ក្នុងឱកាសអបអរទិវានារីអន្តរជាតិលើកទី១០៨ដែលនឹងប្រព្រឹត្តទៅនៅថ្ងៃទី៨ ខែមីនាខាងមុខនេះ ក្រុមសង្គមស៊ីវិលក្នុងចំនួន១២ស្ថាប័នបានជំរុញឲ្យរដ្ឋាភិបាលបញ្ឈប់ការប្រើប្រាស់អំពើហិង្សានិងការគំរាមកំហែងលើស្ត្រី អ្នកការពារសិទ្ធិមនុស្សនៅពេលដែលពួកគេចុះអប់រំពលរដ្ឋនៅតាមមូលដ្ឋាន។
ពួកគេបានទាមទារឲ្យរដ្ឋាភិបាលបញ្ឈប់ការរារាំងសកម្មជនសិទ្ធិមនុស្សក្នុងការជួបប្រជុំ និងដើរហែក្បួននៅតាមទីសាធារណៈដើម្បីទាមទាររកយុត្តិធម៌។
ក្រុមអង្គការក្រៅរដ្ឋាភិបាលទាំងនេះអះអាងថា កន្លងមកអាជ្ញាធរមួយចំនួនក៏បានប្រើប្រាស់ប្រព័ន្ធតុលាការដើម្បីបំបិទសំឡេងរបស់ស្រ្តីជាសកម្មជនសិទ្ធិមនុស្សតាមរយៈការចោទប្រកាន់ពីបទបរិហារកេរ្តិ៍និងបទបំផ្លិចបំផ្លាញលើទ្រព្យសម្បត្តិឯកជនជាដើម។
ជាងនេះទៅទៀតពួកគេក៏បានស្នើឲ្យមានការដោះស្រាយបញ្ហាមួយចំនួនទៀតដូចជា បញ្ឈប់អំពើហិង្សាផ្លូវភេទលើស្ត្រីនៅកន្លែងការងារ ពង្រឹងយន្តការការពារសិទ្ឋិពលករចំណាកស្រុកពីការកេងប្រវ័ញ្ចការងារ ការជួញដូរមនុស្ស និងទាសភាពសម័យទំនើប និងបញ្ហាផ្សេងៗជាច្រើនទៀត៕