បុគ្គលិករបស់សារព័ត៌មាន The Cambodia Dailyទាំងអស់សូមសម្តែងការសោកស្តាយ និងការអាឡោះអាល័យជាពន់ពេកចំពោះលោកBernard Krisherអ្នកកាសែត និងជាស្ថាបនិករបស់ស្ថាប័នសារព័ត៌មានមួយនេះក្នុងជន្មាយុ៨៧ឆ្នា។
លោកBernard Krisherជាប្រធានអង្គការជំនួយពិភពលោកសម្រាប់កម្ពុជានិងជាស្ថាបនិករបស់សារព័ត៌មានThe Cambodia Dailyបានទទួលមរណភាពដោយសារជំងឺគាំងបេះដូង កាលពីថ្ងៃទី៥ខែមីនានៅឯមន្ទីរពេទ្យក្នុងទីក្រុងតូក្យូ ប្រទេសជប៉ុនក្នុងវ័យ៨៧ឆ្នាំ។
មរណភាពរបស់លោកBernard Krisher ត្រូវបានក្រុមគ្រួសារផ្សព្វផ្សាយឲ្យដឹងជាសាធារណៈ ក្រោយពីការរៀបចំពិធីបញ្ចុះសពលក្ខណៈឯកជនមួយធ្វើឡើងនៅទីក្រុងញូវយ៉ក។
លោកKrisher បានចាប់ផ្តើមអាជីពរបស់លោកជាអ្នកឆ្លើយឆ្លងព័ត៌មានបរទេសនៅប្រទេសជប៉ុននិងបានចំណាយពេលវេលាប្រមាណបីទសវត្សរ៍ចុងក្រោយរបស់លោកចំពោះការងារមនុស្សធម៌នៅកម្ពុជា។
លោកមានដើមកំណើតជាជនជាតិជ្វីហ្វ។ លោក Krisher កើតនៅថ្ងៃទី៩ ខែសីហាឆ្នាំ១៩៣១ ក្នុងទីក្រុងFrankfurtប្រទេសអាឡឺម៉ង់ ហើយក្រុមគ្រួសារលោកបានភៀសខ្លួនទៅរស់នៅប្រទេសមួយចំនួននៅតំបន់អឺរ៉ុបដើម្បីគេចពីការធ្វើទុក្ខបុកម្នេញក្នុងពេលសង្គ្រាមកាលនោះ។
កាលពីវ័យកុមារលោកKrisherតែងមានបំណងចង់ក្លាយជាអ្នកសារព័ត៌មានរហូត និងបានប្រឡូកក្នុងអាជីពជាអ្នកព័ត៌មានតាំងពីនៅជំទង់មកម្ល៉េះ។ លោកBernard Krisherបានផ្លាស់ទៅរស់នៅប្រទេសជប៉ុនកាលពីឆ្នាំ១៩៦២ ហើយបន្ទាប់មកមានភរិយាជាជនជាតិជប៉ុនដោយចាប់ផ្តើមអាជីពជាអ្នករាយការណ៍ព័ត៌មានឲ្យកាសែត Newsweek ហើយក្រោយមកលោក ក៏បានក្លាយជាអតីតនាយកការិយាល័យព័ត៌មានNewsweek ប្រចាំនៅទីក្រុងតូក្យូ។
លើសពីនេះទៅទៀត លោកក៏ធ្លាប់ធ្វើជាអ្នកសារព័ត៌មានអន្តរជាតិផ្សេងទៀតដែរ ហើយធ្លាប់បានសម្ភាសន៍ជាមួយបុគ្គលល្បីៗ រាប់ទាំងនាយករដ្ឋមន្ត្រីជប៉ុន អ្នកនយោបាយ និងអ្នកជំនួញធំៗទៀតផង។
មិនតែប៉ុណ្ណោះ លោកធ្លាប់បានសម្ភាសជនដ៏ល្បីល្បាញបំផុតរបស់គាត់គឺការសម្ភាសន៍ផ្តាច់មុខមួយទល់នឹងមួយជាមួយអធិរាជជប៉ុនគឺព្រះចៅហ៊ីរ៉ូហ៊ីតុ មុនពេលដំណើរទស្សនកិច្ចជាប្រវត្តិសាស្រ្តរបស់ព្រះអង្គទៅកាន់សហរដ្ឋអាមេរិក កាលពីឆ្នាំ១៩៧៥។ រហូតដល់ឆ្នាំ១៩៩៣ លោក Krisherបានសម្រេចបង្កើតកាសែតThe Cambodia Dailyនៅកម្ពុជាតែម្តង។
កាសែតThe Cambodia Dailyគឺជាគម្រោងដំបូងរបស់លោកខាងផ្នែកកាសែតភាសាអង់គ្លេសនៅកម្ពុជាដែលមានភារកិច្ចរាយការណ៍ព័ត៌មានពិតឥតលម្អៀង ដែលបំពេញការងារដោយគ្មានការភ័យខ្លាច ហើយកាសែតនេះគឺជាកន្លែងបណ្តុះបណ្តាលសម្រាប់អ្នកកាសែតកម្ពុជានិងបរទេសផងដែរ។
កាសែតនេះបានបោះពុម្ពផ្សាយព័ត៌មានក្នុងស្រុកនិងអន្តរជាតិដល់អ្នកអាននៅក្នុងរាជធានីភ្នំពេញនិងតាមខេត្ត។ ជាអកុសលកាសែតនេះបានបង្ខំចិត្តបិទការិយាល័យរបស់ខ្លួននៅក្រុងភ្នំពេញកាលពីខែកញ្ញាឆ្នាំ២០១៧ ក្រោមការគាបសង្កត់ពីរបបក្រុងភ្នំពេញដោយហេតុផលថា កាសែតនេះមិនបានបង់ពន្ធរយៈពេល១០ឆ្នាំ ដែលបានបង្ខំឱ្យកាសែតមួយនេះបិទការិយាល័យរបស់ខ្លួនហើយនាំឲ្យមានការថ្កោលទោសជាខ្លាំងពីសហគមន៍អន្ដរជាតិទៀតផង។
ក្រៅពីការបង្កើតស្ថាប័នកាសែតThe Cambodia Daily លោកKrisherបានបង្កើតអង្គការមនុស្សធម៌ដោយមិនរកប្រាក់កម្រៃ ហើយមូលិធិនៃអង្គការនោះបានរួមចំណែកសាងសង់សាលារៀននិងមន្ទីរពេទ្យ យ៉ាងច្រើននៅកម្ពុជា។ រហូតមកដល់បច្ចុប្បន្ន លោកបានរកជំនួយមនុស្សធម៌ពីសប្បុរសជន និងដៃគូជំនួយ ដើម្បីរួមចំណែកកសាងសាលារៀនជាង៥៦០ខ្នងនៅតាមជនបទតាមបណ្តាខេត្តនៅទូទាំងប្រទេស។
គំរោងមួយក្នុងចំណោមគម្រោងជាច្រើន ដែលលោកពេញចិត្តបំផុតគឺមជ្ឈមណ្ឌលHope Center មន្ទីរពេទ្យព្រះសីហនុនិងនៅរាជធានីភ្នំពេញដែលផ្តល់ការថែទាំសុខភាពឥតគិតថ្លៃដល់អ្នកក្រ និងមជ្ឈមណ្ឌលអប់រំសម្រាប់កុមារ និងចិញ្ចឹមក្មេងកំព្រា ព្រមទាំងកុមារមកពីភូមិដាច់ស្រយាលដែលគ្មានលទ្ធភាពចូលរៀន។
មករណភាពលោកKrisherបានធ្វើឲ្យលោកលាចាកពីប្រពន្ធនិងកូនពីរនាក់ ព្រមទាំងចៅពីរនាក់ផងដែរ។ អ្វីដែលអស្ចារ្យសម្រាប់កម្ពុជានោះគឺស្នាដៃរបស់លោកទាំងការងារមនុស្សធម៌រាប់មិនអស់ និងការដឹកនាំឱ្យមានកាសែតជាភាសាបរទេសដែលឯករាជ្យមួយដើម្បីចូលរួមចំណែកកែប្រែសង្គមកម្ពុជា៕