អាជ្ញាធរថៃ បញ្ជូនពលរដ្ឋខ្មែរជិត ១៥០នាក់មកកម្ពុជា បន្ទាប់ពីពួកគេបាននាំគ្នាឆ្លងដែនខុសច្បាប់ដើម្បីស្វែងរកការងារធ្វើនៅប្រទេសថៃ។
ស្នងការនគរបាលខេត្តបាត់ដំបង លោក សាត គឹមសាន បានប្រាប់សារព័ត៌មានស្រុកថា ពលរដ្ឋខ្មែរ ១៤៧នាក់ត្រូវបានអាជ្ញាធរថៃបញ្ជូនមកប្រទេសកម្ពុជាវិញតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង នៅថ្ងៃទី១០ ខែមីនា ឆ្នាំ២០២២។
ប្រភពដដែលថាអះអាងថា ពលរដ្ឋចំនួន ១៤៧នាក់ ក្នុងនោះស្រី ៥៧នាក់ និងក្មេង ៣០នាក់ ដោយក្មេងស្រី ១៣នាក់ បាននាំគ្នាឆ្លងដែនទៅប្រទេសថៃ តាមរយៈមេខ្យល់ដើម្បីស្វែងរកការងារធ្វើ។ ករណីនេះ សមត្ថកិច្ចកំពុងស្រាវជ្រាវរកមុខសញ្ញាមេខ្យល់ដែលនាំពលករទៅធ្វើការនៅថៃ មិនស្របច្បាប់ ខណៈពលរដ្ឋចំនួន ១៤៧នាក់ត្រូវបានសមត្ថកិច្ចសាកសួរ កត់ឈ្មោះ ចុះកំណត់ហេតុ និងអប់រំណែនាំអំពីវិធានការការពារការឆ្លងជំងឺកូវីដ-១៩។
ជាមួយគ្នានោះដែរ ក្រុមគ្រូពេទ្យបានធ្វើតេស្ដរហ័សលើពលរដ្ឋទាំង ១៤៧នាក់ ដោយរកឃើញមានវិជ្ជមានកូវីដ-១៩ ចំនួន ៣នាក់ ស្រីម្នាក់ ក្មេងម្នាក់ ខណៈពលរដ្ឋចំនួន ២៤នាក់ ក្នុងនោះមានក្មេង ៥នាក់ត្រូវបានបញ្ជូនទៅធ្វើចត្តាឡីស័កនៅមណ្ឌលគីឡូលេខ៩ ក្នុងស្រុកសំពៅលូន ខេត្តបាត់ដំបង។
កាលពីខែមករា ឆ្នាំ២០២២ កន្លងទៅ ប្រជាពលរដ្ឋខ្មែរមួយចំនួនបាននាំគ្នាបន្តចំណាកស្រុកទៅធ្វើការនៅប្រទេសថៃ ដោយមានសង្ឃឹមថានឹងទទួលបានប្រាក់ចំណូលខ្ពស់ ទោះបីជាពួកគេប្រឈមនឹងបញ្ហាផ្សេងៗក៏ដោយ។
អាជ្ញាធរកម្ពុជា និងថៃ បានបិទច្រកទ្វារព្រំដែនប្រទេសទាំងពីរចាប់តាំងពីខែមីនា ឆ្នាំ២០២០ ដើម្បីទប់ស្កាត់ការរាលដាលជំងឺកូវីដ-១៩ រហូតមកដល់ពេលនេះមិនទាន់បើកដំណើរការវិញនៅឡើយទេ។
កាលពីថ្ងៃទី២០ ខែធ្នូ កន្លងមក រដ្ឋមន្ត្រីក្រសួងមហាផ្ទៃ លោក ស ខេង បានប្រកាសថា ចាប់តាំងពីអាជ្ញាធរថៃ បិទច្រកទ្វារព្រំដែន មានពលករខ្មែរប្រមាណ ២សែន ៦ម៉ឺននាក់ ត្រូវបានអាជ្ញាធរថៃ ចាប់បញ្ជូនត្រឡប់មកកម្ពុជាវិញ ក្នុងនោះមានពលករមួយចំនួនបានត្រឡប់ទៅធ្វើការនៅប្រទេសថៃ វិញជាបន្តបន្ទាប់៕