29 C
Phnom Penh

សាលា​ឧទ្ធរណ៍​លើក​ពេល​សវនាការ​មន្ត្រី​អាហុដក​៥​រូប​ដោយសារ​មេធាវី​ជាប់​ធ្វើ​ចត្តាឡីស័ក

ដោយ ឌឹ ខេមបូឌា ដេលី

បទវិភាគ

សាលា​ឧទ្ធរណ៍​រាជធានី​ភ្នំពេញ លើក​ពេល​សវនាការ​ក្នុង​សំណុំរឿង​អ្នក​ការពារ​សិទ្ធិមនុស្ស​អាដហុក ៥​រូប ដោយសារ​មេធាវី​មួយ​រូប​ជាប់​ធ្វើ​ចត្តាឡីស័ក។

កាលពី​ថ្ងៃ​ទី​២៣ ខែ​តុលា ឆ្នាំ​២០១៨ មេធាវី​ការពារ​ក្ដី​ឱ្យ​អ្នក​ការពារ​សិទ្ធិមនុស្ស​អាដហុក​ចំនួន ៤​រូប និង​មេធាវី​ការពារ​ក្ដី​ឱ្យ​អគ្គលេខាធិការ​រង​នៃ​គណៈកម្មាធិការ​ជាតិ​រៀបចំ​ការ​បោះឆ្នោត លោក នី ចរិយា បាន​ដាក់​បណ្ដឹង​សារទុក្ខ​ទៅ​សាលា​ឧទ្ធរណ៍ បន្ទាប់ពី​សាលាដំបូង​រាជធានី​ភ្នំពេញ​ផ្ដន្ទាទោស​អ្នក​ទាំង ៥​រូប​ដាក់​ពន្ធនាគារ​ម្នាក់ៗ​ចំនួន ៥​ឆ្នាំ​ពី​បទ​ចោទប្រកាន់ «សូកប៉ាន់​សាក្សី និង​សមគំនិត​សូកប៉ាន់​សាក្សី» កាលពី​ថ្ងៃ​ទី​២៦ ខែ​កញ្ញា ឆ្នាំ​២០១៨។

ក្រោយ​ពី​ដាក់​បណ្ដឹង​ជិត ៥​ឆ្នាំ សាលាឧទ្ធរណ៍​បាន​យក​បណ្ដឹង​ដែល​ក្រុម​មេធាវី​បាន​ដាក់​នោះ​មក​បើក​សវនាការ​នៅ​ថ្ងៃ​ទី​២៥ មីនា ប៉ុន្តែ​សវនាការ​នេះ​ត្រូវ​ពន្យារ​ពេល​ទៅ​ថ្ងៃ​ក្រោយ​វិញ។

ប្រធាន​ក្រុមប្រឹក្សា​សាលាឧទ្ធរណ៍​រាជធានី​ភ្នំពេញ លោក ស៊ិន វិសាល លើកឡើង​ក្នុង​បន្ទប់​សវនាការ​ថា មូលហេតុ​ដែល​ចៅក្រម​សម្រេច​លើក​ពេល​សវនាការ​នៅ​ថ្ងៃ​នេះ ដោយសារ​មេធាវី​ការពារ​ក្ដី​ឱ្យ​លោក នី ចរិយា គឺ​លោក សំ សុគង់ បាន​ដាក់​ពាក្យ​ស្នើសុំ​ពន្យារ​ពេល​ក្រោយ​ពី​លោក​ពាក់ព័ន្ធ​នឹង​អ្នកជំងឺ​កូវីដ-១៩។ លោក​បន្ត​ថា ករណី​របស់​ពួកគាត់​ស្ថិតនៅ​ក្នុង​សំណុំរឿង​ជាមួយ​គ្នា ហើយ​ជា​រឿង​ព្រហ្មទណ្ឌ ដូច្នេះ​មេធាវី​ចាំបាច់​ត្រូវ​ចូលរួម មិន​អាច​ខាន​បាន​ឡើយ ទោះបីជា​មេធាវី​ការពារ​ក្ដី​ឱ្យ​អ្នក​ការពារ​សិទ្ធិមនុស្ស​អាដហុក​ចំនួន ៤​រូប​ទៀត​មាន​វត្តមាន​ក៏ដោយ។

ប្រធាន​សមាគម​ការពារ​សិទ្ធិមនុស្ស​អាដហុក លោក នី សុខា បាន​ប្រាប់​ក្រុម​អ្នក​សារព័ត៌មាន​នៅ​មុខ​សាលាឧទ្ធរណ៍​រាជធានី​ភ្នំពេញ​ថា ពួកគាត់​បាន​ដាក់​បណ្ដឹង​សារទុក្ខ​តាំងពី​ឆ្នាំ​២០១៨ មក​ម្ល៉េះ ប៉ុន្តែ​តុលាការ​ទើប​ដំណើរ​នីតិវិធី​ក្នុង​ខែ​មីនា ឆ្នាំ​២០២២។ លោក​បន្ត​ថា រយៈពេល​ប្រមាណ ៥​ឆ្នាំ​មក​នេះ ពួកគាត់​បាន​ទន្ទឹង​រង់ចាំ​យុត្តិធម៌ ដោយសារ​ការ​ឃុំ​ខ្លួន​ពួកគាត់​ក្នុង​ពន្ធនាគារ​រយៈពេល ១៤​ខែ​ទាំង​គ្មាន​កំហុស វា​ជា​រឿង​អយុត្តិធម៌ ខណៈ​បណ្ដឹង​ដែល​ពួកគាត់​ទាមទារ​រក​យុត្តិធម៌​នៅ​មាន​ភាព​យឺតយ៉ាវ​ទៀត​នោះ។

លោក នី សុខា ស្នើ​ទៅ​តុលាការ​ឱ្យ​កោះហៅ​សាក្សី​ឈ្មោះ ខុម ចាន់តារាទី ហៅ ស្រីមុំ និង​មេធាវី​របស់​គាត់ គឺ​អ្នកស្រី ទ្រី ឈួន មក​សួរ​ដេញដោល។ លោក​បន្ត​ថា រហូត​មក​ទល់​ពេលនេះ តុលាការ​មិន​បាន​កោះហៅ​សាក្សី​ទាំង​ពីរ​នេះ​មក​ចូលរួម​សវនាការ​នៅឡើយ​ទេ រាប់​ចាប់​តាំង​ពី​សវនាការ​នៅ​សាលាដំបូង​រាជធានី​ភ្នំពេញ​មក​ម្ល៉េះ។ លោក​យល់​ថា ការ​សម្រេច​សេចក្ដី​ដោយ​មិន​បាន​កោះហៅ​សាក្សី​សួរ​ដេញដោល​នេះ វា​បាន​ឆ្លុះបញ្ចាំង​ពី​ភាព​អយុត្តិធម៌​សម្រាប់​ពួកគាត់​ដែល​ជា​អ្នក​ការពារ​សិទ្ធិមនុស្ស។

លោក​បន្ត​ថា មួយ​វិញ​ទៀត បើសិនជា​សាលាឧទ្ធរណ៍​រក​ឃើញ​មិន​មាន​កំហុស ហើយ​ពួកគាត់​គ្មាន​ទោស​នោះ លោក​ដាក់​ជា​សំណួរ​ថា តុលាការ​នឹង​ដោះស្រាយ​ឱ្យ​ពួកគាត់​បែប​ណា​ដែរ ព្រោះ​ពួកគាត់​ត្រូវ​បាន​កាត់ទោស​ឱ្យ​ជាប់​ពន្ធនាគារ ៥​ឆ្នាំ​ហើយ និង​ត្រូវ​បាន​ឃុំ​ខ្លួន​អស់​រយៈពេល ១៤​ខែ​ទៀត។

អ្នក​ការពារ​សិទ្ធិមនុស្ស​ម្នាក់​ទៀត គឺ​អ្នកស្រី លឹម មុន្នី បង្ហាញ​ការ​គាំទ្រ​ចំពោះ​ការ​ស្នើសុំ​ឱ្យ​តុលាការ​កោះហៅ​សាក្សី​ឈ្មោះ ខុម ចាន់តារាទី ហៅ ស្រីមុំ និង​មេធាវី​ដែល​បាន​ឆ្លើយ​ដាក់​បន្ទុក​លើ​ពួកគាត់​មក​សួរ​ដេញដោល។ អ្នកស្រី​ចាត់ទុក​ការ​ឃុំ​ខ្លួន​ពួកគាត់​រយៈពេល ១៤​ខែ និង​កាត់ទោស​ឱ្យ​ជាប់​ពន្ធនាគារ​ម្នាក់ៗ​រយៈពេល ៥​ឆ្នាំ​នេះ ថា​ជា​អំពើ​អយុត្តិធម៌ ដោយ​ថា​ពួកគាត់​ទាំង ៥​នាក់​មិន​បាន​ប្រព្រឹត្ត​កំហុស​អ្វី​ឡើយ។

នាយិកា​ប្រតិបត្តិ​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ចក់ សុភាព មាន​ប្រសាសន៍​ថា អ្នក​ការពារ​សិទ្ធិមនុស្ស​ទាំង ៥​រូប​មិន​គួរ​ត្រូវ​បាន​តុលាការ​ប្រកាន់​តាំងពី​ដំបូង​មក​ម្ល៉េះ ដោយសារ​ពួកគាត់​ធ្វើ​ការងារ​ដើម្បី​ជួយ​ការពារ​សិទ្ធិ​ជន​រងគ្រោះ។ អ្នកស្រី​បង្ហាញ​ក្ដី​សង្ឃឹម​ថា តុលាការ​ជាន់ខ្ពស់​នឹង​ទម្លាក់​បទ​ចោទប្រកាន់​លើ​អ្នក​ការពារ​សិទ្ធិមនុស្ស​ទាំង ៥​រូប ទោះបី​កន្លងមក​ពាក់ព័ន្ធ​នឹង​ករណី​សកម្មជន​សិទ្ធិមនុស្ស​ដែល​កម្រ​ត្រូវ​បាន​តុលាការ​ទម្លាក់​បទ​ចោទប្រកាន់​ក៏ដោយ។

លោកស្រី ចក់ សុភាព បន្ត​ថា បើសិនជា​សំណុំរឿង​ពួកគាត់​មិន​ត្រូវ​បាន​តុលាការ​ទម្លាក់​បទ​ចោទ​នោះ វា​បាន​ឆ្លុះបញ្ចាំង​ភាព​អយុត្តិធម៌​មួយ​នៅ​ក្នុង​សង្គម​កម្ពុជា និង​បង្ហាញ​ពី​ការ​ធ្វើ​ទុក្ខបុកម្នេញ​លើ​អ្នក​ការពារ​សិទ្ធិមនុស្ស។

កាលពី​ខែ​មេសា ឆ្នាំ​២០១៦ អ្នក​ការពារ​សិទ្ធិមនុស្ស​សមាគម​អាដហុក​ចំនួន ៤​រូប គឺ​លោក នី សុខា លោក យី សុខសាន្ត លោក ណៃ វ៉ង់ដា និង​លោកស្រី លឹម មុន្នី ព្រមទាំង​អគ្គលេខាធិការ​រង​នៃ​គណៈកម្មាធិការ​ជាតិ​រៀបចំ​ការ​បោះឆ្នោត និង​ជា​អតីត​មន្ត្រី​ជាន់ខ្ពស់​សមាគម​អាដហុក លោក នី ចរិយា ត្រូវ​បាន​ចាប់​ខ្លួន​ដោយ​ចោទប្រកាន់​ពី​បទ «សូកប៉ាន់​សាក្សី និង​សមគំនិត​សូកប៉ាន់​សាក្សី» ក្នុង​សំណុំរឿង​ផ្ដល់​ប្រាក់​ជាង ២០០​ដុល្លារ​ទៅ​ឱ្យ​ស្ត្រី​ម្នាក់​ឈ្មោះ ខុម ចាន់តារាទី ហៅ ស្រីមុំ ក្នុង​នាម​ជា​ជន​រងគ្រោះ​ដែល​សុំ​ជំនួយ​ផ្លូវ​ច្បាប់​ពី​សមាគម​អាដហុក​ឱ្យ​ជួយ​ពេល​នោះ។

ស្ត្រី​ឈ្មោះ ខុម ចាន់តារាទី នៅ​ពេល​នោះ​ត្រូវ​បាន​គេ​ចោទ​ថា​ជា​ស្រី​កំណាន់​របស់​លោក កឹម សុខា ប្រធាន​គណបក្ស​សង្គ្រោះ​ជាតិ ដែល​ត្រូវ​បាន​តុលាការ​រំលាយ។ ពួកគេ​ទាំង ៥​នាក់​ត្រូវ​បាន​បញ្ជូន​ទៅ​ឃុំ​ខ្លួន​នៅ​ពន្ធនាគារ​ព្រៃស​កាលពី​ថ្ងៃ​ទី​១ ខែ​ឧសភា ឆ្នាំ​២០១៦ រហូត​ដល់​ថ្ងៃ​ទី​២៩ ខែ​មិថុនា ឆ្នាំ​២០១៧ ត្រូវ​បាន​តុលាការ​សម្រេច​ដោះលែង​ឱ្យ​នៅ​ក្រៅ​ឃុំ​ជា​បណ្ដោះអាសន្ន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស