មន្ត្រីជាន់ខ្ពស់គណបក្សក្រៅរដ្ឋាភិបាលមួយអះអាងថា បើគណបក្សរបស់ខ្លួនអាចឈ្នះមេឃុំ-សង្កាត់ត្រឹមតែមួយឃុំនៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅដើមខែមិថុនា ឆ្នាំ២០២២ ខាងមុខនេះ គឺប្រៀបដូចប្រជាពលរដ្ឋខ្មែរឈ្នះទូទាំងប្រទេសដូច្នោះដែរ។
មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី១៧ មករា នេះថា ប្រសិនបើគណបក្សរបស់លោកឈ្នះបានមេឃុំត្រឹមតែមួយនៅពេលបោះឆ្នោតខាងមុខនេះ ក្រុមរបស់លោកនឹងជ្រើសរើសឃុំមួយចំនួនដើម្បីធ្វើការប្រឡងប្រណាំងស្នាដៃកសាងភូមិឃុំគំរូ ដែលអាចផ្តល់សេចក្តីសង្ឃឹមថ្មីជូនប្រជាពលរដ្ឋនៅទូទាំងប្រទេស។
បណ្ឌិត យ៉ង សាំងកុមារ លើកឡើងថា បើទុកឲ្យគណបក្សកាន់អំណាចបន្តដឹកនាំគ្រប់ឃុំ-សង្កាត់ទាំងអស់ ៥ឆ្នាំបន្តទៀត ប្រជាពលរដ្ឋនឹងគ្មានឱកាសប្រៀបធៀបស្នាដៃរបស់គណបក្សផ្សេងក្នុងការអភិវឌ្ឍប្រទេសជាតិនោះឡើយ។ លោកបន្តថា ការប្រកួតប្រជែងនយោបាយបែបនេះ គឺជាការចូលរួមកសាងប្រទេសជាតិ និងជាការលើកស្ទួយជីវភាពរបស់ប្រជាពលរដ្ឋឱ្យរស់នៅបានល្អប្រសើរប្រកបដោយភាពថ្លៃថ្នូរផងដែរ។
ប្រធានគណៈកម្មាធិការនាយករូបនេះបញ្ជាក់ថា ការអភិវឌ្ឍខ្លះមិនត្រូវការថវិកាសោះ ឬត្រូវការថវិកាជាតិតិចតួច ហើយកិច្ចការខ្លះក៏ត្រូវការថវិកាច្រើនផងដែរ ប៉ុន្តែសំខាន់បំផុតនោះ គឺការដឹកនាំដែលល្អ ត្រូវតែបង្ហាញពីតម្លាភាព គណនេយ្យភាពជូនប្រជាពលរដ្ឋឱ្យបានល្អិតល្អន់។ ជាងនេះទៀត ចំណុចដែលរឹតតែសំខាន់នោះ គឺប្រជាពលរដ្ឋនៅមូលដ្ឋានមានសេរីភាពនយោបាយ លែងមានការរើសអើងនិន្នាការនយោបាយដូចពេលកន្លងមក។
ការអះអាងនេះ ធ្វើឡើងស្របពេលដែលការបោះឆ្នោតជ្រើសរើសក្រុមប្រឹក្សាឃុំ-សង្កាត់កាន់តែខិតជិតមកដល់ ខណៈគណបក្សកាន់អំណាចបានគ្រប់គ្រងលើក្រុមប្រឹក្សាឃុំ-សង្កាត់ទូទាំងប្រទេសបន្ទាប់ពីរំលាយគណបក្សសង្គ្រោះជាតិ កាលពីឆ្នាំ២០១៧ មក។
កាលពីថ្ងៃទី១ ខែមីនា ឆ្នាំ២០២១ ប្រមុខរដ្ឋាភិបាលកម្ពុជា បានចេញសេចក្តីសម្រេចស្ដីពីការកំណត់កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ក្នុងឆ្នាំ២០២២ ខាងមុខ ដោយកំណត់យកថ្ងៃទី៥ ខែមិថុនា ឆ្នាំ២០២២ ជាកំណត់ ខណៈឃុំ-សង្កាត់នៅអាណត្តិទី៥ នេះ ត្រូវបានរដ្ឋាភិបាលបន្ថែមចំនួន ៦ឃុំ-សង្កាត់ទៀត ដែលធ្វើឱ្យកើនឡើងពី ១៦៤៦ឃុំ-សង្កាត់ទៅជា ១៦៥២ឃុំ-សង្កាត់។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅកម្ពុជា ត្រូវបានធ្វើឡើង ៤អាណត្តិរួចមកហើយ គឺនៅឆ្នាំ២០០២ ឆ្នាំ២០០៧ ឆ្នាំ២០១២ និងឆ្នាំ២០១៧។ ក្នុងឆ្នាំ២០១៧ កន្លងទៅនេះ គណបក្សកាន់អំណាចទទួលបានមេឃុំ-សង្កាត់ប្រមាណជាង ១១៦៣នាក់ ចំណែកគណបក្សសង្គ្រោះជាតិ ដែលត្រូវតុលាការកំពូលរំលាយនោះ ទទួលបានមេឃុំ-សង្កាត់ប្រមាណជា ៤៨០ឃុំ-សង្កាត់ ខណៈគណបក្សប្រជាធិបតេយ្យមូលដ្ឋាន មិនទទួលបានមេឃុំនោះទេ ប៉ុន្តែទទួលបានក្រុមប្រឹក្សាតែ ៣ឃុំ-សង្កាត់ប៉ុណ្ណោះ។
ជុំវិញការចូលរួមបោះឆ្នោតឃុំ-សង្កាត់អាណត្តិទី៥ ខាងមុខនេះ ក្រសួងមហាផ្ទៃបានបង្ហាញរបាយការណ៍របស់ខ្លួនកាលពីពេលកន្លងទៅថា មានគណបក្សនយោបាយប្រមាណជិត ៤០ហើយដែលទទួលបានសិទ្ធិស្របច្បាប់ ដើម្បីចូលរួមប្រកួតប្រជែងដណ្តើមសន្លឹកឆ្នោតក្រុមប្រឹក្សាឃុំ-សង្កាត់ឆ្នាំ២០២២ និងការបោះឆ្នោតជាតិឆ្នាំ២០២៣ ខាងមុខ៕