29 C
Phnom Penh

អ្នក​វិភាគ​ថា​ កម្ពុជា​នឹង​បាត់​ប្រយោជន៍​និង​មុខ​មាត់​ជាតិ​ ដោយ​សារ​នយោបាយ​ក្តោប​ក្តាប់​អំណាច​របស់​លោក​ហ៊ុន សែន​

ដោយ ឌឹ ខេមបូឌា ដេលី

បទវិភាគ

អ្នក​វិភាគ​នយោបាយ​ឯករាជ្យ​លើក​ឡើង​ថា​ មេ​ដឹកនាំ​របប​ក្រុង​ភ្នំពេញ​កំពុង​ដើរ​ទៅ​រក​ផ្លូវ​ដ៏​គ្រោះ​ថ្នាក់​បំផុត​ ដោយសារ​កម្ពុជា​នឹង​បាត់បង់​ឱកាស​ដែល​ជា​ប្រយោជន៍​សេដ្ឋកិច្ច​ជាតិ​ដ៏​ធំធេង​ជាមួយ​មហា​អំណាច​ពិភព​លោក​ទាំង​សហ​ភាព​អឺរ៉ុប​និង​សហ​រដ្ឋ​អាមេរិក។​

អ្នក​វិភាគ​នយោបាយ​ឯករាជ្យ​លោក​គឹម សុខ​បាន​សរសេរ​នៅ​លើ​ហ្វេសបុក​ផ្ទាល់​ខ្លួន​របស់​លោក​ថា​ ជំនួប​កំពូល​រវាង​មេ​ដឹកនាំ​សហ​រដ្ឋ​អាមេរិក​ លោក​ដូណាល់​ត្រាំ​(Donal Trump)​ ជាមួយ​មេ​ដឹកនាំ​កូរ៉េខាង​ជើង​លោក​គីម ជុងអ៊ុន​(Jong-Un Kim)​ នៅ​ប្រទេស​វៀតណាម​ បាន​បង្ហាញ​យ៉ាង​ច្បាស់​ថា​ របប​លោ​ ហ៊ុន សែន​ មិន​ចេះ​ធ្វើ​កិច្ចការ​ទូត​ដើម្បី​ប្រយោជន៍​សេដ្ឋកិច្ច​ជាតិ​នោះ​ឡើយ។​

លោក​ឃើញ​ព្រឹត្តិ​ការណ៍​ដ៏​សំខាន់​នេះ​មាន​ការ​ចាប់​អារម្មណ៍​ច្រើន​ពី​សារ​ព័ត៌មាន​អន្តរជាតិ​ជា​ច្រើន ​និង​ឃើញ​មេ​ដឹកនាំ ​វៀតណាម​ទទួល​ស្វាគមន៍​យ៉ាង​កក់​ក្ដៅ​ចំពោះ​មេ​ដឹក​នាំ​ប្រទេស​ទាំងពីរ​ ព្រម​ទាំង​ស្វាគមន៍​ដល់​ក្រុម​អ្នក​កាសែត​ល្បីៗ​ផង។​​

លោក​គឹម សុខ​អះអាង​ថា​ លោក​ពិត​ជា​ស្រណោះ​ដល់​កម្ពុជា​និង​ប្រជារាស្ត្រ​ខ្មែរ​ ដែល​នឹង​បាត់បង់​ប្រយោជន៍​ដ៏​ធំធេង​ និង​បាត់បង់​មុខមាត់​លើ​ឆាក​អន្តរជាតិ ​ដោយសារ​តែ​ជំងឺ​ឆ្កួត​នឹង​ នយោបាយ​របស់​លោក​ ហ៊ុន ​សែន ​និង​គណៈ​បក្ស​គ្រួសារ​និយម​របស់លោក​ហ៊ុន សែន​ព្រមទាំង​មន្ត្រី​ក្រោម​ឱវាទ​ផង។​

អ្នក​វិភាគ​រូប​នេះ​មើល​ឃើញ​ថា ​វៀតណាម​ដែល​ជា​អតីត​សត្រូវ​ក្នុង​សង្គ្រាម​​ឥណ្ឌូចិន​​លើក​ទីពីរ​ ជាមួយ​សហ​រដ្ឋ​អាមេរិក​បាន​ក្លាយ​ជាដៃគូ​សេដ្ឋកិច្ច-ពាណិជ្ជ​កម្ម​ធំ​មួយ​របស់​អាមេរិក​ទៅវិញ។ ​វៀតណាម​បាន​ឆក់​ឱកាស​ប្រយោជន៍​តម្លៃ​ម៉ឺនលាន​ដុល្លារ​ ក្នុង​ការ​រៀបចំ​ជំនួប​កំពូល​លើក​ទីពីរ​រវាង​មេ​ដឹកនាំ​សហ​រដ្ឋ​អាមេរិក​និង​កូរ៉េ​ខាង​ជើង​នេះ។​

លោក​ថា​ នេះជា​រូបភាព​នៃភាព​វៃឆ្លាត​ខាង​កិច្ចការ​ការ​ទូត សេដ្ឋ​កិច្ច ពាណិជ្ជ​កម្ម​បន្ថែម​លើ​យុទ្ធសាស្ត្រ​រក​ជម្រក​ឆ័ត្រ​ការពារ​ផ្នែក​យោធា​ពី​សហ​រដ្ឋ​អាមេរិក​ដើម្បី​ទប់ទល់​នឹង​ចិន។​

យ៉ាង​នេះ​ក្តី ​កាលពី​ខែ​មករា ​និង​នៅ​ខែកុម្ភៈ ​លោក​ហ៊ុន សែន​បាន​ប្រកាស​ម្តង​ហើយ​ម្តង​ទៀត​ថា ​កម្ពុជា​នឹង​មិន​ស្លាប់​នោះ​ទេ។​​ ប្រសិន​បើ​គ្មាន​ប្រព័ន្ធ​អនុគ្រោះ​ពន្ធ​ EBA ​និង​GSP​ ក៏​កម្ពុជា​មិន​ស្លាប់​ដែរ​ផ្ទុយ​ទៅវិញ​គឺ​កាន់​តែ​ធ្វើ​ឱ្យ​ប្រទេស​នេះ​ខ្លាំងក្លា​ទៅ​វិញ។​

មិនតែ​ប៉ុណ្ណោះ ​លោក​ហ៊ុន សែន​មួយ​រយៈ​ពេល​ចុង​ក្រោយ​ក៏​បាន​បង្ហើប​ពី​លទ្ធភាព​កសាង​អំណាច​បន្ត​ត្រកូល​របស់​ខ្លួន​ ដោយ​ថា​ កូន​ប្រុស​ច្បង​របស់​លោក​គឺ​លោក​ហ៊ុន ម៉ាណែត​នឹង​ក្លាយ​ជា​មេ​ដឹកនាំ​នៅ​កម្ពុជា​ផង​ដែរ។​

ជាក់​ស្តែង​លោក​ហ៊ុន ម៉ាណែត​ត្រូវ​បាន​លោក​ហ៊ុន សែន​តែងតាំង​ជា​បន្ត​បន្ទាប់​ ទាំង​តំណែង​ក្នុង​គណបក្ស​ប្រជាជន​កម្ពុជា​ដោយ​លោក​បាន​ក្លាយ​ជា​សមាជិក​គណៈ​កម្មាធិការ​អចិន្ត្រៃយ៍​របស់​បក្ស ​និង​នៅ​ក្នុង​ជួរ​កងទ័ព​ ដោយ​ចុង​ក្រោយ​នេះ ​លោក​ហ៊ុន ម៉ាណែត​បាន​ក្លាយ​មេ​បញ្ជាការ​កងទ័ព​ជើង​គោក​កម្ពុជា។​

លើស​ពី​នេះ​ទៀត ​កូន​ប្រុស​ច្បង​លោក​ហ៊ុន សែន​រូប​នេះ​ក៏​ត្រូវ​បាន​មេ​ដឹកនាំ​របប​ក្រុង​ភ្នំពេញ​ចាប់​ផ្តើម​ឱ្យ​ចេញ​មុខ​កាន់​តែខ្លាំង​ដើម្បី​កសាង​ប្រជា​ប្រិយភាព​នៅលើ​ឆាក​អន្តរជាតិ ​ដោយ​ពេល​ខ្លះ​លោក​បាន​ដើរ​តួនាទី​ជា​ថ្នាក់​ដឹកនាំ​ជំនួស​ឱ្យ​ឪពុក​របស់​ខ្លួន​ជាមួយ​បណ្តា​ប្រទេស ​និង​បណ្តា​វេទិកា​អន្តរជាតិ​ធំៗ​ទៀត​ផង។​

យ៉ាងណា​ក៏​ដោយ​ អ្នក​វិភាគ​មើល​ឃើញ​ថា​ ប្រសិន​បើ​អំណាច​បន្ត​ត្រកូល​នេះ​កើត​ឡើង​ដោយ​ការ​បោះឆ្នោត​ត្រឹមត្រូវ ​និង​យុត្តិធម៌​គឺ​​មិន​ចោទ​ជា​បញ្ហា​ប៉ុន្មាន​ទេ​ ប៉ុន្តែ​អំណាច​បែប​នេះ​នឹង​មាន​ការ​មិន​ពេញ​ចិត្តទាំង​ក្នុង​ជួរ​គណបក្ស​និង​ពលរដ្ឋ​ទូទៅ ​ប្រសិន​បើវា​កើត​ឡើង​ដោយ​អយុត្តិធម៌​ហើយ​នឹង​អាច​នាំ​កម្ពុជា​ឆ្ពោះ​វិថី​ដ៏សែន​គ្រោះ​ថ្នាក់​ផង​ដែរ៕​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស