មួយថ្ងៃបន្ទាប់ពីលោក បា៉ សុជាតិវង្ស អភិបាលរាជធានីភ្នំពេញបានច្រានចោលមិនទទួលខុសត្រូវចំពោះការជួសជុលអគារប៊ូឌីងឡើងវិញ ទោះបីជាលោកធ្លាប់ប្រកាសថា អគារនេះមានសភាពទ្រុឌទ្រោមក៏ដោយនោះ អង្គការក្រៅរដ្ឋាភិបាលបានអំពាវនាវកាលពីម្សិលមិញឲ្យអាជ្ញាធរសាលារាជធានីធ្វើរបាយការណ៍ស្ដីពីការចុះត្រួតពិនិត្យមួយ ព្រោះធ្វើដូច្នេះវាអាចមានការអនុញ្ញាតឲ្យមានការជួសជុលទ្រង់ទ្រាយធំដល់អគារដែលមានសភាពចាស់ទ្រុឌទ្រោមមួយនេះប្រសិនបើចាំបាច់។
យោងតាមសមាគមធាងត្នោត ជាអង្គការសិទ្ធិលំនៅដ្ឋានបានឲ្យដឹងថា យុទ្ធនាការដើម្បីជួសជុលអគារនៅសម័យទសវត្សរ៍ឆ្នាំ១៩៦០នេះមានដំណើរការតាំងពីឆ្នាំមុនមកម្លេ៉ះ។
ប៉ុន្តែដោយសារតែគ្មានរបាយការណ៍បញ្ជាក់ពីភាពទ្រុឌទ្រោមនៃអគារ លោក អុី សារុំ នាយកប្រតិបត្តិសមាគមធាងត្នោង បានលើកឡើងកាលពីម្សិលមិញថា អង្គការសង្គមស៊ីវិល និងអ្នករស់នៅក្នុងអគារមិនអាចធ្វើអ្វីបានច្រើនទេ។
លោក សារុំ បានមានប្រសាសន៍ថា ” អ្នករស់នៅក្នុងអគារចង់ជួសជុលអគារនោះដោយខ្លួនឯង ហើយពួកគេត្រៀមខ្លួនចូលរួមជាថវិកា និងកម្លាំងរួចហើយ។ មកទល់នឹងពេលនេះយើងបានជួសជុលដំបូលដែលលេចធ្លាយ បង្កាន់ដៃជណ្ដើរ និងបានលាបពណ៌”។
ដោយលើកឡើងម្ដងទៀតពីការអះអាងរបស់អ្នករស់នៅក្នុងអគារជាច្រើន រួមទាំងមេភូមិផងនោះ លោក សារុំ បាននិយាយថា តាមពិតទៅមន្ត្រីរៀបចំដែនដីរាជធានីមិនបានចុះមកត្រួតពិនិត្យអគារទេ។ លោកបានមានប្រសាសន៍ថា ” តាមពិតទៅ [សាលារាជធានី] មិនបានបញ្ជូនក្រុមការងាររបស់ខ្លួនមកធ្វើការត្រួតពិនិត្យទេ។ វាគួរតែមានការចុះមកត្រួតពិនិត្យ ហើយបន្ទាប់មកយើងអាចធ្វើការជាមួយអាជ្ញាធរមូលដ្ឋាន”។
លោក សុង សុចារ៉ា អនុប្រធានមន្ទីររៀបចំដែនដី នគរូបនីយកម្ម និងសំណង់រាជធានីបានលើកឡើងកាលពីម្សិលមិញថា គេបានចុះទៅត្រួតពិនិត្យអគារនោះសរុបទាំងអស់បីលើករួចមកហើយ ដោយការត្រួតពិនិត្យចុងក្រោយត្រូវបានធ្វើឡើងកាលពីឆ្នាំមុន។
លោក សុចារ៉ា ដែលដំបូងឡើយបដិសេធមិនបង្ហាញសេចក្ដីលម្អិតនៃការត្រួតពិនិត្យក៏បានលើកឡើងដែរថា កាលពីឆ្នាំមុនសាលារាជធានីបានចេញសារាចរណែនាំមួយបញ្ជាក់ពីការដកខ្លួនចេញពីការទទួលខុសត្រូវចំពោះសុវត្ថិភាពរបស់អ្នករស់នៅក្នុងអគារប៊ូឌីងនេះ។
បន្ទាប់ពីកំណត់ថា ” អគារនេះមិនអាចជួសជុលឡើងវិញបាន” អាជ្ញាធររាជធានីបានជូនដំណឹងពីភាពគ្រោះថ្នាក់ដល់អ្នករស់នៅក្នុងអគារ ហើយជំរុញឲ្យពួកគាត់ចាកចេញពីទីនោះប្រសិនបើអាចទៅរួច។ លោក សុចារ៉ា បានមានប្រសាសន៍ថា “អ្នកដែលរស់នៅក្នុងអគារនេះបាននិយាយថា ពួកគាត់សុខចិត្តស្លាប់នៅលើដីរបស់ខ្លួន។ ប្រសិនបើយើងមិនបានចេញសេចក្ដីជូនដំណឹងដល់ពួកគាត់ទេ នេះនឹងជាការទទួលខុសត្រូវរបស់យើង ប៉ុន្តែយើងបានប្រាប់ពួកគាត់ ហើយបានជួបជាមួយពួកគាត់ដើម្បីប្រាប់ឲ្យដឹងពីបញ្ហា ហេតុដូច្នេះនេះគឺជាការទទួលសុខត្រូវរបស់ពួកគេ”។
លោកស្រី AnneLemaistre តំណាងប្រចាំប្រទេសរបស់អង្គការយូណេស្កូ ដែលធ្វើការជាមួយរដ្ឋាភិបាលដើម្បីអភិរក្សអគារប្រវត្តិសាស្ត្រសំខាន់ៗបានលើកឡើងថា លោកស្រីនឹងចូលរួមនៅក្នុងការពិភាក្សាអំពីវាសនានៃអគារប៊ូឌីងនេះ។ លោកស្រីបានមានប្រសាសន៍ថា ” ប្រសិនបើពួកគេមានការត្រួតពិនិត្យ ហើយវាត្រូវបានធ្វើឡើងដោយវិស្វករនោះ អ៊ីចឹងយើងអាចចាប់ផ្ដើមការពិភាក្សាគ្នាបាន”៕ ស៊ុយឈាង