30 C
Phnom Penh

បទវិភាគ៖ តើ​អំណាច​លោក ហ៊ុន សែន កាន់តែ​ខ្លាំង​អាច​ធ្វើ​ឱ្យ​ពលរដ្ឋ​កាន់តែ​វេទនា​ដែរ​ឬ​ទេ?

ដោយ ឌឹ ខេមបូឌា ដេលី

បទវិភាគ

ឆន្ទៈ និង​អត្តចរិត​របស់​មេដឹកនាំ គឺជា​កត្តា​សំខាន់​ចំពោះ​ជោគវាសនា​របស់​ពលរដ្ឋ និង​សង្គម។ ការ​កាន់​អំណាច​ដ៏​យូរលង់​របស់​លោក ហ៊ុន សែន និង​ស្ថានភាព​ជាក់ស្តែង​របស់​សង្គម និង​ជីវិត​របស់​ពលរដ្ឋ​ខ្មែរ អាច​ជា​ខ្នាត​វាស់វែង ឬ​ជា​ការ​វិភាគ​អំពី​របៀប​គ្រប់គ្រង​អំណាច និង​ចេតនា​របស់​គាត់។

បន្ទាប់ពី​លោក ហ៊ុន សែន ត្រូវ​បាន​វៀតណាម​លើក​បន្តុប​ឲ្យ​ធ្វើជា​នាយករដ្ឋមន្ត្រី​នៃ​ប្រទេស​កម្ពុជា ក្នុង​ឆ្នាំ​១៩៨៥ អំណាច​របស់​លោក ហ៊ុន សែន បាន​កើន​ខ្លាំង​ឡើងៗ​ជាបន្តបន្ទាប់។ អំណាច​របស់​លោក ហ៊ុន សែន ដ៏​ខ្លាំងក្លា​នេះ បាន​បំពាន​គេ​ឯង​តាម​ទំនើងចិត្ត ទាំង​ក្នុង​ក្របខ័ណ្ឌ​ជាតិ និង​ក្របខ័ណ្ឌ​បក្ស។ ក្នុង​ក្របខ័ណ្ឌ​ជាតិ លោក ហ៊ុន សែន ប្រើ​អំណាច​បំពាន​លើ​ស្ថាប័ន​ជាតិ​សំខាន់ៗ ដូចជា​រដ្ឋសភា តុលាការ និង​ស្ថាប័ន​ព្រះបរមរាជវាំង ជាដើម។

ចំណែក​នៅ​ក្នុង​ក្របខ័ណ្ឌ​បក្ស​វិញ គេ​ក៏​សង្កេត​ឃើញ​លោក ហ៊ុន សែន ប្រើ​អំណាច​បំពាន​ដោយ​សេរី ព្រោះ​វា​ហាក់ដូចជា​គ្មាន​ឥស្សរជន ឬ​មន្ត្រី​គណបក្ស​ប្រជាជន​កម្ពុជា​រូប​ណា​ហ៊ាន​ជំទាស់​នឹង​អ្វី​ដែល​លោក ហ៊ុន សែន ចង់​បាន​នោះ​ទេ បើ​ទោះបី​ពួកគេ​មិន​ពេញចិត្ត​ក៏ដោយ។ ជាក់ស្តែង នៅ​ពេល​ដែល​លោក ហ៊ុន សែន ចង់​តែងតាំង​កូនៗ ឬ​បក្សពួក​របស់​គាត់​ឲ្យ​កាន់​តួនាទី​អ្វី​មួយ អ្នក​ឯ​ទៀត​ត្រូវតែ​ប្រកាស​គាំទ្រ​ភ្លាមៗ។

នៅ​ខណៈ​ពេល​ដែល​អំណាច​លោក ហ៊ុន សែន កាន់តែ​ខ្លាំងក្លា​បែប​នេះ គេ​សង្កេត​ឃើញ​ពលរដ្ឋ​ខ្មែរ​កាន់តែ​រង​ទុក្ខវេទនា​ទៅវិញ។

តើ​វា​មាន​ទំនាក់ទំនង​យ៉ាង​ដូចម្តេច​រវាង​អំណាច​របស់​លោក ហ៊ុន សែន និង​ជីវិត​ប្រចាំ​ថ្ងៃ​របស់​ប្រជាពលរដ្ឋ?

ដើម្បី​ឆ្លើយតប​នឹង​សំណួរ​ខាងលើ គេ​ត្រូវ​ធ្វើការ​សិក្សា​ពិនិត្យ​មើល​អំពី​វិធី​នៃ​ការ​គ្រប់គ្រង និង​ពង្រឹង​អំណាច​របស់​លោក ហ៊ុន សែន

កំណត់ត្រា​ជាច្រើន​ស្ដីពី​នយោបាយ​ខ្មែរ​ក្រោយ​ឆ្នាំ​១៩៧៩ លោក ហ៊ុន សែន ត្រូវ​បាន​គេ​កត់ត្រា​ថា គាត់​បាន​ព្រម​ធ្វើ​អ្វីៗ​ទាំងអស់​តាម​ការ​ចង់បាន​របស់​វៀតណាម ដើម្បី​ទទួល​បាន​ការ​តែងតាំង​ជា​នាយករដ្ឋមន្ត្រី​នៃ​ប្រទេស​កម្ពុជា។

លោក​នាយករដ្ឋមន្ត្រី ហ៊ុន សែន ថ្លែង​ក្នុង​វិមាន​សន្តិភាព​កាល​ពី​ឆ្នាំ​២០១៤ អំឡុង​ទស្សនកិច្ច​របស់​នាយករដ្ឋមន្ត្រី​វៀតណាម មក​កម្ពុជា។ (រូប​ឯកសារ)

មេ​របស់​គាត់​ពេល​នោះ គឺ​លោក ប៉ែន សុវណ្ណ ដែល​ជា​នាយករដ្ឋមន្ត្រី​ទី​១ ក្រោយ​ការ​ដួល​រលំ​នៃ​របប​ខ្មែរក្រហម ត្រូវ​បាន​លោក ហ៊ុន សែន អម​ដោយ​ទាហាន​ពិសេស​វៀតណាម​មួយ​ក្រុម​ចូល​ចាប់​ខ្លួន​ពី​គេហដ្ឋាន​របស់​គាត់ និង​បញ្ជូន​ទៅ​ដាក់​គុក​ងងឹត​ក្នុង​ទីក្រុង​ហាណូយ ប្រមាណ ១០​ឆ្នាំ។

បើ​គេ​រំឭក​អំពី​ការ​ឡើង​កាន់​តំណែង​របស់​លោក ហ៊ុន សែន ដូច​អ្វី​ដែល​លើកឡើង​ខាងលើ​នេះ គេ​អាច​មាន​អំណះអំណាង​ខ្លះ​សម្រាប់​ធ្វើ​ការ​សន្និដ្ឋាន​ថា ដើម្បី​តួនាទី និង​អំណាច លោក ហ៊ុន សែន អាច​ក្បត់​មេ​របស់​ខ្លួន សហការី ឬ​សូម្បីតែ​ជាតិ​ខ្មែរ​ទាំងមូល​ក៏​គាត់​ហ៊ាន​ធ្វើ​ដែរ។

ក្នុង​របាយការណ៍​មួយ​ដែល​ចេញផ្សាយ​កាលពី​ខែ​មករា ឆ្នាំ​២០១៥ អង្គការ Human Rights Watch បាន​សរសេរ​ថា វៀតណាម​បាន​លើក​បន្តុប​លោក ហ៊ុន សែន ដោយសារតែ​គាត់​ជា​មនុស្ស​ឆ្លាត សកម្ម​ការងារ មាន​មហិច្ឆតា និង​ឆន្ទៈ​មោះមុត​ក្នុង​ការ​អនុវត្ត​រាល់​បទបញ្ជា​របស់​ទីក្រុង​ហាណូយ។

នាយករដ្ឋមន្ត្រី​វៀតណាម លោក ង្វ្រៀន តាន់យ៉ុង (Nguyen Tan Dung) [ឆ្វេង] និង​នាយករដ្ឋមន្ត្រី​កម្ពុជា លោក ហ៊ុន សែន ក្នុង​ឱកាស​សម្ពោធ​បង្គោល​ព្រំដែន​គោក​លេខ​៣១៤ នៅ​រវាង​ខេត្ត​កំពត ប្រទេស​កម្ពុជា និង​ខេត្ត​គៀងយ៉ាង ប្រទេស​វៀតណាម កាល​ពី​ថ្ងៃ​២៤ ខែ​មិថុនា ឆ្នាំ​២០១២។

បើ​គេ​ពិនិត្យ​មើល​ការ​អនុវត្ត​អំណាច​ជាក់ស្តែង លោក ហ៊ុន សែន មិន​បាន​ដឹកនាំ​ប្រទេស​តាមរយៈ​ក្រសួង ឬ​ស្ថាប័ន​របស់​រដ្ឋ​នោះ​ទេ គឺ​តាមរយៈ​គ្នា ឬ​មនុស្ស​របស់​គាត់​ទៅវិញ។ ពេល​ខ្លះ លោក​ប្រើប្រាស់​អំណាច​តាមរយៈ​ស្ថាប័ន​រដ្ឋ​ដែរ តែ​លុះត្រាតែ​អ្នក​ដឹកនាំ​ស្ថាប័ន​នោះ​ជា​មនុស្ស​របស់​លោក ១០០% តែម្តង។ ជាក់ស្តែង លោក ហ៊ុន សែន រំលង​អំណាច​លោក ស ខេង ដោយ​ធ្វើ​ការ​ផ្ទាល់​ជាមួយ​ចៅហ្វាយ​ខេត្ត​ខ្លះ ឬ​ប្រើ​មនុស្ស​របស់​លោក​ឲ្យ​ធ្វើការ​រឿង​ព្រៃឈើ ដោយ​រំលង​អំណាច​ក្រសួង​កសិកម្ម ឬ​ប្រើ​កូនប្រសា​របស់​លោក​ឱ្យ​ដោះស្រាយ​បញ្ហា​ទំនាស់​ដីធ្លី​ដោយ​រំលង​អំណាច​ក្រសួង​រៀបចំ​ដែនដី នគរូបនីយកម្ម និង​សំណង់ ជាដើម។

ដូច្នេះ លោក ហ៊ុន សែន ត្រូវតែ​កាង ឬ​ការពារ​មនុស្ស​របស់​លោក​ទាំងអស់​នោះ បើ​ទោះបី​ពួកគេ​ធ្វើ​អ្វី​ខុសច្បាប់ ឬ​ប៉ះពាល់​ប្រជាពលរដ្ឋ​ក៏ដោយ។

កាលពី​ខែ​ធ្នូ ឆ្នាំ​២០១៩ អង្គការ Global Witness បាន​ចេញ​សេចក្តី​ប្រកាស​ព័ត៌មាន​មួយ​ដោយ​លើកឡើង​ថា លោក ហ៊ុន សែន បាន​ពង្រឹង​អំណាច​ផ្ទាល់ខ្លួន​តាមរយៈ​ការ​កាង​បក្សពួក និង​សមាជិក​គ្រួសារ​របស់​លោក​ដែល​បាន​បំផ្លាញ​អត្ថប្រយោជន៍​ជាតិ និង​សេចក្តី​សុខ​ពលរដ្ឋ​សាមញ្ញ។

ចំណុច​នេះ គឺជា​បញ្ហា​មួយ​ដែល​ធ្វើ​ឱ្យ​ពលរដ្ឋ​ខ្មែរ​ក្រ និង​រង​ទុក្ខវេទនា។ ជាក់ស្តែង សព​របស់​យាយ​ផាន ដែល​ធ្លាប់​ជា​កូនធម៌​របស់​សព​ឪពុក​លោក ហ៊ុន សែន និង​ជា​អ្នក​ស្និទ្ធស្នាល​នឹង​គ្រួសារ​ត្រកូល ហ៊ុន ព្រមទាំង​អ្នក​ដទៃ​ទៀត ដូចជា យាយ​ភូ និង​លោក ទ្រី ភាព ជាដើម សុទ្ធតែ​បាន​ដើរ​ធ្វើ​បាប​ពលរដ្ឋ​ខ្មែរ និង​បំផ្លាញ​ជាតិ​ស្រេច​តែ​នឹង​ទំនើងចិត្ត ដោយ​គ្មាន​ស្ថាប័ន ឬ​មន្ត្រី​ណា​ហ៊ាន​ប៉ះ​ឡើយ។

យាយ​ផាន និង​យាយ​ភូ ព្រមទាំង​ក្រុម​គ្រួសារ​របស់​ពួកគេ បាន​រំលោភ​យក​ដី​ប្រជាពលរដ្ឋ​ក្រីក្រ​ស្ទើរ​គ្រប់​ខេត្ត​ក្រុង ដូចជា​ដី​អ្នក​ភូមិ​ឡពាង អ្នក​ភូមិ​បឹងកក់ អ្នក​ភូមិ​បុរីកីឡា និង​ធ្វើ​សកម្មភាព​បំផ្លាញ​ជាតិ​ជាច្រើន​ទៀត ដូចជា​រកស៊ី​កាប់​ឈើ និង​ជីក​រ៉ែ​ជាមួយ​ក្រុមហ៊ុន​បរទេស ជាដើម។

លោក​នាយករដ្ឋមន្ត្រី ហ៊ុន សែន និង​លោក ទ្រី ភាព។ (រូប​ឯកសារ)

ចំណែក​លោក ទ្រី ភាព បាន​បំផ្លាញ​ជាតិ​ដោយ​កាប់​ព្រៃឈើ ជីក​រ៉ែ និង​បង្កើត​ក្រុមហ៊ុន​ទុច្ចរិត​ដទៃ​ទៀត​រហូត​ប្រទេស​អាមេរិក​ដាក់​ឈ្មោះ​ចូល​ក្នុង​បញ្ជី​ហាមប្រាម​មិន​ឱ្យ​ចូល​ប្រទេស​អាមេរិក កាលពី​ចុង​ឆ្នាំ​២០១៩។

ថ្វីបើ​បុគ្គល​មួយ​ចំនួន​ដែល​ពាក់ព័ន្ធ​នឹង​អំពើ​ទុច្ចរិត​បំផ្លាញ​ផលប្រយោជន៍​ពលរដ្ឋ និង​ជាតិ​ក្តី ក៏​គ្មាន​ស្ថាប័ន ឬ​មន្ត្រី​សមត្ថកិច្ច​ណា​ហ៊ាន​ប៉ះ​ពួកគេ​ឡើយ។ កាលពី​ក្នុង​ទសវត្សរ៍​ឆ្នាំ​១៩៩០ អង្គការ Global Witness បាន​ផ្សាយ​ថា យាយ​ភូ បាន​គំរាម​ដក​តំណែង​លោក ចាន់ សារុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ ហើយ​ថា​បើ​ដក​មិន​បាន​ទេ នោះ “ឈប់​ហៅ​ឈ្មោះ​គាត់​ថា យាយ​ភូ ទៀត​ទៅ”

ដូច្នេះ ភស្តុតាង​ទាំងអស់​នេះ​អាច​បញ្ជាក់​បាន​ថា ពេល​ណា​អំណាច​លោក ហ៊ុន សែន កើន​ឡើង​កាន់តែ​ខ្លាំង មនុស្ស​ទុច្ចរិត​នៅ​ជុំវិញ​លោក​កាន់តែ​ច្រើន និង​កាន់តែ​សាហាវ។ ពេល​នោះ សកម្មភាព​របស់​ពួកគេ​កាន់តែ​ប៉ះពាល់​សង្គម និង​ពលរដ្ឋ​កាន់តែ​ខ្លាំង​ឡើងៗ ដែល​ជា​ហេតុ​នាំ​ឲ្យ​ទុក្ខវេទនា​របស់​ប្រជាពលរដ្ឋ​កើន​ឡើង។

ក្រៅតែ​ពី​ការ​កាង​បុគ្គល​ទុច្ចរិត​មួយ​ចំនួន​ដើម្បី​អំណាច លោក ហ៊ុន សែន ក៏​ព្យាយាម​ពង្រឹង​អំណាច​តាមរយៈ​ការ​ផ្តល់​តួនាទី​ដល់​កូនៗ និង​សមាជិក​គ្រួសារ​ត្រកូល ហ៊ុន សាច់​ជិត​ឆ្ងាយ​ទៀត​ផង។ ពួកគេ​ទាំងនេះ​កាន់តែ​មាន​អំណាច ឥទ្ធិពល និង​ការ​ទទួល​បាន​ការ​ការពារ​ពី​លោក ហ៊ុន សែន ជាង​អ្នក​ដទៃ ព្រោះ​ពួកគេ​ជា​សាច់សាលោហិត​នឹង​គ្នា។ ដូច្នេះ អំពើ​របស់​សមាជិក​គ្រួសារ​ត្រកូល ហ៊ុន នេះ​កាន់តែ​លែង​មាន​នរណា​ហ៊ាន​ប៉ះពាល់ បើ​ទោះបី​ទង្វើ​របស់​ពួកគេ​ប៉ះពាល់​ការ​បំផ្លាញ​ជាតិ​ដែល​នាំ​មក​នូវ​ទុក្ខវេទនា​ដល់​ពលរដ្ឋ​ខ្មែរ​យ៉ាងណាក៏ដោយ។

គ្រួសារ​របស់​លោក​នាយករដ្ឋមន្ត្រី ហ៊ុន សែន

ជាទូទៅ សមាជិក​ត្រកូល ហ៊ុន ផ្ទាល់​តែងតែ​ប្រើ​អ្នក​ដទៃ​ដែល​ជា​ដៃជើង ឲ្យ​ប្រព្រឹត្ត​អំពើ​ទុច្ចរិត​ជំនួស​ខ្លួន ដូចជា​ការ​កាប់​បំផ្លាញ​ព្រៃឈើ និង​ការ​រំលោភ​យក​ដី​របស់​ពលរដ្ឋ​ជាដើម។ ដូច្នេះ នៅ​ពេល​ណា​សមាជិក​ត្រកូល ហ៊ុន កាន់តែ​រីកសាយ​បែក​គុម្ព អំណាច​លោក ហ៊ុន សែន កាន់តែ​ខ្លាំង ហើយ​ទង្វើ​របស់​ពួកគេ​ដែល​បំផ្លាញ​សង្គម​ជាតិ និង​បង្ក​នូវ​ទុក្ខវេទនា​ដល់​ពលរដ្ឋ​ក៏​កាន់តែ​កើន។

កាលពី​ពាក់កណ្តាល​ឆ្នាំ​២០០៨ អង្គការ Global Witness បាន​ផ្សាយ​នូវ​របាយការណ៍​ស៊ើប​អង្កេត​មួយ​ដែល​មាន​ចំណងជើង​ថា “ចោរ​លួច​ជាតិ”។ របាយការណ៍​នោះ​បាន​បង្ហាញ​នូវ​ភស្តុតាង​ជាច្រើន​ដែល​លោក ហ៊ុន សែន សមាជិក​គ្រួសារ​របស់​គាត់ និង​បក្សពួក​បាន​លក់​ដី និង​កោះ​នានា​ដែល​ជា​ទ្រព្យសម្បត្តិ​របស់​ជាតិ។

កត្តា​សំខាន់​មួយ​ទៀត​សម្រាប់​ការ​ពង្រឹង​អំណាច​របស់​លោក ហ៊ុន សែន គឺ​ការ​ពឹងពាក់​បរទេស។ ដើម្បី​ទទួល​បាន​ការ​ធានា​ពី​ប្រទេស​ដែល​គាត់​ពឹងផ្អែក​នោះ លោក ហ៊ុន សែន តែងតែ​ដាក់​ខ្លួន​លោក និង​ជាតិ​ទាំងមូល​ជា​អាយ៉ង ឬ​ជា​អ្នក​បម្រើ​ដាច់មុខ​របស់​ប្រទេស​នោះ​តែម្តង ហើយ​គាត់​មិន​ខ្វល់​ទេ បើ​ទោះបី​ប្រទេស​ទាំងនោះ​បង្ក​ហានិភ័យ ឬ​ទុក្ខវេទនា​អ្វី​ដល់​ជាតិ និង​ពលរដ្ឋ​ខ្មែរ។

ក្នុង​អំឡុង​ពេល​កាន់​អំណាច​ជិត​បួន​ទសវត្សរ៍​កន្លងមក​នេះ លោក ហ៊ុន សែន បាន​ផ្ដេកផ្ដួល​លើ​ប្រទេស​វៀតណាម​ទាំងស្រុង​ក្នុង​ដំណាក់កាល​ទី​មួយ និង​បាន​ដាក់​ខ្លួន​ជា​របស់​ប្រទេស​ចិន​វិញ​ក្នុង​ដំណាក់កាល​ទី​២ រហូត​មកដល់​បច្ចុប្បន្ន​នេះ។

ក្នុង​ដំណាក់កាល​ទី​១ លោក ហ៊ុន សែន បាន​ធ្វើ​អ្វីៗ​ទាំងអស់​តាម​ការ​ចង់​បាន​របស់​ប្រទេស​វៀតណាម ដោយ​រួម​ទាំង​ការ​ទទួល​ការ​ហូរ​ចូល​នៃ​ជនជាតិ​វៀតណាម​ក្នុង​ប្រទេស​កម្ពុជា​ដោយ​សេរី ការ​ទទួល​យក​កិច្ចព្រមព្រៀង​ព្រំដែន​តាម​ចិត្ត​របស់​វៀតណាម និង​ការ​ការពារ​ផលប្រយោជន៍​ជនជាតិ និង​ក្រុមហ៊ុន​វៀតណាម​ក្នុង​ប្រទេស​កម្ពុជា។ ដូច​គ្នា​នេះ​ដែរ ក្នុង​ដំណាក់កាល​ទី​២ លោក ហ៊ុន សែន ធ្វើ​អ្វីៗ​តាម​ការ​ចង់​បាន​របស់​ចិន​ទាំងអស់ បើ​ទោះបី​បាត់បង់​ផ្នែក​ខ្លះ​នៃ EBA និង​ទីផ្សារ​ក្នុង​សហរដ្ឋ​អាមេរិក​ក្តី ដែល​បណ្តាល​ឲ្យ​ជាតិ​បាត់​លុយ​ចំណូល​រាប់​ពាន់​លាន​ដុល្លារ​ក្នុង​មួយ​ឆ្នាំៗ។

លោក​នាយករដ្ឋមន្ត្រី ហ៊ុន សែន និង​ប្រធានាធិបតី​ចិន លោក ស៊ី ជិនពីង។

ការ​រៀបចំ​មូលដ្ឋាន​ទ័ព​ជាមួយ​ចិន​ក្នុង​ប្រទេស​កម្ពុជា​ដោយ​លោក ហ៊ុន សែន ក៏​ជា​ហានិភ័យ​ខ្ពស់​សម្រាប់​ជាតិ​ខ្មែរ​ទាំងមូល​ក្នុង​ពេល​អនាគត។

តែ​អ្វី​ដែល​គួរ​កត់សម្គាល់​នោះ គឺ​ទុក្ខវេទនា​របស់​ប្រជាពលរដ្ឋ​ខ្មែរ។ ក្នុង​ពេល​ឱប​វៀតណាម លោក ហ៊ុន សែន ការពារ​ក្រុមហ៊ុន​វៀតណាម ដែល​យក​ដី​ពលរដ្ឋ​ខ្មែរ កាប់​បំផ្លាញ​ព្រៃឈើ និង​ជីក​រ៉ែ​របស់​ខ្មែរ។ ដល់​ពេល​គាត់​ឱប​ចិន​មួយ​ទៀត ក្រុមហ៊ុន​ចិន​បាន​ធ្វើ​សកម្មភាព​រំលោភ និង​បំផ្លាញ​ផលប្រយោជន៍​ខ្មែរ​បន្ថែម​លើ​អ្វី​ដែល​ក្រុមហ៊ុន​វៀតណាម បាន និង​កំពុង​ធ្វើ។ ដូច្នេះ​ទុក្ខវេទនា​របស់​ខ្មែរ​កាន់តែ​កើន​ឡើង នៅ​ពេល​ដែល​លោក ហ៊ុន សែន កាន់តែ​ពង្រឹង​អំណាច​តាមរយៈ​ការ​ពឹងផ្អែក​លើ​ប្រទេស​វៀតណាម និង​ចិន។ សរុប​មក អំណាច​របស់​លោក ហ៊ុន សែន គឺ​មាន​ទំនាក់ទំនង​ដោយ​ផ្ទាល់​នឹង​សេចក្តី​សុខ ឬ​ទុក្ខ​របស់​ប្រជាពលរដ្ឋ​ខ្មែរ។

លោក​នាយករដ្ឋមន្ត្រី ហ៊ុន សែន និង​កូនប្រុស​ច្បង​របស់​លោក គឺ​លោក ហ៊ុន ម៉ាណែត ក្នុង​ពិធី​រំឭក​ខួប​លើក​ទី​២០ នៃ​ការ​បង្កើត​កងយោធពល​ខេមរភូមិន្ទ។ (រូប​ឯកសារ)

មជ្ឈដ្ឋាន​ខ្លះ​និយាយ​ថា ពេល​ណា​អំណាច​របស់​លោក ហ៊ុន សែន កើន​ឡើង នោះ​ទុក្ខវេទនា​របស់​ពលរដ្ឋ​ខ្មែរ​ក៏​កើន​ឡើង​ដែរ។ ផ្ទុយទៅវិញ ពេល​ណា​អំណាច​របស់​លោក ហ៊ុន សែន ចុះ​ខ្សោយ នោះ​ទុក្ខវេទនា​របស់​ពលរដ្ឋ​ខ្មែរ​ក៏​ចុះថយ​ដូច្នោះ​ដែរ។ ជាក់ស្តែង ពេល​លោក ហ៊ុន សែន បាត់បង់​សន្លឹកឆ្នោត​ដ៏​សន្ធឹកសន្ធាប់​ដោយសារ​គណបក្ស​សង្គ្រោះ​ជាតិ​ក្នុង​ឆ្នាំ​២០១៣ លោក ហ៊ុន សែន ខំ​ធ្វើ​ល្អ​ជាមួយ​ពលរដ្ឋ ដូចជា​ចុះ​ចែក​អំណោយ និង​ឱប​ថើប​កម្មករ​កម្មការិនី​តាម​រោងចក្រ​ជា​ញឹកញាប់ ជាដើម។

ពេល​ដែល​លោក ហ៊ុន សែន បាន​សន្លឹកឆ្នោត និង​អំណាច​ណែន​ពេញ​ដៃ​ហើយ លោក ហ៊ុន សែន បែរជា​បង្កើន​ការ​ចាប់​ខ្លួន​កម្មករ ឬ​កូដករ​ដាក់​ពន្ធនាគារ​ដោយ​ចោទប្រកាន់​ពី​បទ​បង្ក​ភាព​វឹក​ធ្ងន់ធ្ងរ​ដល់​សន្តិសុខ​សង្គម ឬ​ការ​ប៉ុនប៉ង​ធ្វើ​បដិវត្តន៍​ពណ៌ ដូចជា​ករណី​ក្រុម​កូដករ​របស់​ក្រុមហ៊ុន ណាហ្គា​វើលដ៍ (NAGA World) ជាដើម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស