱ្យយោធិនតាមប្រព័ន្ធធនាគារ ជាសញ្ញាណនៃអភិបាលកិច្ចល្អ និងតម្លាភាពក្នុងរដ្ឋបាលសាធារណៈទំនើប ព្រោះប្រព័ន្ធនេះអាចធានាបានថា ប្រាក់បៀវត្សរ៍ទាំងអស់បានទៅដល់ពួកគេដោយផ្ទាល់ និងអាចកាត់បន្ថយបាតុភាពអសកម្មផ្សេងៗថែមទៀត។
លោកថា បណ្តាប្រទេសជឿនលឿន ដូចជា អាមេរិក បារាំង និងជប៉ុន ជាដើម បានប្រើប្រាស់ប្រព័ន្ធធនាគារបើកប្រាក់ខែឱ្យយោធិនជាយូរមកហើយ។
លោកបន្ថែមថា រដ្ឋអាចអនុវត្តប្រព័ន្ធនេះដោយប្រើប្រាស់បណ្ដាញធនាគារ ឬប្រព័ន្ធឌីជីថលដែលត្រូវបានអ៊ិនគ្រីប (Encrypted) ដែលមានសុវត្ថិភាពខ្ពស់ ដើម្បីរក្សាការសម្ងាត់ និងសន្តិសុខព័ត៌មានរបស់ជាតិ។
លោក ប៉ា ចន្ទរឿន លើកឡើងថា ការយល់ឃើញថាមន្ទីរពេទ្យយោធាអាចជំនួសរបបសន្តិសុខសង្គម គឺជាការយល់ច្រឡំយ៉ាងធំរវាង “សេវាព្យាបាល” និង “ប្រព័ន្ធគាំពារសង្គម”។
លោកបន្តថា អត្ថប្រយោជន៍នៃរបបសន្តិសុខសង្គម គឺលើសពីការព្យាបាល ព្រោះវាអាចការពារនូវហានិភ័យការងារ ដូចជា គ្រោះថ្នាក់ ឬពិការភាព ជាដើម ព្រមទាំងជួយឱ្យរបបសោធននិវត្តន៍មានចីរភាពផងដែរ ដែលមន្ទីរពេទ្យយោធាមិនអាចផ្តល់ឱ្យពួកគេបាន។ ជាងនេះទៀត របបសន្តិសុខសង្គម ក៏ជួយឱ្យយោធិនទទួលបានសេវាសុខភាពទូទាំងប្រទេសថែមទៀត ដោយមិនចាំបាច់ធ្វើដំណើរមកមន្ទីរពេទ្យយោធាក្នុងករណីបន្ទាន់ ឬស្ថិតនៅតំបន់ដាច់ស្រយាលនោះ។
លោកបន្ថែមថា ការផ្ដល់បណ្ណ ប.ស.ស ដល់គ្រួសារយោធិន គឺជាយុទ្ធសាស្ត្រពង្រឹងខឿនការពារជាតិ និងសុខុមាលភាពគ្រួសារទាហានផងដែរ ដែលជាកត្តាកំណត់នូវស្មារតីប្រយុទ្ធ និងភក្ដីភាពរបស់កងទ័ពយ៉ាងខ្លាំងក្លា ហើយក៏ជាខែលការពារហិរញ្ញវត្ថុដែលអាចជួយការពារពលទាហានដែលមានចំណូលមធ្យម និងងាយរងគ្រោះចំពោះការចំណាយលើសុខភាពគ្រួសារផងដែរ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ចាន់ សុធី បានលើកឡើងក្នុងវេទិកាសាធារណៈ ស្ដីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២៦ កាលពីថ្ងៃទី២ ខែកុម្ភៈ ឆ្នាំ២០២៦ នេះថា មូលហេតុដែលរដ្ឋាភិបាលមិនបើកបៀវត្សរ៍តាមប្រព័ន្ធធនាគារ និងមិនធ្វើបណ្ណ ប.ស.ស ជូនកងទ័ព ដោយសារពាក់ព័ន្ធនឹងកិច្ចការការពារជាតិ។
លោក ចាន់ សុធី អះអាងថា ទោះបីកងទ័ពមិនមានបណ្ណ ប.ស.ស ដើម្បីចូលព្យាបាលជំងឺនៅតាមមន្ទីរពេទ្យដោយឥតគិតថ្លៃក៏ដោយ ក៏រដ្ឋាភិបាលបានពង្រឹងមន្ទីរពេទ្យយោធាដើម្បីផ្តល់សេវាព្យាបាលជូនកងទ័ពរួចរាល់ដែរ។ បន្ថែមពីនេះ ក្នុងពេលមានការប្រយុទ្ធគ្នាជាមួយថៃ កន្លងមក មន្ទីរពេទ្យស៊ីវិលនានាក៏បានទទួលព្យាបាលឱ្យកងទ័ពដោយឥតគិតថ្លៃដែរ។ លើសពីនេះ រដ្ឋាភិបាលថែមទាំងបានផ្តល់ប្រាក់ឧបត្ថម្ភថ្លៃម្ហូបមួយថ្ងៃ ២ម៉ឺនរៀលជូនដល់យុទ្ធជនដែលកំពុងសម្រាកព្យាបាលនៅតាមមន្ទីរពេទ្យថែមទៀត ដើម្បីជួយសម្រួលជីវភាពរបស់ពួកគេ។
យ៉ាងណាក៏ដោយ ពលទាហានកម្ពុជាមួយចំនួនទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៣ កុម្ភៈ នេះថា ការបើកប្រាក់បៀវត្សរ៍ពីអង្គភាពត្រូវប្រឈមនឹងអំពើពុករលួយយ៉ាងធ្ងន់ធ្ងរ ព្រោះរាល់ពេលបើកប្រាក់ខែម្តងៗ ត្រូវប្រធានអង្គភាពកាត់យកប្រាក់បៀវត្សរ៍មួយចំណែក ក្រោមហេតុផលផ្សេងៗដោយមិនមានមូលហេតុពិតប្រាកដ៕
© 2026, ឌឹ ខេមបូឌា ដេលី. All rights reserved.