កូនប្រុសរបស់លោក ហ៊ុន សែន ដែលជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកចំការលើ បានបញ្ចប់តួនាទីលោក ឌួង ឆាយ ពីអនុប្រធានក្រុមការងារបក្សចុះមូលដ្ឋាន បន្ទាប់ពីលោកបានប្រើប្រាស់បណ្ដាញសង្គមរិះគន់អនុប្រធានតុលាការកំពូល និងប្រព័ន្ធតុលាការកម្ពុជា។
ក្នុងសេចក្ដីសម្រេចចុះថ្ងៃទី១៧ ខែកុម្ភៈ ឆ្នាំ២០២២ លោក ហ៊ុន ម៉ានិត ដែលជាកូនប្រុសរបស់លោកនាយករដ្ឋមន្ត្រី ហ៊ុន សែន និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកចំការលើ ខេត្តកំពង់ចាម បានសម្រេចបញ្ចប់តួនាទីលោក ឌួង ឆាយ ពីអនុប្រធានក្រុមការងារគណបក្សចុះមូលដ្ឋានឃុំបុសខ្នុរ ចាប់ពីថ្ងៃចុះហត្ថលេខានេះតទៅ។
បើតាមសេចក្ដីសម្រេចដដែល ថាការសម្រេចនេះធ្វើឡើងយោងតាមសំណូមពរចាំបាច់ ប៉ុន្តែមិនបានបញ្ជាក់ពីមូលហេតុនៃការបញ្ចប់តួនាទីឡើយ។
ការបញ្ចប់តួនាទីលោក ឌួង ឆាយ ដែលជាកូនប្រុសឧត្ដមសេនីយ៍ផ្កាយ៣ ឧកញ៉ា ឌួង ងៀប នាពេលនេះ បានធ្វើឡើងបន្ទាប់ពីលោក ឌួង ឆាយ បានប្រើប្រាស់បណ្ដាញសង្គមអត្ថាធិប្បាយអំពីរឿងរ៉ាវក្រុមគ្រួសាររបស់ខ្លួន និងពាក់ព័ន្ធអនុប្រធានតុលាការកំពូល លោក យូ ប៊ុនឡេង កាលពីយប់ថ្ងៃទី១៦ ខែកុម្ភៈ ឆ្នាំ២០២២។
ក្រោយពីមានការបញ្ចប់តួនាទីកូនប្រុសលោក ឌួង ងៀប គឺលោក ឌួង ឆាយ បានសរសេរលិខិតសុំទោសអនុប្រធានតុលាការកំពូល លោក យូ ប៊ុនឡេង។ ក្នុងលិខិតសុំទោសចុះថ្ងៃទី១៧ ខែកុម្ភៈ ឆ្នាំ២០២២ លោក ឌួង ឆាយ បានលើកឡើងថា កាលពីយប់ថ្ងៃទី១៦ ខែកុម្ភៈ ឆ្នាំ២០២២ ខ្លួនបានប្រើប្រាស់បណ្ដាញសង្គមដោយឡាយជាវីដេអូបកស្រាយអំពីរឿងរ៉ាវមិនល្អមួយចំនួន ដែលបានកើតមានឡើងចំពោះក្រុមគ្រួសាររបស់ខ្លួនកន្លងមក។
លោក ឌួង ឆាយ និយាយថា ការបកស្រាយរបស់ខ្លួនកាលពីយប់មិញនេះមានគោលបំណងតែមួយគត់ គឺចង់ឱ្យមហាជន ក៏ដូចជាស្ថាប័នផ្សេងៗ ថ្នាក់ដឹកនាំគ្រប់ជាន់ថ្នាក់បានដឹងអំពីអ្វីដែលជាដើមចមនាំឱ្យមានការបែកបាក់ផ្ទៃក្នុងក្រុមគ្រួសាររបស់ខ្លួន។ ជាមួយគ្នានេះ ការបកស្រាយរបស់ខ្លួនបានធ្វើឱ្យមានការប៉ះពាល់ដល់កិត្តិយសអនុប្រធានតុលាការកំពូល លោក យូ ប៊ុនឡេង ដែលបុគ្គលម្នាក់មានចេតនាល្អ ខំចំណាយពេលវេលាដ៏មានតម្លៃ ធ្លាប់បានប្រៀនប្រដៅ ណែនាំ ជួយសម្របសម្រួល ផ្សះផ្សាក្នុងវិវាទគ្រួសារ។
លោកបន្តថា កត្តាទាំងនេះបានធ្វើឱ្យខ្លួនយល់ច្រឡំ ភាន់ភាំង ក្តាប់សាច់រឿងមិនបានច្បាស់លាស់ចំពោះចំណុចនេះ ដែលធ្វើឱ្យខ្លួននិយាយខុស មិនបានពិចារណា ដោយសារតែអារម្មណ៍ស្មុគស្មាញមានរឿងរ៉ាវជាច្រើន ទាំងរឿងខ្លួនឯងផ្ទាល់ រឿងគ្រួសារទាំងមូល រឿងការរកស៊ី។ល។ លិខិតដដែលថា ការទទួលបន្ទុកគ្រួសារច្រើន បានធ្វើឱ្យខ្លួននិយាយប៉ះពាល់ដល់កិត្តិយសលោក យូ ប៊ុនឡេង ដែលជាអនុប្រធានតុលាការកំពូល និងជាអតីតប្រធានសាលាឧទ្ធរណ៍ភ្នំពេញ។
កាលពីថ្ងៃទី១៩ ខែមីនា ឆ្នាំ២០២០ ព្រះមហាក្សត្របានចេញព្រះរាជក្រឹត្យមួយអនុញ្ញាតឱ្យលោក យូ ប៊ុនឡេង ប្រធានសាលាឧទ្ធរណ៍ដែលដល់អាយុចូលនិវត្តន៍ បន្តការងាររយៈពេល ១ឆ្នាំ ចាប់ពីថ្ងៃទី០៧ ខែមេសា ឆ្នាំ២០២០ ដល់ថ្ងៃទី០៧ ខែមេសា ឆ្នាំ២០២១។
លោក យូ ប៊ុនឡេង មិនមែនមានតួនាទីតែជាអនុប្រធានតុលាការកំពូលនោះទេ លោកក៏ជាសហចៅក្រមស៊ើបអង្កេតជាតិនៃសាលាក្ដីខ្មែរក្រហម និងជាសមាជិកគណៈកម្មាធិការកណ្ដាលរបស់គណបក្សប្រជាជនកម្ពុជា។
លោក ឌួង ឆាយ គឺជាកូនប្រុសរបស់ឧត្ដមសេនីយ៍ផ្កាយ៣ ឧកញ៉ា ឌួង ងៀប។ ឧកញ៉ា ឌួង ងៀប ត្រូវចៅក្រមសាលាដំបូងរាជធានីភ្នំពេញ សម្រេចឃុំខ្លួននៅពន្ធនាគារកាលពីថ្ងៃទី១៤ ខែកុម្ភៈ បន្ទាប់លោកបានលាតត្រដាងពីអំពើពុករលួយរបស់ចៅក្រមក្នុងប្រព័ន្ធតុលាការកម្ពុជា៕