មេដឹកនាំបក្សប្រឆាំងដែលមិនទាន់មានសេរីភាពពេញលេញ លោក កឹម សុខា លើកឡើងថា ការចូលរួមលើកកម្ពស់ និងការការពារសិទ្ធិមនុស្ស មិនអាចចាត់ទុកថាជាការលូកដៃចូលកិច្ចការផ្ទៃក្នុង ឬជាការរំលោភលើអធិបតេយ្យភាពនៃប្រទេសណាមួយនោះទេ។
ប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាព លោក កឹម សុខា បានសរសេរលើទំព័រ Facebook របស់លោកនៅថ្ងៃទី១០ ខែធ្នូ ថា ការមិនឲ្យតម្លៃសិទ្ធិមនុស្ស ការមិនគោរពសិទ្ធិគ្នាទៅវិញទៅមក ជាពិសេសការរំលោភសិទ្ធិមនុស្ស គឺជាដើមចមនៃជម្លោះទាំងឡាយដែលអាចរីករាលដាលរហូតដល់មានសង្គ្រាម នាំឲ្យពលរដ្ឋទទួលរងនូវការឈឺចាប់ វិនាសកម្ម និងឈានទៅបំផ្លាញសន្តិភាពរបស់ប្រទេសថែមទៀត។
លោក កឹម សុខា អះអាងថា ដើម្បីធានាការពារសន្តិភាព ស្ថិរភាព និងវឌ្ឍនភាពសង្គមឲ្យរឹងមាំ ត្រូវតែរួមគ្នាលើកស្ទួយ និងការពារសិទ្ធិមនុស្សជាមូលដ្ឋានឱ្យបានរឹងមាំ ត្បិតការលើកស្ទួយសិទ្ធិមនុស្សនេះ គឺជាមូលដ្ឋានគ្រឹះនៃសន្តិភាព និងវិបុលភាពយ៉ាងរឹងមាំសម្រាប់សង្គមជាតិទាំងមូល។
មេដឹកនាំបក្សប្រឆាំងរូបនេះបន្ថែមថា គុណតម្លៃនៃសិទ្ធិមនុស្សមិនអាចកាត់ថ្លៃបានឡើយ ព្រោះថាសិទ្ធិមនុស្ស គឺជាបញ្ហាសកលដែលតម្រូវឲ្យមានការចូលរួមលើកស្ទួយ និងការពារដើម្បីទាំងអស់គ្នា ហើយវាក៏ជាសេចក្តីត្រូវការចាំបាច់របស់មនុស្សក្នុងការរស់រានមានជីវិតមិនអាចខ្វះបានផងដែរ។
មេដឹកនាំបក្សប្រឆាំងអហិង្សា លោក កឹម សុខា បញ្ជាក់ថា ដោយសារការយល់ស្រប និងគាំទ្រនូវគុណតម្លៃសិទ្ធិមនុស្សនេះហើយ បានជាជាង ៣ទសវត្សរ៍ចុងក្រោយនេះ លោកតែងផ្តល់អាទិភាពលើការងារសិទ្ធិមនុស្សជានិច្ច ទោះបីលោកស្ថិតក្នុងឋានៈណាក៏ដោយ ក្នុងនាមលោកធ្លាប់បានសិក្សាស្រាវជ្រាវ អនុវត្ត និងពិសោធន៍ក្នុងកិច្ចការសិទ្ធិមនុស្សដោយផ្ទាល់នៅក្នុងប្រទេសកម្ពុជា ក្នុងតំបន់ និងលើឆាកអន្តរជាតិកន្លងមក។
ការអះអាងរបស់មេដឹកនាំបក្សប្រឆាំងបែបនេះ ដើម្បីចូលរួមអបអរសាទរខួបលើកទី៧៣ឆ្នាំ នៃទិវាសិទ្ធិមនុស្សអន្តរជាតិ ១០ ធ្នូ នៅថ្ងៃសុក្រ ចុងសប្តាហ៍នេះ។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១ ចែងថា ព្រះរាជាណាចក្រកម្ពុជាទទួលស្គាល់ និងគោរពសិទ្ធិមនុស្សដូចដែលមានចែងក្នុងធម្មនុញ្ញអង្គការសហប្រជាជាតិ សេចក្តីប្រកាសជាសកលស្ដីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយទាក់ទងនឹងសិទ្ធិមនុស្ស សិទ្ធិនារី និងសិទ្ធិកុមារ ដែលបានបង្កើតឡើងតាំងពីឆ្នាំ១៩៤៨ មក។
មាត្រា១ នៃសេចក្តីប្រកាសជាសកលស្ដីពីសិទ្ធិមនុស្ស ចែងថា មនុស្សទាំងអស់កើតមកមានសេរីភាព និងភាពស្មើគ្នាក្នុងសេចក្តីថ្លៃថ្នូរ និងសិទ្ធិ។
នៅក្នុងទិវាសិទ្ធិមនុស្ស ១០ ធ្នូ នេះ មេដឹកនាំបក្សកាន់អំណាច លោក ហ៊ុន សែន បានសរសេរលើទំព័រ Facebook របស់លោកថា សិទ្ធិសេរីភាពរបស់កម្ពុជាដែលមានដូចពេលបច្ចុប្បន្ននេះ គឺត្រូវបានរំដោះយកមកវិញនៅក្រោយពេលដែលរបបប្រល័យពូជសាសន៍ ប៉ុល ពត ត្រូវបានវាយផ្ដួលរំលំទាំងស្រុងនៅថ្ងៃទី០៧ ខែមករា ឆ្នាំ១៩៧៩។
លោក ហ៊ុន សែន បញ្ជាក់ថា បច្ចុប្បន្ន សិទ្ធិសេរីភាពបានធ្វើឲ្យពលរដ្ឋរស់នៅ និងប្រកបការងារតូចធំ ជ្រើសរើសជំនឿសាសនា និងសិទ្ធិបោះឆ្នោតជ្រើសតាំងមេដឹកនាំដែលខ្លួនពេញចិត្តដោយសេរី ហើយសិទ្ធិសេរីភាពក៏បានធ្វើឲ្យកម្ពុជាកាន់តែរីកចម្រើនជឿនលឿនទៅមុខដូចសព្វថ្ងៃនេះផងដែរ។
ទោះជាបែបនេះក្តី ស្ថានទូតសហរដ្ឋអាមេរិកប្រចាំនៅកម្ពុជា បានចុះផ្សាយលើទំព័រ Facebook របស់ខ្លួនដោយភ្ជាប់រូបថតមេដឹកនាំបក្សប្រឆាំងដែលកំពុងរងការរឹតត្បិតសេរីភាព លោក កឹម សុខា ដើម្បីអបអរទិវាសិទ្ធិមនុស្សអន្តរជាតិ ១០ ធ្នូ ដែរថា នៅក្នុងទិវាសិទ្ធិមនុស្សអន្តរជាតិនេះ ស្ថានទូតអាមេរិកអំពាវនាវឲ្យរដ្ឋាភិបាលកម្ពុជាទម្លាក់ចោលបទចោទប្រកាន់ទៅលើគ្រប់អ្នកទោសនយោបាយទាំងអស់ ព្រោះថាបើអំពើអយុត្តិធម៌កើតមានគ្រប់ទីកន្លែងនោះ ការគំរាមកំហែងក៏នឹងកើតមានគ្រប់ទីកន្លែងដូចគ្នាដែរ។
នៅថ្ងៃទី១០ ខែធ្នូ នេះដែរ អង្គការសង្គមស៊ីវិល និងសហជីពជាច្រើនស្ថាប័ន បាននាំគ្នាប្រារព្ធទិវាសិទ្ធិមនុស្ស ១០ ធ្នូ នៅទីលានប្រជាធិបតេយ្យ ក្រោមប្រធានបទ «ស្ដារសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ក្នុងបរិបទវិបត្តិ Covid-19» ដែលមានការចូលរួមពីតំណាងអង្គការសង្គមស៊ីវិល តំណាងអង្គទូត និងការិយាល័យឧត្ដមស្នងការអង្គការសហប្រជាជាតិផងដែរ។ ពិធីនោះ គឺដើម្បីជំរុញឱ្យរដ្ឋាភិបាលកម្ពុជា លើកស្ទួយសិទ្ធិបញ្ចេញមតិ សិទ្ធិនយោបាយ សិទ្ធិការពារបរិស្ថាន និងសិទ្ធិជាច្រើនដទៃទៀតដែលកំពុងរងការរំលោភបំពានពីអាជ្ញាធរកម្ពុជាសព្វថ្ងៃនេះ។
ក្នុងទិវាសិទ្ធិមនុស្ស ១០ ធ្នូ នៅទីលានប្រជាធិបតេយ្យនេះ ប្រធានសហភាពការងារកម្ពុជា លោក អាត់ ធន់ បានលើកឡើងថា កម្មករនិយោជិតស្ទើរតែគ្រប់ស្ថាប័នទាំងអស់កំពុងរងនូវការរំលោភបំពានលើសិទ្ធិការងារពីខាងភាគីម្ចាស់ក្រុមហ៊ុន និងរោងចក្រនៅកម្ពុជា ដូចជានៅក្នុងក្រុមហ៊ុន ណាហ្គាវើលដ៍ (Naga World) ដែលកំពុងបញ្ឈប់បុគ្គលិកដែលជាតំណាងសហជីព ដោយរំលោភលើសិទ្ធិការងារសព្វថ្ងៃនេះ ជាដើម។
ចំណែកប្រធានសមាគមការពារសិទ្ធិមនុស្សអាដហុក លោក នី សុខា រិះគន់រដ្ឋាភិបាលកម្ពុជាក្នុងថ្ងៃប្រារព្ធទិវាសិទ្ធិមនុស្ស ១០ ធ្នូ ថា សកម្មជនសិទ្ធិមនុស្ស និងសកម្មជននានាដទៃទៀតត្រូវបានអាជ្ញាធរកម្ពុជាចាប់ខ្លួនជាបន្តបន្ទាប់ ដែលខុសទៅនឹងច្បាប់ជាតិ និងអន្តរជាតិយ៉ាងធ្ងន់ធ្ងរ ក្នុងនោះក៏មានការរំលោភលើសិទ្ធិជនភៀសខ្លួនដែលរដ្ឋាភិបាលបានអនុវត្តក្នុងពេលថ្មីៗនេះជាដើម។
លោក នី សុខា អំពាវនាវឱ្យរដ្ឋាភិបាលកម្ពុជា បើកលំហប្រជាធិបតេយ្យ និងលំហសេរីភាពសម្រាប់ពលរដ្ឋក្នុងការចូលរួមបញ្ចេញមតិ និងអនុវត្តសិទ្ធិជាមូលដ្ឋានរបស់ពួកគេ ជាពិសេសរដ្ឋាភិបាលគួរតែលុបបំបាត់ការសម្លាប់ក្រៅប្រព័ន្ធច្បាប់ និងត្រូវរកយុត្តិធម៌ជូនជនរងគ្រោះដែលបានស្លាប់ដោយការរំលោភសិទ្ធិនាពេលកន្លងមកផងដែរ។
ចំណែកឯនាយកប្រតិបត្តិអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ លើកឡើងថា សង្គមមួយដែលមិនគោរពសិទ្ធិរបស់ពលរដ្ឋ សង្គមនោះក៏គ្មានយុត្តិធម៌ដែរ ហើយអ្នកដែលត្រូវគេរំលោភសិទ្ធិ គឺជាជនរងគ្រោះយ៉ាងពិតប្រាកដ ចំណែកអ្នកដែលរំលោភសិទ្ធិមនុស្ស គឺជាអ្នកបំពានយុត្តិធម៌សង្គមទាំងស្រុង។
ទិវាសិទ្ធិមនុស្សអន្តរជាតិ ១០ ធ្នូ លើកទី៧៣ ក្នុងឆ្នាំ២០២១ នេះ មិនមែនជាថ្ងៃឈប់សម្រាកជាតិនៅកម្ពុជាទៀតនោះទេ ត្បិតរដ្ឋាភិបាលកម្ពុជាសម្រេចលុបទិវានេះចេញពីថ្ងៃឈប់សម្រាកលើប្រតិទិនខ្មែរតាំងពីខែសីហា ឆ្នាំ២០២០ មកម្ល៉េះ៕