28 C
Phnom Penh

មេ​ដឹកនាំ​របប​ក្រុង​ភ្នំពេញ​គ្រោង​ស្នើ​ថ្នាក់​ដឹកនាំ​កូរ៉េ​ខាងត្បូង​បើក​ទីផ្សារ​កាន់​តែ​ទូលាយ​ ខណៈ​ទីផ្សារ​អឺរ៉ុប​និង​អាមេរិក​កាន់​តែរួម​តូច​

ដោយ ឌឹ ខេមបូឌា ដេលី

បទវិភាគ

លោក​ហ៊ុន សែន​នៅ​ថ្ងៃ​ព្រហស្បតិ៍​នេះ​អះអាង​ថា​ ប្រធានាធិបតី​កូរ៉េខាង​ត្បូង​លោក​មូន ចេអ៊ីន​(Moon-Jae-In)​នឹង​ពិសារ​អាហារ​ពេល​ល្ងាច​ជាមួយ​លោក​ជា​លក្ខណៈ​គ្រួសារ​នៅ​កម្ពុជា។​ លោក​បន្ត​ថា​ ថ្នាក់​ដឹកនាំ​ទាំង​ពីរ​នៅ​ថ្ងៃ​ស្អែក​នេះ​នឹង​ធ្វើ​វេទិកា​ធុរកិច្ច​រួម​គ្នា​តែ​ម្តង។​

ថ្លែង​ក្នុង​ពិធី​បិទ​សន្និបាត​បូក​សរុប​ការងារ​នៅ​ក្រសួង​កសិកម្ម​រុក្ខា​ប្រមាញ់​ និង​នេសាទ​ នៅ​ព្រឹក​នេះ ​លោក​ហ៊ុន សែន​អះអាង​ថា​ លោក​គ្រោង​នឹង​ស្នើ​ឱ្យ​ប្រទេស​កូរ៉េ​ជួយ​ទិញ​ផលិត​ផល​ឬ​ទំនិញ​ពី​កម្ពុជា​ឱ្យ​បាន​កាន់​តែ​ច្រើន​ ដើម្បី​បើក​ទូលាយ​ទីផ្សារ​សម្រាប់​កម្ពុជា​បន្ថែម​ទៀត។​ លោក​ថ្លែង​ថា​ កម្ពុជា​មិន​ត្រូវ​ចំណុះ​តែ​ទីផ្សារ​ណា​មួយ​ ដែល​នឹង​អាច​ឱ្យ​ខ្លួន​ស្លាប់​ដោយ​សារ​គេ​ខ្ទប់​ច្រមុះ​នោះ​ឡើយ។​

ការ​ស្វះស្វែង​រក​ទីផ្សារ​អន្តរ​ជាតិ​បន្ថែម​ទៀត​ ពី​សំណាក់​មេ​ដឹក​នាំ​របប​ក្រុង​ភ្នំពេញ​នេះ​ធ្វើ​ឡើង​ក្រោយ​ពេល​សហគមន៍​អឺរ៉ុប​កំពុង​ដំណើរ​ការ​នីតិវិធី​ឈាន​ទៅ​ព្យួរ​ប្រព័ន្ធ​អនុ​គ្រោះ​ពន្ធ​EBA ​ពី​កម្ពុជា​ក្នុង​ពេល​ឆាប់ៗ។​ លើស​ពី​នេះ ​សមាជិក​រដ្ឋ​សភា​នៃ​សហ​រដ្ឋ​អាមេរិក​ពីរ​រូប​ ក៏បាន​ស្នើ​ឱ្យ​រដ្ឋបាល​លោក​ប្រធានាធិបតី​ដូណាល់ ត្រាំ​ពិនិត្យ​មើល​ឡើង​វិញ​នូវ​ប្រព័ន្ធ​អនុគ្រោះ​ពន្ធ​ទូទៅ​GSP​ពី​កម្ពុជា​ផង​ដែរ។​

ការ​ត្រៀម​ដាក់​ទណ្ឌកម្ម​សេដ្ឋ​កិច្ច​មក​លើ​កម្ពុជា​ពី​សំណាក់​សហភាព​អឺរ៉ុប​និង​អាមេរិក​នេះ​កើតមាន​ឡើង​ក្រោយ​ពេល​ពួក​គេ​បាន​រក​ឃើញ​ថា​ របប​មួយ​នេះ​បាន​បំផ្លាញ​មូលដ្ឋាន​គ្រឹះ​នៃ​លទ្ធិ​ប្រជា​ធិបតេយ្យ​និង​រំលោភ​សិទ្ធិ​មនុស្ស​ ព្រម​ទាំង​សិទ្ធិ​ការងារ​ធ្ងន់ធ្ងរ​ តាម​រយៈ​ការ​ចាប់​មេ​ដឹកនាំ​បក្ស​សង្គ្រោះ​ជាតិ​គឺ​លោក​កឹម សុខា​ដាក់​គុក​និង​ឃុំ​ក្នុង​ផ្ទះ​ជាង​១​ឆ្នាំ ​ដោយ​អយុត្តិធម៌​ ការ​រំលាយ​បក្ស​ប្រឆាំង​មួយ​នេះ​ចោល​និង​ដាក់​មន្ត្រី​ជាន់​ខ្ពស់​របស់គណ​បក្ស​នេះ​ជាង​១​រយ​នាក់​មិន​ឱ្យ​ធ្វើ​នយោបាយ​ព្រម​ទាំង​បិទ​សិទ្ធិ​សេរីភាព​សង្គម​ស៊ីវិល​ អង្គការ​ សមាគម ​សហជីព​ព្រម​ទាំង​រតត្បិត​សារ​ព័ត៌មាន​ឯករាជ្យ​ជា​ដើម។​

សេចក្តី​ប្រកាស​ព័ត៌មាន​របស់​ក្រសួង​ការ​បរទេស​កាលពី​ដើម​ខែ​មីនា​នេះ​បញ្ជាក់​ថា​ដំណើរ​ទស្សន​កិច្ច​ផ្លូវ​រដ្ឋ​ សម្រាប់​ប្រធានាធិបតី​កូរ៉េ​ខាង​ត្បូង​លោក​មូន ចេអ៊ីន​ជា​លើក​ដំបូង​នេះ​គឺ​មាន​រយៈ​ពេល​៣​ថ្ងៃ​ដោយ​ចាប់​ពី​ថ្ងៃ​ទី​១៤​ដល់​ថ្ងៃ​ទី​១៦​មីនា។ ​ក្នុង​អំឡុង​ពេល​ទស្សន​កិច្ច​នេះ ​លោក​មូន ចេអ៊ីន​នឹង​ចូល​គាល់​ព្រះ​មហា​ក្សត្រ​ខ្មែរ​ព្រះ​បាទ​សម្តេច​ព្រះ​បរមនាថ ​នរោត្តម ​សីហមុនី​ នៅ​ព្រះ​បរម​រាជវាំង​ ហើយ​នឹង​ជួប​ជា​មួយ​លោក​ហ៊ុន សែន។​

សេចក្តី​ប្រកាស​ព័ត៌មាន​នេះ​ឲ្យ​ដឹង​ទៀត​ថា​ លោក​មូន ចេអ៊ីន ​និង​លោក​ហ៊ុន សែន​នឹង​ពិភាក្សា​អំពី​ការ​ជំរុញ​ទំនាក់​ទំនង​ទ្វេភាគី​និង​ការ​ពង្រីក​កិច្ច​សហ​ប្រតិបត្តិការ​លើ​វិស័យ​នានា​បន្ថែម​ទៀត​ ហើយ​ក៏​ផ្លាស់​ប្តូរ​យោបល់​គ្នា​លើ​បញ្ហា​តំបន់​និង​អន្តរជាតិ​ដែល​ជា​កង្វល់​និង​ផល​ប្រយោជន៍​រួម។​

បន្ទាប់​ពី​បញ្ចប់​ជំនួប​នេះ ​ ថ្នាក់​ដឹកនាំ​ទាំង​ពីរ​នឹង​អញ្ជើញ​ធ្វើ​ជា​សាក្សី​ក្នុង​ពិធី​ចុះ​ហត្ថលេខា​លើ​កិច្ច​ព្រម​ព្រៀង​មួយ​ចំនួន​ព្រម​ទាំង​ធ្វើ​សេចកី្ត​ប្រកាស​ព័ត៌មាន​រួម​គ្នា​ផង​ដែរ។​

លើសពី​នេះ​ថ្នាក់​ដឹក​នាំ​នៃ​ប្រទេស​ទាំង​ពីរ​ រំពឹង​ថា​ នឹង​អញ្ជើញ​ថ្លែង​សុន្ទរកថា​ក្នុង​វេទិកា​ធុរកិច្ច​កម្ពុជា-សាធារណ​រដ្ឋ​កូរ៉េ​ដើម្បី​លើក​ទឹក​ចិត្ត​ឲ្យ​មាន​ការ​វិនិយោគ​ ការ​ផ្លាស់​ប្តូរ​សេដ្ឋ​កិច្ច​និង​ពាណិជ្ជ​កម្ម​កាន់តែ​ច្រើន​ឡើង ​រវាង​ប្រទេស​ទាំង​ពីរ​ទៀត​ផង។​

យ៉ាង​នេះ​ក្តី​ អ្នក​វិភាគ​នៅ​តែ​សម្តែង​ក្តី​បារម្ភ​ថា ​ប្រសិន​បើ​អឺរ៉ុប​និង​អាមេរិក​ដាក់​ទណ្ឌកម្ម​សេដ្ឋកិច្ច​ តាម​រយៈ​ដក​ប្រព័ន្ធ​អនុ​គ្រោះ​ពន្ធ​ពី​កម្ពុជា​មែន​នោះ​​នោះ​អ្នក​វិនិយោគ​ទុន​ នឹង​ងាក​ទៅ​បណ្តា​ប្រទេស​ផ្សេង​ទៀត​ ហើយ​កម្ពុជា​នឹង​ប្រឈម​វិបត្តិ​សង្គម​ធ្ងន់ធ្ងរ​ ពិសេស​ពលរដ្ឋ​រាប់​សែន​នាក់​​នឹង​គ្មាន​ការងារ​ធ្វើ​តែ​ម្តង៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស