ការគ្រប់គ្រងរបស់ក្រុមហ៊ុនផលិតរថយន្តជប៉ុន និងបស្ចិមប្រទេសនៅក្នុងទីផ្សាររបស់កម្ពុជា ប្រហែលជាត្រូវរង្គោះរង្គើដោយសាររថយន្ត Great Wall របស់ចិននៅចុងឆ្នាំនេះ ខណៈពេលដែលក្រុមហ៊ុននេះកំពុងតែសម្លឹងរកឱកាសពង្រីកខ្លួនតាមរយៈការសាងសង់រោងចក្រដំឡើងរថយន្តមួយនៅក្នុងរាជធានីភ្នំពេញ។
លោក ពាង ម៉ាន់ (Peang Mann) ប្រធានប្រតិបត្តិផ្នែកលក់រថយន្ត Great Wall របស់ក្រុមហ៊ុន Worldwide Garage Co.Ltd. ប្រចាំកម្ពុជាមានប្រសាសន៍កាលពីម្សិលមិញថា ការលក់នៅសាលតាំងបង្ហាញរបស់ក្រុមហ៊ុននេះនៅក្នុងរាជធានីភ្នំពេញ យឺតជាងការរំពឹងទុក ប៉ុន្តែប្រហែលជារើបឡើងវិញនៅពេលរោងចក្រដំឡើងរថយន្តបើកនៅក្នុងរាជធានីភ្នំពេញប្រហែលជានៅខែកញ្ញា។
លោកបានមានប្រសាសន៍សំដៅដល់ គ្រឿងបន្លាស់ប្រើប្រាស់សម្រាប់ដំឡើងរថយន្តថា “ក្នុងរយៈពេលបីឆ្នាំចុងក្រោយនេះចាប់តាំងពីមកកម្ពុជា យើងបានយល់ដឹងច្រើនអំពីឧស្សាហកម្មនេះ ហើយពេលនេះកំពុងត្រៀមខ្លួនបង្កើតរោងចក្រដំឡើង SKD មួយនៅក្នុងប្រទេសកម្ពុជា”។
លោក ពាង ម៉ាន់ បានមានប្រសាសន៍ថា បន្ទាប់ពីបើករោងចក្រដំឡើងរួច រថយន្តដែលផលិតនៅកម្ពុជា គឺជាប្រភេទរថយន្តមួយបាំងកន្លះ និងរថយន្ត SUVដែលមានតម្លៃចន្លោះពី២០.០០០ដុល្លារដល់៤០.០០០ដុល្លារ ប៉ុន្តែលោកបដិសេធមិនលាតត្រដាងទំហំវិនិយោគរបស់ Great Wall ទេ។
លោកគ្រាន់តែមានប្រសាសន៍ថា រោងចក្រនេះរំពឹងថា នឹងដំឡើងរថយន្តបានប្រហែល១.៥០០គ្រឿងក្នុងមួយឆ្នាំ ហើយនឹងនាំចូលគ្រឿងបន្លាស់ពីប្រទេសចិន និងប្រទេសម៉ាឡេសីុ។ កាលពីដើមខែនេះ រដ្ឋាភិបាលម៉ាឡេស៊ី បានផ្ដល់អាជ្ញាប័ណ្ណឲ្យក្រុមហ៊ុន Great Wall ដែលចាប់ដៃគូជាមួយក្រុមហ៊ុនផលិតរថយន្ត Go Automobile Manufacturing សាងសង់រោងចក្រដំឡើងរថយន្តមួយដែលមានទំហំទឹកប្រាក់២ពាន់លានដុល្លារ។
ក្រុមហ៊ុន Go Automobile គ្រោងផលិតរថយន្ត Great Wall នៅម៉ាឡេស៊ីចំនួន១០០.០០០គ្រឿងនៅឆ្នាំ២០១៨។
លោក ពាង ម៉ាន់ បានមានប្រសាសន៍ថា លោកមានសុទិដ្ឋិនិយមថា Great Wall នឹងអាចក្រោកឈររួចនៅក្នុងទីផ្សាររថយន្តរបស់កម្ពុជា ថ្វីបើទីផ្សារនេះត្រូវបានគ្រប់គ្រងដោយក្រុមហ៊ុនជប៉ុន និងក្រុមហ៊ុនបស្ចិមប្រទេសក៏ដោយ។
ក្រុមហ៊ុនតូយ៉ូតា អះអាងថា ខ្លួនគ្រប់គ្រងចំណែកទីផ្សារ៧០ភាគរយនៃទីផ្សាររថយន្តដ៏តូចរបស់កម្ពុជា។
លោក ពាង ម៉ាន់ បានព្យាករពីចំណែកទីផ្សារ៣០ភាគរយសម្រាប់ Great Wall ថា “ខ្ញុំមានការជឿជាក់ថា Great Wall និងម៉ូដែលរថយន្តចិនផ្សេងៗទៀត នឹងមានគុណភាពល្អស្មើ និងខ្ពស់ជាងដៃគូប្រកួតប្រជែង។ខ្ញុំមិនខ្លាចម៉ូដែលរថយន្តផ្សេងៗទេ។ យើងនឹងបង្កឲ្យមានឧបសគ្គធំ”។
ឈ្មួញរថយន្តយីហោល្បីៗនៅក្នុងប្រទេសកម្ពុជាបាននិយាយកាលពីម្សិលមិញថា ពួកគេមើលឃើញការគំរាមកំហែងតិចតួចនៅក្នុងការបើករោងចក្រដំឡើងរថយន្ត Great Wall មួយនៅភ្នំពេញ។
លោក លី ប៊ុនហៃ នាយកប្រតិបត្តិក្រុមហ៊ុន Toyota Cambodia Co. Ltd. បានមានប្រសាសន៍ថា “យើងមិនចាំបាច់ព្រួយបារម្ភទេ ពីព្រោះនេះជាទីផ្សារសេរី ហើយរហូតមកទល់ពេលនេះខ្ញុំគិតថា រថយន្តចិននៅទីនេះមានតិចតួចណាស់”។
លោក ហិុន សុភាព អនុប្រធានគ្រប់គ្រងផ្នែកលក់រថយន្ត Ford នៃក្រុមហុន RMA បានយល់ឃើញដូចលោក លី ប៊ុនហៃ ដែរ។
លោកមានប្រសាសន៍ថា “ខ្ញុំគិតថា គ្មានការបារម្ភទេសម្រាប់ Ford នៅកម្ពុជា។ យើងស្ថិតនៅក្នុងផ្នែកផ្សេងគ្នា ហើយអតិថិជនជាគោលដៅក៏ផ្សេងគ្នាដែរ”។ លោកបានមានប្រសាសន៍បន្ថែមទៀតថា Ford បានបិទរោងចក្រដំឡើង SKD របស់ខ្លួននៅកម្ពុជា កាលពីឆ្នាំមុន ដោយសារតែខ្វះខាតហិរញ្ញវត្ថុ៕សុខុម