30 C
Phnom Penh

ក្រសួង​មហា​ផ្ទៃ​ឱ្យ​អាជ្ញាធរ​រៀបចំ​វេទិកា​ពិគ្រោះ​យោបល់​ជាមួយ​​សង្គម​ស៊ីវិល​និង​សហគមន៍​ឱ្យ​បាន​ទៀង​ទាត់​

ដោយ ឌឹ ខេមបូឌា ដេលី

បទវិភាគ

រដ្ឋ​មន្ត្រី​ក្រសួង​មហា​ផ្ទៃ ​លោក​ស ខេង​បាន​ណែនាំ​ឲ្យ​អភិបាល​ខេត្ត​រាជធានី​ទាំងអស់​ត្រូវ​កំណត់​ពេល​វេលា​ឲ្យ​បាន​ជាក់​លាក់​ដើម្បី​រៀបចំ​វេទិកា​ពិគ្រោះ​យោបល់​សម្រាប់​ឆ្នាំ​២០១៩។​

ក្រសួង​មហា​ផ្ទៃ​បាន​ណែនាំ​ថា​ វេទិកា​នេះ​ត្រូវ​ធ្វើ​ឡើង​ រវាង​អាជ្ញាធរ​ដែនដី​មន្ត្រី​ជំនាញ​ជាមួយ​សមាគម​ អង្គការ​ក្រៅ​រដ្ឋាភិបាល​ និង​សហគមន៍​នានា​តាម​មូលដ្ឋាន​ឱ្យ​បាន​ទៀង​ទាត់​រាល់​ឆមាស​ឬ​ តាម​ការ​ចាំបាច់​រួច​ហើយ​ផ្ញើ​កាល​បរិច្ឆេទ​នៃ​វេទិកា​រៀបចំ​ពិគ្រោះ​យោបល់​ជូន​មក​ក្រសួង​មហា​ផ្ទៃ​វិញ។​

លិខិត​ជូន​ដំណឹង​របស់​ក្រសួង​មហាផ្ទៃ​ដែល​ចេញ​ផ្សាយ​ជា​សាធារណៈ​នៅថ្ងៃ​ទី​១៤​ខែ​មីនា​ដែល​បាន​ផ្ញើ​ទៅ​កាន់​អភិបាល​ខេត្ត​រាជធានី​ទាំង​ឡាយ​បញ្ជាក់​ថា ​ក្រោយ​ពេល​បញ្ចប់​អង្គ​វេទិកា​ រដ្ឋបាល​រាជធានី​ខេត្ត​ទាំងអស់​ត្រូវ​ធ្វើ​របាយ​ការណ៍​ជា​លាយ​លក្ខណ៍​អក្សរ​ស្តីពី​លទ្ធ​ផល​សំណើ ​សំណូម​ពរ​សំខាន់ៗ​ រួម​ទាំង​បញ្ហា​នានា​ដែល​មិន​អាច​ដោះ​ស្រាយ​បាន​នៅ​ក្នុង​សមត្ថ​កិច្ច​របស់​ខ្លួន ​ផ្ញើមក​ក្រសួង​មហា​ផ្ទៃ​ ដើម្បី​ស្នើសុំ​ការ​សម្រប​សម្រួល​និង​ជួយ​គាំទ្រ​ក្នុង​ការ​ដោះស្រាយ​បញ្ហា​ប្រឈម​ទាំង​នោះ​ផង​ដែរ។​

យ៉ាង​នេះ​ក្តី ​សេចក្តី​ណែនាំ​របស់​ក្រសួង​មហា​ផ្ទៃ​កន្លង​មក​ហាក់​ពុំ​សូវ​មាន​ប្រសិទ្ធ​ភាព​នោះ​ទេ។​ ជាក់​ស្តែង​កាលពី​ឆ្នាំ​មុន​ ក្រសួង​មហា​ផ្ទៃ​ក៏​ធ្លាប់​បាន​ចេញ​សេចក្តី​ណែនាំ​របស់​ខ្លួន​ឱ្យ​មាន​ការ​ចូលរួម​សហការ​ជាមួយ​អង្គការ​ សមាគម​ និង​សង្គម​ស៊ីវិល​ ក្នុង​ការ​បំពេញ​ការងារ​របស់​ពួក​គេ​តាម​មូលដ្ឋាន ​ដោយ​អាជ្ញាធរ​ត្រូវ​ជួយ​សម្រួល​ និង​ចុះ​បំពេញ​ការងារ​ដោយ​ពុំចាំ​បាច់​ជូន​ដំណឹង​មក​អាជ្ញាធរ​នោះ​ឡើយ ​ប៉ុន្តែ​ជាក់​ស្តែង​ការ​បំពេញ​ការងារ​ ឬ​ជួប​ជុំ​របស់​អង្គការ​ និង​សមាគម​មួយ​ចំនួន​តែង​ត្រូវ​បាន​អាជ្ញាធរ​រារាំង ​និង​ហាម​ឃាត់​មិន​ឱ្យ​ធ្វើ​វេទិកា​នោះ​ឡើយ។

បណ្តាញ​សម្ព័ន្ធ​សហគមន៍​កសិករ​កម្ពុជា​នៅ​ខេត្ត​ស្វាយរៀង​កាលពី​ចុង​ឆ្នាំ​២០១៨​ក៏ធ្លាប់​ត្រូវ​បាន​អាជ្ញាធរ​មូលដ្ឋាន​ចុះ​ហាម​ឃាត់​មិន​ឱ្យ​រៀប​ចំ​វគ្គ​បណ្តុះ​បណ្តាល​ពល​រដ្ឋ​ពី​របៀប​ចិញ្ចឹម​មាន់​ ក្រោម​ហេតុ​ផល​ថា​ គ្មាន​ច្បាប់​អនុញ្ញាត។​

ដោយ​ឡែក​ទិវា​សិទ្ធិ​នារី​អន្តរជាតិ​៨​មីនា​លើក​ទី​១០៨​ កាល​ពី​ពេល​ថ្មីៗ​នេះ ​ដែល​រៀប​ចំ​ដោយ​បណ្តាញ​ស្ត្រី​និង​មាន​អ្នក​ចូលរួម​ប្រមាណ​៣​រយ​នាក់​ ក៏​ត្រូវ​បាន​អាជ្ញាធរ​របប​លោក​ហ៊ុន សែន​រារាំង​មិន​ឱ្យ​ពួក​គេ​អាច​ដើរ​ដង្ហែ​ក្បួន​ពី​ស្តាត​អូឡាំពិក​ទៅ​កាន់​ទីស្តី​ការ​គណៈ​រដ្ឋមន្ត្រី​ ដើម្បី​ដាក់​ញ្ញត្តិ ​ដែល​បង្ហាញ​ពី​ក្តី​កង្វល់​និង​តម្រូវ​ការ​របស់​ស្ត្រី​ឡើយ​ ដោយ​លើក​ហេតុផល​ថា​ សកម្ម​ភាព​របស់​ក្រុម​ស្ត្រី​ទាំង​នោះ​ធ្វើឱ្យ​ប៉ះពាល់​ដល់​សន្តិសុខ​ សណ្តាប់​ធ្នាប់​សាធារណៈ។​

លើស​ពី​នេះ ​ក៏​មាន​សកម្ម​ភាព​របស់​អង្គការ​ សមាគម​ និង​សហគមន៍​ ជាច្រើន​ទៀត​ស្ថិត​ក្រោម​ការ​ឃ្លាំ​មើល​យ៉ាង​យក​ចិត្ត​ទុក​ដាក់​ពី​អាជ្ញាធរ​មូលដ្ឋាន​ ដោយ​ពួក​គេ​ចាត់​ទុក​ថា​ សិទ្ធិ​ជួប​ជុំ​ និង​ការ​បំពេញ​ការងារ​របស់​អង្គការ​ សមាគម​ សង្គម​ស៊ីវិល​នៅតែ​រង​ការ​រឹតត្បិត​ដដែល៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស