33 C
Phnom Penh

GDP ប្រកាស​ជំហរ​ចូលរួម​បោះឆ្នោត​ក្រុមប្រឹក្សា​ឃុំ-សង្កាត់​ដើម្បី​ផ្តល់​អ្នក​ដឹកនាំ​ល្អ​ជូន​ពលរដ្ឋ

ដោយ ឌឹ ខេមបូឌា ដេលី

បទវិភាគ

គណបក្ស​ប្រជាធិបតេយ្យ​មូលដ្ឋាន (គ.ប.ម.) បាន​ប្រកាស​ជំហរ​ក្នុង​ពិធី​សមាជ​វិសាមញ្ញ​របស់​ខ្លួន​ថា គណបក្ស​នេះ​នឹង​ចូលរួម​បោះឆ្នោត​ក្រុមប្រឹក្សា​ឃុំ-សង្កាត់​ឆ្នាំ​២០២២ ខាងមុខ​នេះ ដើម្បី​ផ្តល់​អ្នក​ដឹកនាំ​ល្អ ជាពិសេស​គឺ​មេឃុំ​ល្អ​ជូន​ពលរដ្ឋ​សម្រាប់​ដឹកនាំ​អភិវឌ្ឍ​នៅ​មូលដ្ឋាន​តាម​គោល​នយោបាយ​អភិវឌ្ឍន៍​ភូមិ​ឃុំ​របស់​ខ្លួន។

គណបក្ស​ប្រជាធិបតេយ្យ​មូលដ្ឋាន បាន​ប្រារព្ធ​ពិធី​សមាជ​វិសាមញ្ញ​របស់​ខ្លួន​នៅ​ថ្ងៃ​ទី​១០ ខែ​ធ្នូ ឆ្នាំ​២០២១ ដើម្បី​ធ្វើ​វិសោធនកម្ម​លក្ខន្តិកៈ​គណបក្ស និង​ប្រកាស​ជំហរ​ក្នុង​ការ​ចូលរួម​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​ឆ្នាំ​២០២២ ខាងមុខ ដែល​មាន​ការ​ចូលរួម​ពី​សមាជិក​របស់​ខ្លួន​ដែល​មកពី​តាម​បណ្តា​ខេត្ត​ជាច្រើន​របស់​កម្ពុជា។

គណបក្ស​នេះ​លើកឡើង​ថា បរិយាកាស​នយោបាយ​នៅ​កម្ពុជា​បច្ចុប្បន្ន​នេះ​កំពុង​ពេញ​និយម​ក្នុង​ការ​ដឹកនាំ​នយោបាយ​បែប​បុគ្គល​និយម ជាជាង​ការ​ដឹកនាំ​ដោយ​ការ​អនុវត្ត​តាម​បែប​ប្រព័ន្ធ​លទ្ធិប្រជាធិបតេយ្យ សេរី​ពហុ​បក្ស បើ​ទោះបីជា​ក្នុង​រដ្ឋធម្មនុញ្ញ​បាន​ចែង​អំពី​ការ​ប្រកាន់​របប​ប្រជាធិបតេយ្យ សេរី​ពហុ​បក្ស​ហើយ​ក៏ដោយ ដូច្នេះ គ.ប.ម. នឹង​ចូលរួម​កែប្រែ​ឱ្យ​កម្ពុជា​អនុវត្ត​តាម​គោលការណ៍​ប្រជាធិបតេយ្យ​ស្រប​តាម​រដ្ឋធម្មនុញ្ញ​របស់​ខ្លួន​វិញ។

ប្រធាន​គណៈកម្មាធិការ​នាយក​នៃ​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​លើកឡើង​ក្នុង​សមាជ​គណបក្ស​របស់​ខ្លួន​ថា គណបក្ស​របស់​លោក​បាន​ត្រៀម​ខ្លួន​រួចរាល់​ហើយ​ក្នុង​ការ​ចូលរួម​ប្រកួតប្រជែង​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​នៅ​ពេល​ខាងមុខ ហើយ​គណបក្ស​របស់​លោក​ក៏​បាន​ត្រៀម​បេក្ខជន​ក្រុមប្រឹក្សា​ដែល​មាន​សមត្ថភាព​ពិតប្រាកដ​សម្រាប់​ដឹកនាំ និង​បម្រើ​ប្រជាពលរដ្ឋ​នៅ​មូលដ្ឋាន​រួចរាល់​ហើយ​ដែរ។

បណ្ឌិត យ៉ង សាំងកុមារ អះអាង​ថា ក្រុម​របស់​លោក​នឹង​អនុវត្ត​នូវ​គំរូ​នយោបាយ​ថ្មី​តាម​គោលការណ៍​ប្រជាធិបតេយ្យ សេរី​ពហុ​បក្ស ដូចជា​ការ​កាត់បន្ថយ​ការ​រើសអើង​និន្នាការ​នយោបាយ​ចំពោះ​ការ​ផ្តល់​សេវា​សាធារណៈ​ប្រកប​ដោយ​ប្រសិទ្ធភាព និង​តម្លាភាព​ក្នុង​ការ​កសាង​ហេដ្ឋារចនាសម្ព័ន្ធ​រដ្ឋបាល​ភូមិ​ឃុំ​ឱ្យ​បាន​ល្អ​ប្រសើរ​សម្រាប់​ពលរដ្ឋ​ជា​ម្ចាស់​ឆ្នោត​ផង​ដែរ។

ប្រធាន​គណៈកម្មាធិការ​នាយក​រូប​នេះ​បញ្ជាក់​ថា ដើម្បី​ឱ្យ​ពលរដ្ឋ​ទទួល​បាន​ការ​អភិវឌ្ឍ​សម្បូរ​សប្បាយ​នៅ​មូលដ្ឋាន ការ​ចូលរួម​ការ​បោះឆ្នោត​ដោយ​ការ​ប្រកួតប្រជែង​លើ​គោល​នយោបាយ​សម្រាប់​អភិវឌ្ឍ​ប្រទេស​ជាតិ គឺ​ពិតជា​សំខាន់​ណាស់ ដែល​ជា​ផែនទី​បង្ហាញ​ផ្លូវ​សម្រាប់​អ្នក​នយោបាយ​ដែល​មាន​បំណង​ចង់​ចូលរួម​អភិវឌ្ឍ​ប្រទេស​ជាតិ​ដោយ​ពិតប្រាកដ។

គណបក្ស​ប្រជាធិបតេយ្យ​មូលដ្ឋាន (GDP) បង្កើត​ឡើង​តាមរយៈ​សមាជ​ដំបូង​កាលពី​ថ្ងៃ​ទី​២ ខែ​សីហា ឆ្នាំ​២០១៥ ដែល​បាន​ផ្ដួចផ្ដើម​ចេញពី​ក្រុម​ការងារ​បណ្ដាញ​សង្គម​ខ្មែរ​ដើម្បី​ខ្មែរ ដែល​មាន​អ្នក​គាំទ្រ​ជា​ប្រជាកសិករ​នៅ​តាម​មូលដ្ឋាន និង​អង្គការ​សង្គម​ស៊ីវិល​មួយ​ចំនួន ក្នុង​នោះ បណ្ឌិត កែម ឡី ក៏​ជា​ស្ថាបនិក​ម្នាក់​ដែល​ផ្ដួចផ្ដើម ជ្រោមជ្រែង និង​រៀបចំ​បង្កើត​គណបក្ស​នេះ​ផង​ដែរ។

គណបក្ស​ប្រជាធិបតេយ្យ​មូលដ្ឋាន ធ្លាប់​បាន​ចូលរួម​ប្រកួតប្រជែង​បោះឆ្នោត​ជ្រើសរើស​សមាជិក​ក្រុមប្រឹក្សា​ឃុំ-សង្កាត់​ឆ្នាំ​២០១៧ ម្តង​រួច​មក​ហើយ ក្នុង​នោះ​គណបក្ស​ទទួល​បាន​សំឡេង​ឆ្នោត​ជាប់​ជា​សមាជិក​ក្រុមប្រឹក្សា​ឃុំ​ចំនួន ៥​រូប​ផង​ដែរ។

កាលពី​ថ្ងៃ​ទី​១ ខែ​មីនា ឆ្នាំ​២០២១ ប្រមុខ​រដ្ឋាភិបាល​កម្ពុជា​បាន​ចេញ​សេចក្តី​សម្រេច​ស្ដីពី​ការ​កំណត់​កាលបរិច្ឆេទ​នៃ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ ក្នុង​ឆ្នាំ​២០២២ ខាងមុខ ដោយ​កំណត់​យក​ថ្ងៃ​ទី​៥ ខែ​មិថុនា ឆ្នាំ​២០២២ ជា​កំណត់។ ដូច្នេះ​ថ្ងៃ​បោះឆ្នោត​សកល​អាណត្តិ​ទី​៥ នៅ​មាន​រយៈពេល​កន្លះ​ឆ្នាំ​ទៀត​ប៉ុណ្ណោះ។

របាយការណ៍​ក្រសួង​មហាផ្ទៃ បាន​បង្ហាញ​ថា មក​ទល់​នឹង​ពេលនេះ​មាន​គណបក្ស​នយោបាយ​ប្រមាណ​ជិត ៤០ ហើយ​ដែល​ទទួល​បាន​សិទ្ធិ​ស្រប​ច្បាប់ ដើម្បី​ចូលរួម​ប្រកួតប្រជែង​ដណ្តើម​សន្លឹកឆ្នោត​ក្រុមប្រឹក្សា​ឃុំ-សង្កាត់​ឆ្នាំ​២០២២ និង​ការ​បោះឆ្នោត​ជាតិ​ឆ្នាំ​២០២៣ ខាងមុខ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស