ប្រមុខរដ្ឋស្តីទីលោកសាយ ឈុំ បានចេញព្រះរាជក្រឹត្យផ្តល់នីតិសម្បទានយោបាយដល់អតីតអ្នកតំណាងរាស្ត្រគណបក្សសង្រ្គោះជាតិចំនួនប្រាំរូប ដែលបានស្នើសុំសិទ្ធិធ្វើនយោបាយឡើងវិញ។
លិខិតដាច់ដោយឡែកពីគ្នាចំនួន៥ ដែលចេញដោយលោកសាយ ឈុំនៅថ្ងៃនេះបានផ្តល់នីតិសម្បទាឬសិទ្ធិធ្វើនយោបាយដល់អតីតតំណាងរាស្ត្រគណបក្សសង្រ្គោះជាតិទាំង៥រូប រួមមានលោកអ៊ូ ច័ន្ទរ័ត្ន លោកកង គឹមហាក់ លោកជីវ កត្តាលោកច័ន្ទ សិលា និង អ្នកស្រីទេព សុទ្ធី។ ការសម្រេចផ្តល់នីតិសម្បទានយោបាយដល់ក្រុមមន្រ្តីបក្សសង្គ្រោះជាតិទាំងប្រាំរូបនេះធ្វើឡើងក្រោយពីពួកគេបានដាក់សំណើទៅក្រសួងមហាផ្ទៃដើម្បីសុំសិទ្ធិធ្វើនយោបាយឡើងវិញ កាលពីថ្ងៃម្សិលមិញ។
កាលពីខែវិច្ឆិកាឆ្នាំ២០១៧ តុលាការកំពូលរបស់បក្សកាន់អំណាចបានរំលាយគណបក្សសង្រ្គោះជាតិចោល រំលាយតំណែងសមាជិកក្រុមប្រឹក្សាឃុំ សង្កាត់ ស្រុក ខណ្ឌ រាជធានី និងតំណែងតំណាងរាស្ត្ររបស់បក្សប្រឆាំងដ៏ធំមួយនេះចោល ព្រមទាំងដាក់មន្ត្រីជាន់ខ្ពស់ចំនួន១១៨នាក់របស់បក្សនេះមិនឱ្យធ្វើនយោបាយរយៈពេល៥ ឆ្នាំ។
រហូតមកទល់ពេលនេះ មានមន្ត្រីបក្សប្រឆាំងដែលជាប់បម្រាមចំនួន៩នាក់ ហើយដែលបានដាក់លិខិតស្នើសុំសិទ្ធិធ្វើនយោបាយឡើងវិញ ហើយក៏ទទួលបានការផ្តល់នីតិសម្បទាធ្វើនយោបាយឡើងវិញតាមការរៀបចំ និងចង់បានរបស់លោកហ៊ុន សែនផងដែរ។
លោកកង គឹមហាក់ បានថ្លែងប្រាប់កាសែតThe Cambodia Dailyកាលពីម្សិលមិញថា មន្រ្តីគណបក្សសង្គ្រោះជាតិជាតិជាច្រើនរូបទៀត នឹងដាក់ពាក្យស្នើសុំសិទ្ធិធ្វើនយោបាយជាបន្តបន្ទាប់ប៉ុន្តែលោកនៅមិនទាន់បញ្ជាក់ថា មានចំនួនប៉ុន្មាននាក់នោះឡើយ។
មន្ត្រីបក្សសង្រ្គោះជាតិដែលបានចាកចេញរបស់ដោយនាំគ្នាទៅសុំសិទ្ធិធ្វើនយោបាយពីលោកហ៊ុន សែននោះក៏រងការរិះគន់ពីសំណាក់មហាជន ពិសេសសាធារណជនដែលប្រើប្រាស់បណ្តាញសង្គមហ្វេសប៊ុក។ ការរិះគន់ទាំងនោះគឺបានជេរប្រមាថ និងចោទប្រកាន់អ្នកទាំងនោះថា ជាមនុស្សក្បត់បក្សក្បត់ឆន្ទៈរាស្ត្រ ហើយធ្វើនយោបាយដើម្បីលាភសក្ការៈទៀតផង៕