ធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា ប្រកាសលុបបំណុលគ្រួសារយោធិនពលី គ្រួសារយោធិនពិការ និងគ្រួសារយោធិនរងរបួសក្នុងសង្គ្រាមរវាងកម្ពុជា-ថៃ ចោលទាំងអស់។
នៅថ្ងៃទី៣០ ខែកក្កដា នេះ ធនាគារនៅកម្ពុជា ចំនួន១២ រួមមាន ធនាគារជាតិនៃកម្ពុជា ធនាគារអេស៊ីលីដា ធនាគារអភិវឌ្ឍន៍ជនបទ និងកសិកម្ម ធនាគារខេប៊ីប្រាសាក់ ធនាគារវីង គ្រឹះស្ថានអម្រឹត ធនាគារអេចអេច ធនាគារកាណាឌីយ៉ា ធនាគារជីប ម៉ុង ធនាគារពាណិជ្ជកម្មក្រៅប្រទេសនៃកម្ពុជា ធនាគារព្រីនស៍ និងធនាគារវឌ្ឍនៈ បានសម្រេចលុបចោលបំណុលដល់គ្រួសារយោធិនពលី និងអ្នករួមខ្ចីដែលបានបំពេញប្រតិបត្តិការក្នុងសមរភូមិការពារបូរណភាពទឹកដីកម្ពុជាចោលទាំងស្រុង។
ធនាគារជាតិនៃកម្ពុជា បានចេញសេចក្តីណែនាំនៅថ្ងៃទី៣០ កក្កដា នេះថា ធនាគារសម្រេចលុបចោលកម្ចីរហូតទៅដល់ ៨០លានរៀលរបស់អតិថិជន ឬអ្នករួមខ្ចីជាយោធិនពលី និងលុបចោលកម្ចីរហូតទៅដល់ ១០លានរៀលរបស់យោធិនពិការ និងផ្តល់ការអនុគ្រោះផ្សេងៗដល់ជនភៀសសឹក ពលករ និងយោធិនជួរមុខផងដែរ។
ធនាគារជាតិនៃកម្ពុជា តម្រូវឱ្យគ្រឹះស្ថានហិរញ្ញវត្ថុទាំងអស់ លើកលែងបង់ការប្រាក់ និងការផាកពិន័យឥណទានដល់ជនភៀសសឹករយៈពេល ៣ខែ ចាប់ពីថ្ងៃទី៣០ ខែកក្កដា ដល់ថ្ងៃទី៣១ ខែតុលា ឆ្នាំ២០២៥។
បន្ថែមពីនេះ ក៏ត្រូវលើកលែងបង់ការប្រាក់ និងផាកពិន័យរយៈពេល ៦ខែផងដែរ ដោយគិតចាប់ពីថ្ងៃទី៣០ ខែកក្កដា រហូតដល់ថ្ងៃទី៣១ ខែមករា ឆ្នាំ២០២៦ ចំពោះគ្រួសារយោធិនដែលកំពុងប្រតិបត្តិការការពារទឹកដីនៅលើសមរភូមិ។
ជុំវិញបញ្ហានេះ ធនាគារ និងគ្រឹះស្ថានមីក្រូហិរញ្ញវត្ថុទាំងនោះ បានសម្រេចលុបចោលបំណុលទាំងស្រុងដល់យោធិនពលីជីវិត និងអ្នករួមខ្ចី ក្នុងស្មារតីមនុស្សធម៌ ដើម្បីជួយសម្រាលបន្ទុកដល់គ្រួសារយោធិនដែលកំពុងបំពេញប្រតិបត្តិការក្នុងសមរភូមិការពារបូរណភាពទឹកដីកម្ពុជា នាពេលនេះ។
ចំណែកធនាគារវីង បានសម្រេចលុបចោលបំណុលទាំងស្រុងដល់យោធិនពលី និងយោធិនពិការ ខណៈយោធិនរងរបួស គឺលុបបំណុលត្រឹមតែ ៧៥% ប៉ុណ្ណោះ ខណៈធនាគារកាណាឌីយ៉ា ក៏សម្រេចលុបចោលបំណុលត្រឹមតែ ៨០% ដែរ សម្រាប់យោធិនរងរបួស ឬអ្នករួមខ្ចីនោះ។
ដោយឡែកធនាគារ ជីប ម៉ុង មិនត្រឹមតែលុបចោលបំណុលទាំងស្រុងដល់គ្រួសារយោធិនពលី ពិការ និងរងរបួសទេ ថែមទាំងឧបត្ថម្ភប្រាក់បន្ថែមដល់យោធិនទាំងនោះទៀតដែរ ក្នុងនោះ យោធិនពលីទទួលបាន ២០លានរៀល យោធិនរងរបួសធ្ងន់ទទួលបាន ១០លានរៀល និងយោធិនរងរបួសស្រាលទទួលបាន ២លានរៀល។
ការសម្រេចលុបបំណុលដល់គ្រួសារយោធិនពលី ពិការ និងរងរបួសនេះ ធ្វើឡើងតាមការអំពាវនាវរបស់នាយករដ្ឋមន្ត្រីកម្ពុជា កាលពីពេលថ្មីៗនេះ។
កាលពីថ្ងៃទី២៩ ខែកក្កដា លោក ហ៊ុន ម៉ាណែត បានអំពាវនាវឱ្យសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ពិនិត្យលទ្ធភាពជួយសម្រាលបន្ទុកហិរញ្ញវត្ថុសម្រាប់កងកម្លាំងប្រដាប់អាវុធដែលកំពុងធ្វើប្រតិបត្តិការយ៉ាងសកម្មនៅក្នុងបុព្វហេតុការពារបូរណភាពទឹកដីនៅក្នុងសមរភូមិប្រយុទ្ធនាពេលនេះ។
ជាងនេះទៅទៀត ក៏ត្រូវជួយសម្រាលបន្ទុកហិរញ្ញវត្ថុដល់គ្រួសារយោធិនពលី យោធិនរងរបួស និងពិការ រួមទាំងពលរដ្ឋជាជនភៀសសឹកដោយសារការប្រយុទ្ធគ្នារវាងកម្ពុជា-ថៃ ផងដែរ។
លោក ហ៊ុន ម៉ាណែត បានចេញបទបញ្ជាឲ្យក្រសួងការពារជាតិ និងក្រសួងស្ថាប័នពាក់ព័ន្ធ រៀបចំនូវគោលនយោបាយលើកទឹកចិត្តពិសេសសម្រាប់កងកម្លាំងប្រដាប់អាវុធ ទាំងយោធា ទាំងនគរបាលជាតិ ដែលបានចូលរួមដោយផ្ទាល់នៅក្នុងសមរភូមិការពារបូរណភាពទឹកដីនាពេលនេះ។
លោកបញ្ជាក់ថា យោធិន និងកងនគរបាលជាតិដែលបានពលី ឬធ្លាក់ខ្លួនពិការមិនអាចបំពេញភារកិច្ចបន្តបាន នោះរដ្ឋាភិបាលនឹងផ្ដល់ក្របខ័ណ្ឌឲ្យសាច់ញាតិបង្កើតរបស់គាត់មួយរូបបានចូលបម្រើប្រទេសជាតិនៅតាមអង្គភាពដែលគាត់បំពេញភារកិច្ចមុនពលី ឬធ្លាក់ខ្លួនពិការផងដែរ៕
© 2025, ឌឹ ខេមបូឌា ដេលី. All rights reserved.