គណបក្សប្រជាធិបតេយ្យមូលដ្ឋាន (GDP) ប្ដេជ្ញាផ្តល់សេវាសាធារណៈជូនពលរដ្ឋឱ្យល្អប្រសើរ និងមានតម្លាភាព ប្រសិនបើខ្លួនទទួលបានការគាំទ្រពីពលរដ្ឋក្នុងការដឹកនាំអភិវឌ្ឍឃុំ-សង្កាត់នៅដើមខែមិថុនា ឆ្នាំ២០២២ ខាងមុខនេះ។
គណបក្សប្រជាធិបតេយ្យមូលដ្ឋាន បានសរសេរលើទំព័រហ្វេសប៊ុករបស់ខ្លួននៅថ្ងៃទី១៤ ខែមីនា ឆ្នាំ២០២២ នេះ ដោយលើកឡើងនូវបញ្ហាជាអាទិភាពមួយចំនួនដែលបានកើតឡើងនៅតាមមូលដ្ឋាននាពេលកន្លងមក ក្នុងនោះរួមមាន បញ្ហាទីផ្សាររបស់កសិករ និងសិប្បករ បញ្ហាសេវាមណ្ឌលសុខភាព បញ្ហាគ្រឿងញៀន បញ្ហាផ្លូវថ្នល់គ្មានគុណភាព បញ្ហាអសមត្ថភាពរបស់មេភូមិ មេឃុំ ចៅសង្កាត់ក្នុងការផ្តល់សេវាសាធារណៈជូនពលរដ្ឋ ជាដើម។
ប្រភពដដែលអះអាងថា ក្រុមខ្លួនកំពុងតែតាក់តែងនូវគោលនយោបាយ និងវិធានការជាក់ស្តែងដើម្បីដោះស្រាយបញ្ហាអាទិភាពទាំងនេះជូនប្រជាពលរដ្ឋ និងដើម្បីប្រកួតប្រជែងសមត្ថភាព សកម្មភាព និងសុចរិតភាពជាមួយគណបក្សកាន់អំណាចនៅពេលឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខនេះ។
ប្រធានគណៈកម្មាធិការនាយកគណបក្ស GDP បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី១៤ មីនា នេះថា ដើម្បីធានានូវការអនុវត្តការងាររបស់មន្ត្រីថ្នាក់ភូមិ-ឃុំឱ្យបានល្អប្រសើរ ពលរដ្ឋត្រូវតែបង្កើតឱ្យមានគណៈកម្មាធិការឃ្លាំមើលនៅមូលដ្ឋាន ដើម្បីជំរុញការដឹកនាំរបស់មន្ត្រីទាំងនោះឱ្យមានប្រសិទ្ធភាព និងតម្លាភាពមូលដ្ឋានរបស់ខ្លួន។
បណ្ឌិត យ៉ង សាំងកុមារ បញ្ជាក់ថា ក្រៅពីធានាឱ្យមានតម្លាភាពលើសេវាសាធារណៈ មន្ត្រីមូលដ្ឋានថ្នាក់ភូមិ-ឃុំ ក៏ត្រូវមានផែនការ និងគម្រោងជាក់លាក់របស់ខ្លួនផ្តល់ទៅឱ្យថ្នាក់ស្រុក ឬខេត្តផងដែរ ដើម្បីស្នើសុំថវិកា និងធនធានមនុស្ស ឬមន្ត្រីជំនាញឱ្យមកជួយបណ្តុះបណ្តាលពលរដ្ឋគ្រប់សហគមន៍ទាំងអស់។
ការអះអាងនេះ ធ្វើឡើងដើម្បីផ្សព្វផ្សាយអំពីគោលនយោបាយរបស់ខ្លួន សម្រាប់ដោះស្រាយបញ្ហាជូនពលរដ្ឋស្របពេលដែលការបោះឆ្នោតជ្រើសរើសក្រុមប្រឹក្សាឃុំ-សង្កាត់កាន់តែខិតជិតមកដល់។
កាលពីថ្ងៃទី១ ខែមីនា ឆ្នាំ២០២១ រដ្ឋាភិបាលកម្ពុជា បានចេញសេចក្តីសម្រេចស្ដីពីការកំណត់កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដោយកំណត់យកថ្ងៃទី៥ ខែមិថុនា ឆ្នាំ២០២២។ គណបក្សដែលចូលរួមការបោះឆ្នោតនេះមានចំនួន ១៧ ក្នុងចំណោមគណបក្ស ៤៥ ដែលបានចុះបញ្ជីជាផ្លូវការនៅក្រសួងមហាផ្ទៃ។
កាលពីដើមខែកុម្ភៈ បុរសខ្លាំងកម្ពុជា លោក ហ៊ុន សែន ប្ដេជ្ញាមិនឱ្យមានអំពើហិង្សា ឬមានអ្នករបួស និងស្លាប់ដោយសារការបោះឆ្នោតឆ្នាំ២០២២ និង ២០២៣ ខាងមុខ ដោយបានអំពាវនាវឲ្យអាជ្ញាធរមូលដ្ឋានបង្កលក្ខណៈឲ្យគណបក្សទាំងអស់មានសិទ្ធិជួបជុំសមាជិក សមាជិកា និងលើកស្លាកដូចគណបក្សកាន់អំណាច។
យ៉ាងណាក៏ដោយ ជុំវិញការបោះឆ្នោតឃុំ-សង្កាត់អាណត្តិទី៥ នេះ ក្រុមអ្នកសង្កេតការណ៍រិះគន់ថា ការចូលរួមបោះឆ្នោតជាមួយបក្សកាន់អំណាចដោយមិនទាមទារឱ្យមានការកែប្រែនីតិវិធីនៃការបោះឆ្នោតឱ្យបានត្រឹមត្រូវមុននឹងចូលរួមបោះឆ្នោត គឺជាការជួយឱ្យបក្សកាន់អំណាចអាចបន្លំភ្នែកអន្តរជាតិ ដើម្បីបន្តកាន់អំណាចផ្ដាច់មុខដូចសព្វថ្ងៃបានយូរអង្វែងទៅថ្ងៃមុខបន្តទៀតប៉ុណ្ណោះ៕