ភរិយារបស់លោករ៉ាត់ រត្នមុនីគឺអ្នកស្រីឡុង គឹមហ៊ាងអះអាងថា អ្នកស្រីនឹងនៅតែបន្តទាមទារឱ្យស្ថានទូតរុស្ស៊ីធ្វើអន្តរាគមន៍មករដ្ឋាភិបាលខ្មែរដើម្បីដោះលែងប្តីរបស់ខ្លួនឱ្យមានសេរីភាពឡើងវិញ ដោយអ្នកស្រីនៅតែអះអាងដដែលថា ប្តីរបស់អ្នកស្រីគ្មានកំហុស ហើយការឃុំខ្លួនលោករ៉ាត់ រត្នមុនីគឺជារឿងអយុត្តិធម៌។
លើគណនីហ្វេសប៊ុករបស់អ្នកស្រីឡុង គឹមហ៊ាង នៅថ្ងៃនេះមានរូបថតជាច្រើនសន្លឹកស្តីពីសកម្មភាពទៅតវ៉ានៅមុខស្ថានទូតរុស្ស៊ីហើយអ្នកស្រីបានបានឱ្យដឹងថា អ្នកស្រីនឹងបន្តទាមទារឱ្យមានការដោះលែងប្តីរបស់អ្នកស្រីរហូតទទួលបានយុត្តិធម៌។
អ្នកស្រីអះអាងថា ការតវ៉ានៅថ្ងៃពុធនេះនៅខាងមុខទូតរុស្សីគឺជាការតវ៉ាលើកទី៩ហើយម្យ៉ាងទៀតគិតដល់ថ្ងៃនេះគឺមានរយៈពេល៩០ថ្ងៃ ឬ ស្មើនឹងបីខែដែលប្តីរបស់អ្នកស្រីត្រូវបានគេចាប់ដាក់គុកទាំងអយុត្តិធម៌។
ប្រធានសហព័ន្ធសហជីពសំណង់កម្ពុជាលោករ៉ាត់ រត្នមុនី កាលពីថ្ងៃទី១៣ខែធ្នូឆ្នាំ២០១៨ ត្រូវបានតុលាការកម្ពុជាចោទប្រកាន់នឹងបញ្ជូនទៅឃុំខ្លួននៅពន្ធនាគារព្រៃស ក្រោយលោកចូលរួមផលិតខ្សែភាពយន្តឯកសាររបស់ស្ថានីយ៍ទូរទស្សន៍រុស្ស៊ីRTគឺរឿង«ម្ដាយខ្ញុំលក់ខ្ញុំ»។
លោកត្រូវបានចោទប្រកាន់ក្រោមបទថា ញុះញង់ឲ្យមានការរើសអើងតាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីលោកត្រូវបានប្រទេសថៃចាប់បញ្ជូនត្រឡប់មកកម្ពុជាវិញ។
ប្រធានសហជីពរូបនេះ អាចនឹងត្រូវជាប់ទោសក្នុងពន្ធនាគារពី ១ ឆ្នាំ ទៅ ៣ឆ្នាំ ប្រសិនបើតុលាការរកឃើញថា មានកំហុសដូចការចោទប្រកាន់មែននោះ។
ទោះបីជាសំណុំរឿងនេះ ជាប់ពាក់ព័ន្ធនឹងអ្នកសារព័ត៌មាននៃប្រទេសរុស្ស៊ីក៏ដោយ ប៉ុន្តែមកទល់ពេលនេះស្ថានទូតរុស្ស៊ីប្រចាំប្រទេសកម្ពុជាគ្មានការឆ្លើយតបណាមួយជុំវិញករណីនេះទេ។ បន្ថែមពីនេះ សុំណុំរឿងផលិតវីដេអូឯកសាររឿង«ម្តាយខ្ញុំលក់ខ្ញុំ»នេះ ក្រៅពីលោករ៉ាត់ រត្នមុនីតុលាការក៏មិនបានកោះហៅអ្នកពាក់ព័ន្ធផ្សេងទៀតមកសួរនាំនោះឡើយ៕