បញ្ញវន្តខ្មែរនៅក្រៅស្រុក អំពាវនាវឱ្យពលរដ្ឋខ្មែរគ្រប់រដ្ឋទាំងអស់ដែលកំពុងរស់នៅសហរដ្ឋអាមេរិក នាំគ្នាធ្វើមហាបាតុកម្មទាមទារឱ្យមេដឹកនាំប្រទេសអាស៊ានផ្សេងទៀត និងប្រធានាធិបតីសហរដ្ឋអាមេរិក លោក ចូ បៃដិន គាបសង្កត់ឱ្យមេដឹកនាំកម្ពុជា លោក ហ៊ុន សែន គោរពសិទ្ធិមនុស្ស និងស្ដារលទ្ធិប្រជាធិបតេយ្យនៅកម្ពុជាឡើងវិញក្នុងពេលលោក ហ៊ុន សែន ទៅចូលរួមកិច្ចប្រជុំអាស៊ាន-អាមេរិក នៅពេលខាងមុខនេះ ប្រសិនបើកិច្ចប្រជុំនោះនឹងកើតមានឡើង។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ (PMD) លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី៨ ខែកុម្ភៈ នេះថា នយោបាយអួតក្អេងក្អាងរបស់លោក ហ៊ុន សែន កំពុងស្ថិតក្នុងភាពទាល់ច្រកដែលនឹងត្រូវសម្ដែងភាពស្មោះត្រង់ជាមួយប្រធានាធិបតីសហរដ្ឋអាមេរិក លោក ចូ បៃដិន ក្នុងកិច្ចប្រជុំកំពូលអាស៊ាន-អាមេរិកខាងមុខនេះ ថាតើកម្ពុជាយល់ព្រមស្ដារលទ្ធិប្រជាធិបតេយ្យឡើងវិញ ឬក៏បន្តជាន់ឈ្លីប្រជាធិបតេយ្យដូចសព្វថ្ងៃនេះទៀត។
លោក គឹម សុខ លើកឡើងថា បំណងរបស់សហរដ្ឋអាមេរិកមិនមែនទាមទារឱ្យកម្ពុជាលម្អៀងទៅរកមហាអំណាចខាងណាមួយនោះទេ ត្បិតអាមេរិកសង្ឃឹមថា នៅពេលប្រជាធិបតេយ្យក្នុងតំបន់អាស៊ានកាន់តែរឹងមាំ ប្រទេសចិន មិនអាចយកកម្ពុជាជាឈ្នាន់ដើម្បីអុកឡុកអាស៊ានបានដែរ ជាពិសេសក្រោយពីព័ត៌មានបែកធ្លាយថា កម្ពុជាបានផ្តល់តំបន់រាមឱ្យកងទ័ពជើងទឹកចិនឈរជើងក្នុងកិច្ចសន្យាសម្ងាត់រយៈពេល ៣០ឆ្នាំ ជាដើម ដែលជាការព្រួយបារម្ភរបស់អាមេរិកសព្វថ្ងៃនេះ។
អ្នកវិភាគរូបនេះបញ្ជាក់ថា ការទៅចូលរួមកិច្ចប្រជុំកំពូលអាស៊ាន-អាមេរិកនៅពេលខាងមុខនេះ លោក ហ៊ុន សែន នឹងត្រូវប្ដេជ្ញាជាមួយប្រធានាធិបតីអាមេរិក លោក ចូ បៃដិន ដោយចៀសមិនផុតនោះទេ ថាខ្លួនត្រូវរក្សាអព្យាក្រឹតក្នុងការគោរពអធិបតេយ្យភាពជាតិខ្លួនឯង និងត្រូវគោរពលក្ខខណ្ឌរបស់អន្តរជាតិឱ្យបានត្រឹមត្រូវ ឬក៏បន្តផ្ញើវាសនាកម្ពុជាលើកុម្មុយនីស្តចិន ដូចដែលខ្លួនធ្លាប់អះអាងកន្លងមកបន្តទៀត។
លោក គឹម សុខ បញ្ជាក់ថា ដំណើររបស់លោក ហ៊ុន សែន ទៅចូលរួមកិច្ចប្រជុំនៅសហរដ្ឋអាមេរិក គឺមានភាពប្រហាក់ប្រហែលគ្នាទៅនឹងដំណើររបស់មេដឹកនាំរបបសឹកខុសច្បាប់ភូមា លោក មីន អ៊ុងឡាំង ដែលបានទៅចូលរួមកិច្ចប្រជុំជាមួយសមាគមអាស៊ានដែលជាប់សន្យានូវគោលការណ៍ទាំង ៥ចំណុចរបស់អាស៊ានដូច្នោះដែរ។
កាលពីថ្ងៃទី១៤ ខែមករា ឆ្នាំ២០២២ ប្រធានាធិបតីសហរដ្ឋអាមេរិក លោក ចូ បៃដិន បានអញ្ជើញលោក ហ៊ុន សែន ដែលជាប្រធានអាស៊ានប្ដូរវេនឆ្នាំ២០២២ នេះ ឱ្យទៅចូលរួមប្រជុំកំពូលអាស៊ាន-អាមេរិក ប៉ុន្តែលិខិតនោះមិនបានកំណត់កាលបរិច្ឆេទជាក់លាក់នោះទេ។ ជាងនេះទៀត ក្នុងលិខិតដដែលនោះបញ្ជាក់ថា សហរដ្ឋអាមេរិកគាំទ្រការសម្រេចរបស់អាស៊ាន ហើយគាំទ្រឥតងាករេអំពីអាស៊ាន ជាស្នូល និងជាបេះដូងនៃតំបន់ឥណ្ឌូប៉ាស៊ីហ្វិក។
ដើម្បីស្មើមុខស្មើមាត់ក្នុងនាមរដ្ឋាភិបាលតំណាងប្រទេសកម្ពុជា និងការទទួលស្វាគមន៍ពីប្រធានាធិបតីអាមេរិក លោក ហ៊ុន សែន បានជួលក្រុមហ៊ុន អាឃីន ហ្គាំ ឲ្យជួយបញ្ចុះបញ្ចូលរដ្ឋាភិបាលអាមេរិក ស្ដារទំនាក់ទំនងទ្វេភាគីកម្ពុជា-អាមេរិកឡើងវិញ ក្នុងទំហំទឹកប្រាក់ជិត ១លានដុល្លារអាមេរិកសម្រាប់ឆ្នាំ២០២២ ដែលត្រូវបានលាតត្រដាងជាសាធារណៈដោយក្រសួងយុត្តិធម៌អាមេរិក កាលពីថ្ងៃទី២១ ខែមករា ឆ្នាំ២០២២ កន្លងទៅនេះ។
ជុំវិញបញ្ហានេះ មន្ត្រីជាន់ខ្ពស់របស់រដ្ឋាភិបាលសហរដ្ឋអាមេរិក ធ្លាប់បានទម្លាយប្រាប់សារព័ត៌មាន The Cambodia Daily កាលពីចុងខែមករា ឆ្នាំ២០២២ នេះថា សហរដ្ឋអាមេរិកធ្លាប់មានគម្រោងលុបចោលកិច្ចប្រជុំកំពូលអាស៊ាន-អាមេរិកនេះផងដែរ ដោយសារតែសេតវិមានមិនផ្តល់តម្លៃដល់មេដឹកនាំឯកបក្សនៅកម្ពុជា លោក ហ៊ុន សែន ព្រោះថាលោក ហ៊ុន សែន តែងវាយប្រហារសហរដ្ឋអាមេរិកផ្គាប់ផ្គុនមិត្តដែកថែបចិនរហូតមក៕