អភិបាលខេត្តកំពង់ស្ពឺ លោក វ៉ី សំណាង បានអះអាងថា ផ្ទាំងផ្សព្វផ្សាយគ្រឿងស្រវឹងដែលដាក់តាំងបង្ហាញតាមទីសាធារណៈ គឺបានរុះរើចេញអស់ ៨០% ហើយ។ ចំណែកឯផ្ទាំងគ្រឿងស្រវឹងដែលនៅសល់ លោកទុកពេលត្រឹមពាក់កណ្ដាលខែនេះ បើគ្មានការរុះរើទេ នោះក្រុមការងារអាជ្ញាធរខេត្តនឹងចុះរុះរើ ហើយក្រុមហ៊ុនលក់គ្រឿងស្រវឹងជាអ្នកទទួលខុសត្រូវលើថ្លៃចំណាយ។
គេហទំព័រសារព័ត៌មានថ្មីៗបានដកស្រង់សម្ដីលោក វ៉ី សំណាង អភិបាលខេត្តកំពង់ស្ពឺ ថា លោកអភិបាលខេត្តសាទរដែលឃើញពលរដ្ឋចូលរួមយ៉ាងច្រើនលើសលប់ក្នុងការរុះរើដោយស្ម័គ្រចិត្ត ដើម្បីជួយលើកកម្ពស់សោភណភាពខេត្ត។ ប៉ុន្តែចំនួនផ្ទាំងគ្រឿងស្រវឹងដែលនៅសេសសល់ភាគច្រើន គឺនៅតាមដងផ្លូវសាធារណៈដែលមិនមែននៅចំពីមុខផ្ទះរបស់ពលរដ្ឋ។
អភិបាលខេត្តរូបនោះបញ្ជាក់ថា អាជ្ញាធរទុកពេលឱ្យក្រុមហ៊ុនបន្ថែមដល់ថ្ងៃទី១៥ ខែមិថុនា ដើម្បីរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹង ឬស្លាកយីហោដែលជ្រកក្រោមស្លាកស្រាបៀឱ្យអស់ចេញពីខេត្តនោះ ដោយសារក្រុមហ៊ុនស្រាបៀទាំងនោះត្រូវការពេលជួលកម្មករ ខណៈស្ថានភាព Covid-19 កំពុងរីករាលដាលមិនងាយរកកម្មកររុះរើបានលឿននោះទេ។
រដ្ឋបាលខេត្តកំពង់ស្ពឺ បានជូនដំណឹងនៅថ្ងៃទី២៤ ខែឧសភា ឆ្នាំ២០២១ ដល់គ្រប់ម្ចាស់អាជីវកម្ម ភោជនីយដ្ឋាន អាហារដ្ឋាន កន្លែងលក់ភេសជ្ជៈ និងក្រុមហ៊ុនចែកចាយស្រាបៀទាំងអស់នៅក្នុងភូមិសាស្ត្រខេត្តកំពង់ស្ពឺ ឲ្យរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀនៅក្នុងភូមិសាស្ត្រនេះ។
រដ្ឋបាលខេត្តអះអាងថា ការដំឡើងផ្ទាំងផ្សព្វផ្សាយពាណិជ្ជកម្មស្រាបៀជាច្រើននៅតាមបណ្តោយចិញ្ចើមផ្លូវសាធារណៈនានា បានធ្វើឱ្យបាត់បង់នូវសោភណភាព សេចក្តីថ្លៃថ្នូរ របៀបរៀបរយ និងសណ្ដាប់ធ្នាប់សាធារណៈក្នុងភូមិសាស្ត្រខេត្តកំពង់ស្ពឺ។
វិធានការរបស់រដ្ឋបាលខេត្តកំពង់ស្ពឺ ត្រូវបានមហាជនសាទរ និងថានេះជាវិធានការល្អអាចជាគំរូដល់ខេត្តផ្សេងៗទៀតក្នុងការកាត់បន្ថយការផ្សាយពាណិជ្ជកម្មគ្រឿងស្រវឹង ដែលជំរុញទឹកចិត្តយុវជន និងពលរដ្ឋពិសាគ្រឿងស្រវឹង នាំឲ្យខូចសុខភាព ពិសាគ្រឿងស្រវឹងជាហេតុកើតមានគ្រោះថ្នាក់ចរាចរណ៍ និងប៉ះពាល់សណ្ដាប់ធ្នាប់សាធារណៈជាដើម។
អ្នកវិភាគនយោបាយ និងសង្គម លោកបណ្ឌិត ឡៅ ម៉ុងហៃ ធ្លាប់បានសរសើរអភិបាលខេត្តកំពង់ស្ពឺ ចំពោះការចេញបទបញ្ជាឲ្យរុះរើផ្ទាំងផ្សាយពាណិជ្ជកម្ម និងការបង្ហាញរូបភាពស្រាបៀនៅទីសាធារណៈថា សកម្មភាពនេះនឹងឈានទៅរកការចាប់ផ្តើមលើកស្ទួយសីលធម៌នៅក្នុងសង្គមខ្មែរឡើងវិញ។ លោកថា ប្រសិនបើបទបញ្ជាបែបនេះត្រូវបានអនុវត្តទូទាំងប្រទេស នឹងនាំឲ្យមានច្បាប់មួយហាមឃាត់មិនឲ្យមានគ្រប់រូបភាពនៃការផ្សព្វផ្សាយពាណិជ្ជកម្មគ្រឿងស្រវឹងគ្រប់ប្រភេទ។
បណ្ឌិត ឡៅ ម៉ុងហៃ ក៏ធ្លាប់លើកឡើងដែរថា ប្រទេសកាន់ព្រះពុទ្ធសាសនាថេរវាទមានចំនួន៥ គឺស្រីលង្កា ភូមា ថៃ ឡាវ និងខ្មែរ ហើយក្នុងចំណោមប្រទេសទាំងនេះ មានប្រទេស២ គឺស្រីលង្កា និងថៃ ហាមឃាត់មិនឲ្យមានការផ្សព្វផ្សាយពាណិជ្ជកម្មគ្រឿងស្រវឹង។ ចំណែកឯប្រទេសភូមា និងឡាវ ដាក់ការផ្សព្វផ្សាយក្រោមការគ្រប់គ្រងត្រួតពិនិត្យ។ រីឯប្រទេសកម្ពុជាវិញ ហាក់ដូចជាបណ្តោយឲ្យផ្សព្វផ្សាយដោយសេរីទៅវិញ៕