មន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក នី សុខា អះអាងថា ការចាប់ខ្លួនលោក កើត សារ៉ាយ ពីសំណាក់រដ្ឋាភិបាលកម្ពុជា គឺជាកត្តាមួយនាំឱ្យយុវជនលែងហ៊ានចូលរួមក្នុងកិច្ចការសង្គមបន្តទៀត ហើយក៏ជាសញ្ញានៃការរឹតត្បិតលើសេរីភាពបញ្ចេញមតិ និងជាការបំបិទនូវការបញ្ចេញព័ត៌មានពិតដែលកំពុងកើតមានក្នុងសង្គម។
ប្រធានសមាគមការពារសិទ្ធិមនុស្សអាដហុក លោក នី សុខា លើកឡើងនៅថ្ងៃទី២៤ ឧសភា នេះថា លោក កើត សារ៉ាយ ជាប្រធានអង្គការក្រៅរដ្ឋាភិបាលស្របច្បាប់មួយ ដូច្នេះរាល់សកម្មភាពរបស់គាត់ដែលធ្លាប់បានចូលរួមទប់ស្កាត់លើបញ្ហាកាប់បំផ្លាញព្រៃឈើ ការរំលោភដីធ្លី និងការបំផ្លាញបរិស្ថាន ជាដើម មិនមែនជាសកម្មភាពខុសច្បាប់ទេ ប៉ុន្តែជាសកម្មភាពដែលចូលរួមជួយសហការជាមួយរដ្ឋាភិបាលដើម្បីប្រយោជន៍សង្គមជាតិប៉ុណ្ណោះ។
លោក នី សុខា លើកឡើងថា ការចាប់ខ្លួនលោក កើត សារ៉ាយ គឺជាកត្តាមួយនាំឱ្យយុវជនលែងហ៊ានចូលរួមក្នុងកិច្ចការសង្គមបន្តទៀត ហើយក៏ជាសញ្ញានៃការរឹតត្បិតលើសេរីភាពបញ្ចេញមតិ និងជាការបំបិទនូវការបញ្ចេញព័ត៌មានពិតសម្រាប់ដោះស្រាយបញ្ហាដែលកំពុងកើតមានក្នុងសង្គម ហើយក៏កំពុងធ្វើទុក្ខបុកម្នេញលើពលរដ្ឋសព្វថ្ងៃនេះដែរ។
ប្រធានអង្គការក្រៅរដ្ឋាភិបាលរូបនេះបញ្ជាក់ថា ការចាប់ខ្លួនលោក កើត សារ៉ាយ គឺជាការជះឥទ្ធិពលកាន់តែអាក្រក់បន្ថែមទៀតទៅដល់រដ្ឋាភិបាល ដែលបង្ហាញឱ្យឃើញកាន់តែច្បាស់ថា រដ្ឋាភិបាលខ្មែរនៅតែបន្តសកម្មភាពនូវការរឹតត្បិតសេរីភាពបញ្ចេញមតិ និងរឹតត្បិតបរិយាកាសនយោបាយនៅកម្ពុជានាពេលបច្ចុប្បន្ននេះ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF) អ្នកស្រី អ៊ូ ទេពផល្លីន បានលើកឡើងកាលពីពេលថ្មីៗនេះថា ការធ្វើទុក្ខបុកម្នេញលើសកម្មជនសង្គមបែបនេះ គ្មានផលចំណេញអ្វីដល់រដ្ឋាភិបាលទេ គឺមានតែធ្វើឱ្យខូចមុខមាត់របស់រដ្ឋាភិបាលប៉ុណ្ណោះ។
របាយការណ៍ស្ដីពីការអនុវត្តសិទ្ធិមនុស្សនៅកម្ពុជារបស់ក្រសួងការបរទេសសហរដ្ឋអាមេរិក កាលពីពេលថ្មីៗនេះ បង្ហាញថា ស្ថានភាពសិទ្ធិមនុស្សនៅកម្ពុជា គ្មានការផ្លាស់ប្ដូរគួរឱ្យកត់សម្គាល់ណាមួយឡើយ ព្រោះថារដ្ឋាភិបាលកម្ពុជាមិនបានចាត់វិធានការដាក់ពិន័យលើមន្ត្រីដែលបានរំលោភសិទ្ធិមនុស្សណាមួយឡើយ។
ទោះជាបែបនេះក្តី កាលពីថ្ងៃទី២៣ ឧសភា លោក ហ៊ុន ម៉ាណែត លើកឡើងថា រដ្ឋបរទេសមួយចំនួនគួរតែណែនាំអ្នកប្រព្រឹត្តល្មើសច្បាប់ឱ្យឈប់ធ្វើខុសច្បាប់បន្តទៀតទៅ ជាជាងមកហាមរដ្ឋាភិបាលរបស់លោកមិនឱ្យអនុវត្តច្បាប់លើអ្នកប្រព្រឹត្តល្មើសទាំងនោះ។
យ៉ាងណាក៏ដោយ ប្រទេសលោកសេរីជាច្រើនដែលបានចូលរួមក្នុងកិច្ចប្រជុំដំណើរការពិនិត្យជាសកលតាមកាលកំណត់ (UNPR) របស់អង្គការសហប្រជាជាតិ កាលពីដើមខែឧសភា នេះ បានលើកឡើងថា រដ្ឋាភិបាលកម្ពុជាគ្មានឆន្ទៈពិតប្រាកដក្នុងការលើកស្ទួយការគោរពសិទ្ធិមនុស្ស និងស្ដារលទ្ធិប្រជាធិបតេយ្យទេ បន្ទាប់ពីពួកគេបានរកឃើញថា រដ្ឋាភិបាលបានបង្ក្រាបទៅលើក្រុមប្រឆាំង និងសកម្មជនសង្គមនាពេលកន្លងមកនោះ៕