36 C
Phnom Penh

ក្រសួង​មហាផ្ទៃ ​សម្រេច​បញ្ឈប់​ការ​ប្រើប្រាស់​ប្រព័ន្ធ​ទូរស័ព្ទ​នៅ​ក្នុង​ពន្ធនាគារ​

ដោយ ឌឹ ខេមបូឌា ដេលី

បទវិភាគ

ក្រសួង​មហា​ផ្ទៃ​បាន​សម្រេច​បញ្ឈប់​ការ​ប្រើ​ប្រាស់​ទូរស័ព្ទ​ទាំង​អស់​នៅ​ក្នុង​មណ្ឌល​អប់រំ​កែប្រែ​និង​ពន្ធនាគារ​ទូទាំង​ប្រទេស​ចាប់ពី​ថ្ងៃ​ទី​៤​មីនា​ត​ទៅ។​ អគ្គនាយដ្ឋាន​ពន្ធនាគារ​បញ្ជាក់​ថា​ ការ​សម្រេច​នេះ​ធ្វើ​ឡើង​ទៅ​តាម​បញ្ជា​របស់​លោក​ហ៊ុន សែន​ដើម្បី​ទប់​ស្កាត់​​បទ​ល្មើស​ចាប់​ជំរិត​និង​បញ្ហា​ផ្សព្វផ្សាយ​គ្រឿង​ញៀន។​

សេចក្តី​ណែ​នាំ​របស់​អគ្គ​នាយក​ដ្ឋាន​ពន្ធនាគារ​ដែល​ចេញ​ផ្សាយ​ជា​សាធារណៈ​កាលពី​ថ្ងៃទី​៤​ខែ​មីនា ​ហើយ​ដែល​សារ​ព័ត៌មាន​ The Cambodia Daily​ ទើប​ទទួល​បាន​នៅ​ថ្ងៃនេះ​ឲ្យ​ដឹង​ថា​ អគ្គនា​យកដ្ឋាន​ពន្ធនាគារ​នៃ​ក្រសួង​មហាផ្ទៃ ​បាន​បញ្ជា​ទៅ​ប្រធាន​មណ្ឌល​អប់រំ​កែប្រែ​ទូទាំង​ប្រទេស ​ឲ្យ​បញ្ឈប់​ការ​ប្រើ​ប្រាស់​ទូរស័ព្ទ​ និង​ការ​លួច​លាក់​ប្រើ​ប្រាស់​ទូរស័ព្ទ​ពី​សំណាក់​ជន​ជាប់​ឃុំ​នៅ​ក្នុង​ពន្ធនាគារ។​

លើសពី​នេះ​ត្រូវ​បង្កើន​ការ​បង្ការ​ ទប់ស្កាត់​រាល់​ការ​លួច​លាក់​នាំ​ ទូរស័ព្ទ​ចល័ត​ចូល​ក្នុង​មណ្ឌល​អប់រំ​កែប្រែ ​និង​ពន្ធនាគារ​ ហើយ​ត្រូវ​ពង្រឹង​ការ​ត្រួត​ពិនិត្យ ​ឆែកឆេរ​ ដក​ហូត​ទូរស័ព្ទ​ក្នុង​មណ្ឌល​អប់រំ​កែប្រែ​និង​ពន្ធនាគារ​ផង​ដែរ។​

ក្នុង​ករណី​រក​ឃើញ​ទូរ​ស័ព្ទ​ដែល​បម្រុង​នាំ​ចូល​ឬ​រក​ឃើញ​ទូរស័ព្ទ​ក្នុង​ពន្ធនាគារ​ ត្រូវ​ធ្វើ​កំណត់​ហេតុដក​ហូត​រក្សាទុក​និង​ចាត់​វិធាន​ការ​តាម​ច្បាប់ ​ឬ​ដាក់​ពិន័យ​តាម​បទ​បញ្ជា​ផ្ទៃ​ក្នុង​ចំពោះ​ជន​ប្រព្រឹត្ត​បទ​ល្មើស​ទៀត​ផង។​

កាលពី​ដើម​ឆ្នាំ​២០១៨​ លោក​ហ៊ុន សែន​ធ្លាប់​ព្រមាន​ដក​ប្រធាន​គុក​ព្រៃស ​និង​មន្ត្រី​ប៉ូលិស​នៅ​ទីនោះ​ចោល​ទៀត​ផង ​ដោយ​ថា ​បាន​អនុញ្ញាត​ឲ្យ​មន្ត្រី​បក្ស​សង្រ្គោះ​ជាតិ​ម្នាក់​ដែល​កំពុង​ជាប់​ឃុំ​នៅ​ពេល​នោះ​គឺ​លោក​មាជ សុវណ្ណារ៉ា​អាច​ប្រើ​ទូរសព័្ទ​បាន​នៅ​ក្នុង​ពន្ធនាគារ​ទាក់​ទង​ទៅខាង​ក្រៅ​បាន។​

ក្រៅពី​រឿង​នេះ ​លោក​ហ៊ុន សែន​ធ្លាប់​បាន​បង្ហើប​ថា​ មាន​ជន​ជាប់​ឃុំ​មួយ​ចំនួន​អាច​ប្រើ​ប្រព័ន្ធ​ទូរស័ព្ទ​ក្នុង​ពន្ធនាគារ​ដើម្បី​បញ្ជា​មក​ខាង​ក្រៅ​ដើម្បី​ប្រព្រឹត្ត​បទ​ល្មើស​បន្ថែម​ទៀត ​ដូច​ការ​ជួញ​ដូរ​គ្រឿង​ញៀន​ជាដើម៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស