28 C
Phnom Penh

អត្រា​កុមារ​មាន​ជំងឺ​គ្រុន​ឈាម​មក​សម្រាក​ព្យាបាល​នៅ​មន្ទីរ​ពេទ្យ​គន្ធ​បុប្ផា​ក្នុង​ខេត្ត​សៀមរាប​កើន​ឡើង​គួរ​ឱ្យ​បារម្ភ​

ដោយ ឌឹ ខេមបូឌា ដេលី

បទវិភាគ

ចំនួន​កុមារ​មាន​ជំងឺ​គ្រុន​ឈាម​ ដែល​បាន​មក​សម្រាក​ព្យាបាល​នៅ​ក្នុង​មន្ទីរ​គន្ធ​បុប្ផា​ខេត្ត​សៀមរាប​មាន​ការ​កើន​ឡើង​គួរ​ឱ្យ​ព្រួយ​បារម្ភ​ បើ​ប្រៀប​ធៀប​ទៅ​នឹង​រយៈ​ពេល​ដូច​គ្នា​កាល​ពីឆ្នាំ​២០១៨។​ ​

ភ្នាក់​ការ​សារ​ព័ត៌មាន​កម្ពុជា​AKP​បាន​ដក​ស្រង់​សម្តី​លោក​ឃុន លាងឃុន​ អនុ​ប្រធាន​មន្ទីរ​ពេទ្យ​គន្ធ​បុប្ផា​ ជ័យ​វរ្មន័​ទី៧​ខេត្ត​សៀមរាប​ចុះ​ផ្សាយ​នៅ​ថ្ងៃនេះ​ថា ​កាលពី​ខែ​មករា​ឆ្នាំ​២០១៨​កុមារ​មាន​ជំងឺ​គ្រុន​ឈាម​មក​សម្រាក​ព្យាបាល​នៅ​មន្ទីរ​ពេទ្យ​នេះ​មាន​ប្រមាណ​៥០​នាក់​ប៉ុណ្ណោះ​ប៉ុន្តែ​សម្រាប់​ខែ​មករា​ឆ្នាំ​២០១៩​នេះ ​ចំនួន​កុមារ​ដែល​កើត​ជំងឺ​គ្រុន​ឈាម​មក​សម្រាក​ព្យាបាល​នៅ​ក្នុង​មន្ទីរ​ពេទ្យ​គន្ធ​បុប្ផា​ក្នុង​ខេត្ត​សៀមរាប​មាន​ចំនួន​ជាង​៦​រយ​នាក់​(៦៥០)​នាក់។​

ប្រភព​ដដែល​បញ្ជក់​ថា ​កុមារ​ដែល​មាន​ជំងឺ​គ្រុន​ឈាម​ ហើយ​បាន​មក​សម្រាក​ព្យាល​នៅ​ក្នុង​មន្ទីរពេទ្យ​គន្ធបុប្ផា​នេះ ​ភាគ​ច្រើន​មាន​ស្ថានភាព​ធ្ងន់ធ្ងរ​ ដោយ​ថា​ ករណី​ខ្លះ​ស្ទើរ​តែ​ជួយ​សង្គ្រោះ​មិន​បាន​ទៀត​ផង។​

លោក​ឃុន លាងឈុន​ក៏បាន​អំពាវនាវ​ឱ្យ​ពលរដ្ឋ​ទាំង​អស់ ​ឬ​មាតា​បីតា​សិស្ស​ត្រូវ​មាន​ការ​ប្រុង​ប្រយ័ត្ន​ខ្ពស់​ចំពោះ​ជំងឺ​នេះ​ប្រសិន​បើ​ឃើញ​កូន​របស់​ពួក​គាត់​ក្តៅ​ខ្លួន​ខ្លាំង​ក្នុង​រង្វង់​ពី​៣៩​ ទៅ​៤០​អង្សា​សេ​ ហើយ​ប្រើ​ថ្នាំ Paracetamol ​មិន​ត្រជាក់​នោះ​ ពួក​គេ​ត្រូវ​ប្រញាប់​បញ្ជូន​ក្មេង​ទាំង​នោះ​មក​កាន់​មន្ទីរ​ពេទ្យ​ជា​បន្ទាន់។​

ក្រសួង​សុខាភិបាល​ធ្លាប់​ប្រកាស​ថា​ ឆ្នាំ​២០១៨​កន្លង​ទៅ​គឺជា​ឆ្នាំ​ដែល​មាន​ការ​រាត​ត្បាត​ខ្លាំង​នៃ​ជំងឺ​គ្រុន​ឈាម។​ ក្រសួង​មួយ​នេះ​បាន​លើក​ឡើង​ថា ​ស្ថានភាព​ជំងឺ​គ្រុន​ឈាម​និង​មាន​ការ​រាត​ត្បាត​ខ្លាំង​នៅ​រៀង​រាល់​៥​ទៅ​៦​ឆ្នាំ​ម្តង។ ​ក្រសួង​សុខាភិបាល​ក៏​ធ្លាប់​ជំរុញ​ឲ្យ​ភាគី​ពាក់​ព័ន្ធ​គ្រប់គ្រង​ស្ថាន​ភាព​ជំងឺ​នេះ​ ហើយ​ចាត់​វិធាន​ការ​ជា​បន្ទាន់។​ ជំងឺ​គ្រុន​ឈាម​ជា​ជំងឺ​ដែល​ត្រូវ​បាន​ចម្លង​ពី​អ្នក​ដែល​មាន​ជំងឺ​ទៅ​មនុស្ស​ម្នាក់​ទៀត ​ដោយ​សារ​មូស​ខ្លា​ញី​ខាំ។​

ក្រសួង​ដដែល​នេះ​បាន​ណែនាំ​ពី​វិធី​ការពារ​មួយ​ចំនួន​ដល់​ពលរដ្ឋ​ថា​ ត្រូវ​កម្ចាត់​ជម្រក​មូស​ខ្លា​នៅ​ជុំវិញ​ផ្ទះ​របស់​ខ្លួន។ ​លើស​ពី​នេះ ​ក្នុង​ករណី​មាន​រោគ​សញ្ញា​ក្ដៅ​ខ្លួន​ខ្លាំង​ភ្លាមៗ​ ត្រូវ​ជៀស​វាង​ការ​ប្រើ​ប្រាស់​ពពួក​ឱសថ​អាស្ពីរីន​ ហើយ​ត្រូវ​ប្រញាប់​បញ្ជូន​អ្នក​ជំងឺ​ទៅ​រក​សេវា​ពិនិត្យ​ ដែល​នៅ​ជិត​បំផុត​បន្ទាប់​ពី​ក្ដៅ​ខ្លួន​ ដោយ​មិន​ឱ្យ​ហួសពី​៧២​ម៉ោង​នោះ​ឡើយ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស