28 C
Phnom Penh

តុលាការ​លើក​ឡើង​ថា ‘ការ​យល់​ច្រឡំ’ ភ្ជាប់​ព្រះសង្ឃ​ទៅ​នឹង​អ្នក​ប្រឆាំង

ដោយ ឌឹ ខេមបូឌា ដេលី

បទវិភាគ

នៅ​ពេល​ព្រះ​តេជគុណ លួន សុវ៉ាត ញញឹម​ពព្រាយ និមន្ត​ចូល​តុលាការ​ក្រុង​ភ្នំពេញ​កាលពី​ថ្ងៃ​អង្គារ សម្រាប់​ការ​ជំនំ​ុជម្រះ​ព្រះអង្គ​ពីបទ​នាំ​បំបះ​បំបោរ​ អ្នក​គាំទ្រ​ព្រះអង្គ​គ្រវី​ទង់​ជាតិ​រាប់សិប​នាក់​ដែល​ឈរ​ជា​ជួរ​នៅ​តាម​ចិញ្ចើម​ផ្លូវ បាន​អំពាវនាវ​ឲ្យ​ទម្លាក់​បទ​ចោទ​ប្រកាន់​លើ​សកម្មជន​ព្រះសង្ឃ​អង្គ​នេះ ខណៈ​ដែល​អ្នក​យក​ព័ត៌មាន​ជា​ច្រើន​នាក់​ចោមរោម​ព្រះអង្គ។sovath

កាលពី​ខែ​កញ្ញា ព្រះ​តេជគុណ លួន សុវ៉ាត ត្រូវ​បាន​កោះហៅ​ឲ្យ​ចូល​តុលាការ រួម​ជាមួយ​លោក សួន សេរី​រដ្ឋា អ្នក​ប្រឆាំង​មាន​មូលដ្ឋាន​នៅ​អាមេរិក ដើម្បី​ប្រឈម​នឹង​បទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ មាន​គម្រោង​វាយ​ប្រហារ និងរំខាន​ការ​បោះឆ្នោត​ជាតិ​កាលពី​ឆ្នាំ​មុន។

ការ​ចោទ​ប្រកាន់​ទាំង​នោះ​កើត​ចេញ​ពី​លោក សេរី រដ្ឋា ដែល​រៀបចំ​សកម្មជន​ក្នុង​ប្រទេស​កម្ពុជា ដើម្បី​ចែកចាយ​អាវយឺត​ដែល​អំពាវនាវ​ដល់​ប្រជាជន​កុំ​ឲ្យ​ទៅ​បោះ​ឆ្នោត និង​ចែក​ផ្កា​ដល់​ទាហាន​ភ្ជាប់​ជាមួយ​ស្ទីឃឺ ជំរុញ​ពួកគេ​ឲ្យ “បែរ​កាំភ្លើង​ប្រឆាំង​ជន​ផ្តាច់ការ”។

ក្នុង​សេចក្តី​ប្រកាស​ចេញ​ពេល​ជំនំុ​ជម្រះ អង្គការ​មិនមែន​រដ្ឋាភិបាល​ចំនួន​១៦​បាន​រិះគន់​តុលាការ​នេះ​យ៉ាង​ខ្លាំង ព្រោះ​ភ្ជាប់​ព្រះ​តេជគុណ លួន សុវ៉ាត ទៅ​នឹង​ករណី​របស់​លោក សួន សេរីរដ្ឋា។

ប៉ុន្តែ​នៅ​ម៉ោង​ប្រហែល​៩​និង​៣០​នាទី​ព្រឹក គឺ​មួយ​ម៉ោង​កន្លះបន្ទាប់ពី​នីតិវិធី​តុលាការ​គ្រោង​នឹង​ចាប់​ផ្តើម ចៅក្រម​ជំនុំ​ជម្រះ តុប ឈុនហេង បាន​បើក​សវនាការ​ដោយនិយាយ​ថា បទចោទ​លើ​ព្រះ​តេជគុណ លួន សុវ៉ាត ត្រូវ​បំបែក​ចេញ​ពី​សំណុំ​រឿង​របស់​លោក សេរីរដ្ឋា។

ពីរបី​នាទី​ក្រោយ​មក លោក មាស ចាន់ពិសិដ្ឋ ព្រះរាជអាជ្ញា​រង​បាន​ប្រកាស​ថា ដីកាកោះ​ហៅ​ព្រះ​សង្ឃ​អង្គ​នេះ គឺ​ដោយសារ​ “ការ​យល់​ច្រឡំ” ក្នុង​ចំណោម​មន្ត្រី​តុលាការ ហើយ​ថា​បទចោទ​ព្រះ​តេជគុណ លួន សុវ៉ាត មិន​ជាប់​ទាក់ទង​នឹង​បទ​ចោទ​លើ​លោក សេរីរដ្ឋា ទេ។

ចៅក្រម ឈុនហេង បាន​និយាយ​ថា “សវនាការ​នៅ​ថ្ងៃ​នេះ​មិន​ពាក់ព័ន្ធ​នឹង​ព្រះ​តេជគុណ លួន សុវ៉ាត” ទេ។

កាលពី​ឆ្នាំ​២០១២ សាលាដំបូង​ក្រុង​ភ្នំពេញ​បាន​ចោទ​ព្រះ​តេជគុណ លួន សុវ៉ាត ពីបទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ ព្រោះ​ការ​ចូលរួម​របស់​ព្រះអង្គ​ក្នុង​ការ​តវ៉ា​នៅ​ក្រុង​ភ្នំពេញ។

ព្រះ​តេជគុណ លួន សុវ៉ាត បាន​មាន​សង្ឃដីកា​ថា ព្រះអង្គ​បាន​ជួប លោក សេរីរដ្ឋា​តែម្តង​គត់ នៅ​អាមេរិក ក្នុង​ឆ្នាំ​២០១១ ហើយ​បាន​បដិសេធ​តួនាទី​ណាមួយ​ក្នុង​គម្រោង​របស់​គាត់។ មាន​សង្ឃដីកា​ទៅ​កាន់​អ្នកយក​ព័ត៌មាន​នៅ​ក្រៅ​តុលាការ​បន្ទាប់ពី​សវនាការ​កាលពី​ថ្ងៃ​អង្គារ ព្រះ​សង្ឃ​អង្គ​នេះ​បាន​ប្តេជ្ញា​បន្ត​ការ​ប្រយុទ្ធ​ដើម្បី​លើក​ស្ទួយ​សិទ្ធិ​មនុស្ស។

មុន​ពេល​និមន្ត​ទៅ​វត្ត​សាមគ្គីរង្សី​ក្នុង​ខណ្ឌ​មាន​ជ័យ​វិញ​ជាមួយ​អ្នក​គាំទ្រ​មួយ​ក្រុម​និង​ព្រះសង្ឃ​ផ្សេងទៀត​ដែល​មក​ជាមួយ ព្រះអង្គ​បាន​មាន​សង្ឃដីកា​ថា “អាត្មា​នឹង​បន្ត​ជួយ​សង្គម​និង​ជាតិ​របស់​យើង”។

មនុស្ស​៣​នាក់​ផ្សេងទៀត​ ដែល​បាន​ចូលរួម​ក្នុង​សវនាការ​នៅ​ថ្ងៃ​អង្គារ​ គឺ អុឹម ភារម្យ អាយុ​២៦​ឆ្នាំ សេរី ប៊ុនឡុង អាយុ​២៨​ឆ្នាំ និង សេង សុខម៉េង អាយុ​៣០​ឆ្នាំ បាន​ចូល​តុលាការ​ដោយ​មាន​អ្នកគាំទ្រ​តិចតួច។

ដៃ​ជាប់​ខ្នោះ​និង​ស្លៀក​ពាក់​ខោអាវ​ពន្ធនាគារ អ្នក​ទាំងបី​ដែល​ជាប់​ចោទ​ពី​បទ​បំពាន​ច្បាប់​បោះឆ្នោត​និង​ចូលរួម​ជាមួយ​ក្រុម​ប្រឆាំង​រដ្ឋាភិបាល ដើម្បី​ចែក​អាវ​យឺត​របស់​លោក សេរីរដ្ឋា កាលពី​ខែ​កក្កដា​ឆ្នាំ​មុន​នោះ ត្រូវ​បាន​សន្តិសុខ​បណ្តើរ​ចូល​បន្ទប់​តុលាការ ដែល​សឹងតែ​នៅ​ទំនេរ​បន្ទាប់ពី​ ព្រះ​តេជគុណ លួន សុវ៉ាត បាន​និមន្ត​ចេញ​ទៅ។

ក្នុង​ពេល​សាកសួរ អ្នក​ទាំង​៣​បាន​បដិសេធ​ថា​ ខ្លួន​មិនមែន​ជា​សមាជិក​នៃ​ចលនា​អំណាច​ប្រជាជន​ខ្មែរ​របស់​លោក សេរីរដ្ឋា ទេ និង​បាន​និយាយ​ថា ការ​ទាក់ទង​របស់​ពួកគេ​ជាមួយ​អ្នក​ប្រឆាំង​រូប​នេះ​មាន​តាម​រយៈ​ហ្វេសប៊ុក​ប៉ុណ្ណោះ។

លោក សេរីរដ្ឋា ដែលរស់នៅ​និរទេស​ដោយ​ខ្លួន​ឯង​ក្នុង​ប្រទេស​អាមេរិក បាន​សារភាព​ចំពោះ​ការ​រៀបចំ​សកម្មភាព​ទាំងពីរ​ពី​បរទេស ប៉ុន្តែ​បាន​លើក​ហេតុផល​ថា គ្មាន​សកម្មភាព​ណាមួយ​ជា​ឧក្រិដ្ឋកម្ម​ទេ។​ សវនាការ​របស់​ពួកគេ​គ្រោង​នឹង​បន្ត​នៅ​ថ្ងៃ​ទី​៩​ខែ​ធ្នូ​ខាង​មុខ​នេះ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស