តុលាការក្រុងភ្នំពេញនៅថ្ងៃអង្គារនេះ បានសម្រេចឃុំខ្លួនលោកឧកញ៉ា គិត ធាងម្ចាស់ក្លឹបកម្សាន្តRockជាបណ្ដោះអាសន្នពីបទចាត់ចែង សម្រួលឲ្យមានការប្រើប្រាស់គ្រឿងញៀនខុសច្បាប់ និងបទសមគំនិតក្រោយពីលោកគិត ធាង ត្រូវបានសាកសួរនៅស្នងការដ្ឋាននគរបាលជាតិរួច។
ក្លឹបកម្សាន្តRockជាកម្មសិទ្ធិរបស់លោកលោកឧកញ៉ាគិត ធាង ដែលជាបងប្រុសរបស់លោកឧកញ៉ាគិត ម៉េង ប្រធានក្រុមហ៊ុនRoyal Group ដែលក្តោបក្តាប់លើក្រុមហ៊ុនទូរស័ព្ទដៃMobitel ក្រុមហ៊ុនទូរទស្សន៍ CTN ទូរទស្សន៍CNC ទូរទស្សន៍MyTV ទូរទស្សន៍One TV និងក្រុមហ៊ុនជាច្រើនទៀត។ ទោះជាយ៉ាងណាក៏ដោយរដ្ឋមន្រ្តីក្រសួងមហាផ្ទៃលោកស ខេងអះអាងថា លោកឧកញ៉ាគិត ម៉េងដែលត្រូវជាប្អូនប្រុសរបស់លោកគិត ធាងមិនមានជាប់ពាក់ព័ន្ធនឹងបញ្ហាគ្រឿងញៀននេះឡើយ។
កាលពីម្សិលមិញសមត្ថកិច្ចបានចាប់ខ្លួនលោកគិត ធេងប៉ុន្មានម៉ោងក្រោយពីលោកហ៊ុន សែនបានបញ្ជាឲ្យចាប់ខ្លួនមេខ្លោងជួញដូរគ្រឿងញៀន នៅក្លឹបកម្សាន្តRockបន្ទាប់ពីសមត្ថកិច្ចបានបង្ក្រាបនឹងរឹបអូសគ្រឿងប្រហែល៥០គីឡូក្រាម ហើយឃាត់ខ្លួនមនុស្សជាង៣រយនាក់ កាលពីខែកុម្ភៈ។
លោកហ៊ុន សែនព្រមានថា ក្រសួងមហាផ្ទៃនឹងបន្តចាត់វិធានការលើបញ្ហានេះហើយតុលាការត្រូវតែប្រាកដថា ក្លឹបកម្សាន្តមួយនេះនឹងមិនអាចបើកដំណើរការឡើងវិញបានឡើយ។ លោកបន្តថា សម្រាប់ក្លឹបកម្សាន្តមួយនេះត្រូវមានការដាក់ទោសទណ្ឌឲ្យបានធ្ងន់ធ្ងរ ហើយត្រូវស្វែងរកមេខ្លោងដែលនៅក្រោយការជួញដូរគ្រឿងញៀនទាំងនេះ៕