មេដឹកនាំរបបលោកហ៊ុន សែនបានបញ្ជាឲ្យមន្ត្រីពាក់ព័ន្ធពិនិត្យមើលលទ្ធភាពដើម្បីដកមេបញ្ជាការយោធាខេត្តនិងអភិបាលរងខេត្តព្រះសីហនុ២រូបទៀតចេញពីតំណែង។
លោកហ៊ុន សែន ព្រមានដកមន្ត្រីទាំងនោះព្រោះលោករកឃើញថាពួកគេមានជាប់ពាក់ព័ន្ធករណីបង្ក្រាបពលរដ្ឋ ដោយហិង្សាក្នុងវិវាទដីធ្លីនៅឃុំបិទត្រាំង ស្រុកព្រៃនប់ ខេត្តព្រះសីហនុ កាលពីចុងខែមករា។
ក្នុងកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់នៅវិមានសន្តិភាពនៅថ្ងៃនេះ លោកហ៊ុន សែនបានបញ្ជាឲ្យពិនិត្យមើលលទ្ធភាពដកមេបញ្ជាការយោធាខេត្តព្រះសីហនុ លោកសាវិន វិបុលនិងអភិបាលរងខេត្ត២នាក់ទៀត ដែលពាក់ព័ន្ធនឹងការបង្ក្រាបករណីពលរដ្ឋតវ៉ារឿងដីធ្លីជាមួយប្រពន្ធឧកញ៉ាស៊ីវ គង់ទ្រីវ។
កាលពីថ្ងៃទី២៤មករា ព្រះរាជអាជ្ញារងអមសាលាដំបូងខេត្តព្រះសីហនុ លោកហួត វិចិត្រនិងអភិបាលរងខេត្តគឺលោកផៃ ប៊ុនវណ្ណៈ បានដឹកនាំកម្លាំងចម្រុះជាច្រើនរយនាក់ចុះអនុវត្តសាលដីកាវាស់វែងដីឱ្យអ្នកស្រីហុង សួនជាភរិយារបស់លោកឧកញ៉ាស៊ីវ គង់ទ្រីវដែលឈានទៅដល់ការប្រើអំពើហិង្សាលើពលរដ្ឋ។
មន្ត្រីនាំពាក្យកងរាជអាវុធហត្ថលើផ្ទៃប្រទេសលោកអេង ហ៊ី ធ្លាប់បានអះអាងថា គ្រាប់កាំភ្លើងដែលបាញ់ចំកម្មករសំណង់នោះមិនមែនជាគ្រាប់កាំភ្លើងរបស់សមត្ថកិច្ចក្នុងពេលចុះប្រតិបត្តិការឡើយ។
លោកថា អង្គភាពយោធាបានសម្រេចព្យួរការងារមន្ត្រីអាវុធហត្ថម្នាក់ ដែលបានប្រើអំពើហិង្សាទៅលើពលរដ្ឋខណៈពលរដ្ឋរូបនោះជាប់ខ្នោះដៃព័ទ្ធមកខាងក្រោយ និងលុតជង្គង់លើដីរួចទៅហើយ។
បន្ថែមពីនេះ មេបញ្ជាការរងកងរាជអាវុធហត្ថខេត្តព្រះសីហនុ និងមន្ត្រី៣នាក់ទៀតក៏ត្រូវបានអង្គភាពកងរាជអាវុធហត្ថលើផ្ទៃប្រទេសដាក់ពិន័យដោយការស្ដីបន្ទោសជាលាយលក្ខណ៍អក្សរប៉ុន្តែលោកមិនទាន់ប្រាប់ពីការដាក់ទោសទណ្ឌទៅលើមន្ត្រីទាំងនោះទេ។
ទោះជាយ៉ាងណាក៏ដោយ ក្រុមប្រជាពលរដ្ឋក៏បានជំរុញឲ្យសមត្ថកិច្ចចាត់វិធានការទៅលើអភិបាលរងខេត្តមួយរូបទៀតឈ្មោះស្រ៊ុន ស្រ៊ាន់តែងតែដឹកនាំកម្លាំងចម្រុះចុះបង្ក្រាបពលរដ្ឋករណីវិវាទដីធ្លីនៅខេត្តមួយនេះផងដែរ។ កាលពីដើមខែនេះ លោកស ខេងបានអះអាងថា ការយកកម្លាំងយោធាណាមួយដើម្បីអនុវត្តសាលដីការបស់តុលាការដើម្បីបង្ក្រាបពលរដ្ឋគឺជារឿងខុសច្បាប់ទាំងស្រុងហើយលោកជំរុញឱ្យអាជ្ញាធរខេត្តទាំងអស់ត្រូវពិនិត្យមើលនិងប្រុងប្រយ័ត្នចំពោះករណីបែបនេះ៕