 ប្រកាសប្រាប់សមាជិករបស់ខ្លួនថា ការធ្វើនយោបាយរបស់លោក គឺចាប់ផ្តើម និងបញ្ចប់នៅក្នុងតែគណបក្សប្រជាធិបតេយ្យមូលដ្ឋានមួយប៉ុណ្ណោះ ព្រោះការបំពេញភារកិច្ចក្នុងកិច្ចការនយោបាយរបស់លោក ធ្វើឡើងប្រកបដោយឆន្ទៈ សុទ្ធចិត្ត និងឧត្តមគតិ មិនមែនដើម្បីផលប្រយោជន៍ផ្ទាល់ខ្លួននោះទេ។){kind=link}
ប្រធានគណបក្សប្រជាធិបតេយ្យមូលដ្ឋាន (GDP) ប្រកាសប្រាប់សមាជិករបស់ខ្លួនថា ការធ្វើនយោបាយរបស់លោក គឺចាប់ផ្តើម និងបញ្ចប់នៅក្នុងតែគណបក្សប្រជាធិបតេយ្យមូលដ្ឋានមួយប៉ុណ្ណោះ ព្រោះការបំពេញភារកិច្ចក្នុងកិច្ចការនយោបាយរបស់លោក ធ្វើឡើងប្រកបដោយឆន្ទៈ សុទ្ធចិត្ត និងឧត្តមគតិ មិនមែនដើម្បីផលប្រយោជន៍ផ្ទាល់ខ្លួននោះទេ។
លោក យ៉េង វីរៈ បានសរសេរលើគណនីហ្វេសប៊ុករបស់លោកនៅថ្ងៃទី៣ មេសា នេះថា ការធ្វើបុរេវិនិច្ឆ័យជាច្រើនពីមជ្ឈដ្ឋាននានាមកលើរូបលោក រួមទាំងការជេរប្រមាថ ការលាបពណ៌ ការសើចចំអក ជាដើម បន្ទាប់ពីមន្ត្រីជាន់ខ្ពស់ក្នុងគណបក្សរបស់លោកបានលាឈប់ពីតួនាទី គឺដោយសារតែពួកគេមិនបានបើកចិត្ត និងមិនបានឈ្វេងយល់ពីហេតុផលចំពោះសិទ្ធិសេរីភាពរបស់បុគ្គលម្នាក់ៗតែប៉ុណ្ណោះ។
ប្រធានគណបក្សដែលកំពុងជួបព្យុះភ្លៀងរូបនេះបានលើកឡើងថា ការទទួលតំណែងជាប្រធានគណបក្សប្រជាធិបតេយ្យមូលដ្ឋាន គឺដោយសារមានការគាំទ្រពីសមាជិករបស់គណបក្ស ដូច្នេះដរាបណាលោកនៅតែទទួលបានការគាំទ្រពីសមាជិកបក្សឱ្យលោកបន្តកាន់តំណែងនេះ លោកនឹងព្យាយាមតស៊ូដឹកនាំគណបក្សទៅមុខដោយរក្សាគោលជំហរ និងគុណតម្លៃរបស់គណបក្សជានិច្ច។
លោក យ៉េង វីរៈ បញ្ជាក់ថា ការធ្វើសកម្មភាពនយោបាយដើម្បីជួយស្ដារលទ្ធិប្រជាធិបតេយ្យនៅកម្ពុជាបច្ចុប្បន្ននេះ មិនមែនជារឿងងាយស្រួលនោះទេ ដូច្នេះពលរដ្ឋម្ចាស់ឆ្នោតទាំងអស់ដែលមានតួនាទីជាអ្នកកំណត់វាសនាប្រទេសជាតិ សូមកុំមើលតែទៅលើសកម្មភាពបុគ្គលណាម្នាក់ក្នុងបក្សនយោបាយ ប៉ុន្តែត្រូវសិក្សាលើគោលនយោបាយ និងគោលជំហររួមរបស់គណបក្សផងដែរ។
កាលពីថ្ងៃទី២ ខែមេសា ឆ្នាំ២០២៣ ប្រធានគណៈកម្មាធិការនាយកស្តីទីរបស់គណបក្សប្រជាធិបតេយ្យមូលដ្ឋាន បណ្ឌិត សាម អ៊ីន បានសម្រេចចាកចេញពីគណបក្សរបស់ខ្លួនដែលលោកបានចូលរួមបង្កើតនោះ ទៅសុំរួមរស់ជីវភាពនយោបាយជាមួយបក្សប្រជាជនកម្ពុជាវិញ។ ភ្លាមៗនោះ លោក ហ៊ុន សែន ក៏បានតែងតាំងលោកជារដ្ឋលេខាធិការក្រសួងបរិស្ថានតែម្តង។
ការចាកចេញរបស់បណ្ឌិត សាម អ៊ីន ពីគណបក្សប្រជាធិបតេយ្យមូលដ្ឋាន បានធ្វើឱ្យគណបក្សនេះរងនូវការរិះគន់ពីមជ្ឈដ្ឋាននានា ស្របពេលដែលមន្ត្រីជាន់ខ្ពស់របស់បក្សនេះកាន់តែមានចំនួនតិចទៅៗ ខណៈអ្នកដែលរក្សាជំហរតស៊ូជាមួយគណបក្សនេះក៏ត្រូវរងនូវការរិះគន់ និងវាយប្រហារជាច្រើនថែមទៀត។
បណ្ឌិត សាម អ៊ីន គឺជាមនុស្សទី៤ ហើយដែលបានសម្រេចចេញពីបក្សរបស់ខ្លួនទៅសុំចូលរួមជីវភាពនយោបាយជាមួយគណបក្សប្រជាជនកម្ពុជា បន្ទាប់ពីបណ្ឌិត យ៉ង សាំងកុមារ លោក ខាត់ សុធី និងលោក ឡឹក សុធា ដែលបាននាំគ្នាសុំចូលរួមជីវភាពនយោបាយជាមួយបក្សកាន់អំណាចកាលពីចុងឆ្នាំ២០២២ កន្លងទៅនោះ។
កាលពីថ្ងៃទី២៧ ខែវិច្ឆិកា ឆ្នាំ២០២២ អតីតប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីជួយអភិវឌ្ឍវិស័យកសិកម្មដល់រដ្ឋាភិបាល។ ក្រោយជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃទី២៩ ខែវិច្ឆិកា ឆ្នាំ២០២២ បណ្ឌិត យ៉ង សាំងកុមារ ក៏ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទផងដែរ។
គណបក្សប្រជាធិបតេយ្យមូលដ្ឋានត្រូវបានបង្កើតឡើងកាលពីឆ្នាំ២០១៥ ដែលមានស្ថាបនិក ដូចជាបណ្ឌិត កែម ឡី បណ្ឌិត យ៉ង សាំងកុមារ បណ្ឌិត សាម អ៊ីន លោក យ៉េង វីរៈ និងអ្នកស្រី ប្រ៉ុក វ៉ាន់នី ជាដើម ប៉ុន្តែនៅពេលនេះ ស្ថាបនិកទាំងនេះបាននាំគ្នាចេញពីបក្សរបស់ខ្លួនបណ្តើរៗហើយ ដែលធ្វើឱ្យសមាជិកបក្សនេះមានការព្រួយបារម្ភពីអនាគតរបស់គណបក្សប្រជាធិបតេយ្យមូលដ្ឋានយ៉ាងខ្លាំង៕